བོན་ཐམས་ཅད་ཀྱི་ཡང་མཛོད་རྣམ་འབྱེད་འཕྲུལ་གྱི་ལྡེ་མིག

[ཟླ་ཚེས། 2013-05-11 11:31:49][རྩོམ་པ་པོ། དྲན་པ་ནམ་མཁའ།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]

   2010070517460695.jpg

   ཀ་པི་ལྷ་སྐད་དུ། ལྡན་ཏོ་དེ་བ་ཀ་ཀུ་རྦང་། །ཞང་ཞུང་གི་སྐད་དུ། ། མང་བཱེར་ནེ་ར་ཨག་ཐེར་གྱིན། །ནམ་པ་ལྡོང་གི་སྐད་དུ། །ཨ་ཏི་ཧ་ར་མུ་བཱེ་རེ། །སྤུ་རྒྱལ་བོད་ཀྱི་སྐད་དུ། །བཀའ་ལུང་རིག་པ་འཇལ་བའི་ཚད་སྲང་། ། མན་ངག་གཏན་ཚིགས་རིགས་པའི་དངོས་གཞི། །ཤེས་རབ་རྣམ་པར་འབྱེད་པའི་ལྡེ་མིག་ཅེས་བྱ་བ། །ཐུགས་རྗེས་བཞིས་བཏབ་གསུང་གི་འོད་ཟེར་གྱིས། ། འགྲོ་དམན་བློ་ཡི་མུན་པ་སེལ་མཛད་པ། །གཤེན་རབ་སྟོན་པའི་མཆོག་ལ་ཕྱག་འཚལ་ལོ། །མཁའ་ལ་ཉི་ཟླའི་འོད་ཤར་བས། །རིས་སྒྲིབ་མུན་པ་གསལ་བ་བཞིན། །སྟོན་པའི་ཐུགས་ལས་འོད་ཤར་བས། །རྨོངས་པ་བློ་ཡི་མུན་བསལ་ཕྱིར། །རྗེས་སུ་འཇུག་པའི་གཤེན་རབ་ལ། །གོ་བར་བསྟན་གྱི་འབྲེལ་བར་གྱིས། །འདི་ལ་ངང་གིས་གོམས་བྱས་ན། །རང་རིག་རང་ལ་འཆར་བར་འགྱུར། ། རྣམ་འབྱེད་འཕྲུལ་གྱི་ལྡེ་མིག་འདི། །ཡུལ་ནི་ཆུ་མིག་བརྒྱད་ཅུའི་མགོར། །རྒྱུང་ཡར་བླ་ཆེན་ཁོད་སྤུངས་ཀྱིས། །རྒྱུད་ལུང་མན་ངག་བཅུད་བསྡུས་ནས། །བློ་སྦྲམ་རྣམས་ཀྱི་སྒོ་དབྱེའི་ཕྱིར། །ཐེག་སྒོ་ཀུན་ལ་འཇུག་པ་རུ། །འདི་དང་གང་ལྡན་བློ་གྲོས་འཕེལ། །འདི་ལ་གསུམ་སྟེ་ལོ་རྒྱུས་དང་། །འཇལ་བྱེད་གཞལ་བྱ་གསུམ་ལས་སྤྲོས། །སྔོན་ཚེ་དེ་ཡི་དུས་སུ་གཤེན་རབ་ཀྱིས། །བཀྲ་ཤིས་གནས་དེར་བོན་སྒོ་མཛད་ཐབས་བསྟན། །གཤེན་རབ་སྐུ་འདས་རྒྱལ་ཐེབས་རིམ་གྱིས་བྱུང་། །གདུང་རྒྱུད་ལྷ་རྒྱུད་ས་འཇིན་ཞིང་། །འཁོར་ལོ་བསྒྱུར་ཞིང་བརྡོལ་པ་བསྐོས། །དེ་ཚེ་སྲིད་པ་གསུམ་ན་སྤྱོད། །རབས་བདུན་བསྟན་པ་རིམ་གྱིས་མཛད། །སྐུ་གཤེན་རྒྱལ་བློན་འཛོམས་རིམ་གྱིས། །སྲིད་པ་དྭངས་མའི་རྒྱུད་བཟུང་ནས། ། གཡུང་དྲུང་བོན་གྱི་རྒྱུན་ལ་སྤྱོད། །སྨན་དང་སྤྲུལ་ཞིང་མི་དང་འཚོ། །དེ་ནས་རྒྱལ་སྲིད་ཐ་མ་ལ། །སྲིད་པ་ཐ་མའི་རྒྱུན་འཛིན་པའི། །ལས་དང་སྨོན་ལམ་འཕེན་ཤུགས་ཀྱིས། །རྒྱ་གར་ནས་སྔགས་བོད་དུ་བྱུང་། །ཁོད་སྤུངས་མཉམ་བཞག་ངང་ལས་ལྡང་། །ཐབས་ཀྱིས་རྒྱ་གར་རྩོད་པ་བཟློགས། །ལྟ་ཤགས་བདེན་དང་བགྲོ་རྩོད་བྱེད། །བསྟན་པའི་དོན་དུ་སྐུ་གདུང་བརྩིགས། །དེ་ཡིས་འཆའ་མཁན་ཁོད་སྤུངས་བྱེད། །དེ་དུས་ཁོད་སྤུངས་ནམ་མཁར་འཕོས། །བསྟན་པ་རིན་ཆེན་གཏེར་དུ་འཇོག །སྔར་སྐྱེས་ད་སྐྱེ་དྲན་པ་ཡི། །གཟུངས་ལྡན་བླ་ཆེན་ཁོད་སྤུངས་ཀྱིས། ། དོན་དུ་སྨོན་ལམ་དཀར་ནག་འདེབས། །བདེར་གཤེགས་ལུང་ལས་དགེ་སྡིག་ཏུ། །ལུང་བསྟན་ལུང་མ་བསྟན་པ་ཡི། །གྲུབ་པའི་མཐའ་ནི་མཆོག་དམན་གཉིས། །དཀར་ནག་དགེ་སྡིག་མུན་སྣང་ལྟར། །གེ་ཤན་གཤེན་རབ་ཆོས་དང་གསུམ། །བསྒྲུབ་ཕྱོགས་སོ་སོར་སྣང་མོད་ཀྱང་། །ཐིག་ལེ་སེམས་སུ་གྲུབ་མཐའ་གཅིག །བོན་ཐམས་ཅད་ཀྱི་ཡང་མཛོད་རྣམ་འབྱེད་འཕྲུལ་གྱི་ལྡེ་མིག་ལས། །ལོ་རྒྱུས་ཀྱི་ལེའུ་སྟེ་གཅིག་པའོ། །དགེ་སྡིག་ས་ལམ་གནས་གཙང་ཕྱིར། །དེ་ལ་འཇལ་བར་བྱེད་པ་ནི། །བཀའ་ལུང་མན་ངག་ཚད་མ་ཡིས། །སྡེ་གསུམ་སྣོད་ལ་གང་འཚམས་པར། །དེ་མ་ཡིན་གྱིས་མི་བསླུ་ཞིང་། །རང་གི་མཚན་ཉིད་བསྒྲུབ་བྱའི་ཕྱིར། ། རྩོད་དང་རྩོད་བཟློག་དཔང་པོ་གསུམ། །དམན་པ་མ་ཡིན་དྲང་མཁན་དགོས། །མཚན་ཉིད་རྣམ་དབྱེ་གཅིག་གཞན་གསུམ། །གཞལ་བྱ་འཇལ་བྱེད་ཀུན་ལ་དགོས། ། ཁས་བླངས་གཏན་ཚིགས་མཐུན་དཔེ་གསུམ། །སྦྱོར་བ་འགོད་པའི་དུས་ན་དགོས། །དགག་དང་བསྒྲུབ་དང་བསལ་བ་གསུམ། །སྦྱོར་བ་བཤིགས་སྒྲུབ་དུས་ན་དགོས། ། རྫས་ཡོད་བཏགས་ཡོད་མཚོན་ཡུལ་གསུམ། ། སྒོ་དམིགས་འཛིན་པའི་དུས་ན་དགོས། །མེད་སྣང་ཡོད་སྣང་ལྐོག་འགྱུར་གསུམ། །ལོག་ཤེས་ཡོད་པའི་དུས་ན་དགོས། །ཡིན་སྣང་རྟོག་མེད་འཁྲུལ་པ་མེད། །མངོན་སུམ་འཛིན་པའི་དུས་ན་དགོས། །མཚོན་བྱ་མཚོན་བྱེད་མཚོན་ཚུལ་གསུམ། །རྗེས་དཔག་བསྒྲུབ་པའི་དུས་ན་དགོས། །ཁྱབ་བྱ་ཁྱབ་བྱེད་འབྲེལ་བ་གསུམ། །སྤྱི་དང་བྱེ་བྲག་དུས་ན་དགོས། །གྲུབ་མཐའ་ལ་བཟླ་པྲ་ཁྲིད་གསུམ། །འདི་དང་ཕྱི་མ་གཉིས་ཀར་དགོས། །བསྟན་ངག་མདོ་རྩ་ཉི་ཤུ་བདུན། །དེ་ལས་གྱེས་པའི་རྣམ་པ་ནི། །བཀའ་ཡི་མཚན་ཉིད་བཅོས་བསླད་མེད། །རྒྱལ་བའི་ཐུགས་དང་ཞལ་ནས་གསུངས། །རྒྱལ་ཐེབས་ཀྱིས་གསུངས་ཚད་མའོ། །འདི་གསུམ་བཀའ་རུ་གཅིག་པ་སྟེ། །དགོངས་བསྒྲགས་གཞན་ནི་ཐ་དད་ཡིན། །བཀའ་གསུམ་བདག་ཉིད་གཅིག་འབྲེལ་སྟེ། །མིང་དང་སྐབས་ཀྱི་རྒྱུ་འབྲས་སོ། །ལུང་ནི་གཏན་ཚིགས་འབྱུང་གནས་ཏེ། །རྣམ་པ་ཐེག་སྒོ་དུ་མ་ཡིན། །བོན་དུ་གཅིག་ལ་ཐེག་སྒོས་དབེན། །འབྲེལ་བ་དེ་བཞིན་ཤེས་པར་བྱ། །མན་ངག་ཚེགས་ཆུང་དོན་ལ་མྱུར། །རྣམ་པ་རྒྱས་འབྲིང་བསྡུས་པ་གསུམ། །དོན་གཅིག་ངོ་གང་ཐ་དད་ཡིན། །ཚད་མ་མ་ཡིན་བྱེད་མི་བསླུ། །རྣམ་པ་མན་ངག་གཏན་ཚིགས་རིགས། །གཅིག་པ་མ་ཡིན་ཐ་དད་པའོ། །བོན་ཅན་རྫས་དང་དེ་ཡི་རྟེན། །རྣམ་པ་རྫས་དང་བཏགས་པ་སྟེ། །གཅིག་པ་མ་ཡིན་ཐ་དད་ཡིན། །གཞི་ནི་གང་ཞིག་ཁས་བླངས་པའི། །སྡེ་གསུམ་སྣོད་ལ་འཚམས་པ་ སྟེ། །རྣམ་པ་རྒྱུ་འབྲས་ལ་ཟླ་གསུམ། །དོན་དུ་གཅིག་ལ་བློ་ངོར་དབྱེན། །སྣོད་གསུམ་སྡེ་དང་འཚམས་པ་སྟེ། །རྣམ་པ་རབ་འབྲིང་ཐ་མ་ཡང་། །མཆོག་དང་དམན་པའི་ཐ་དད་པའི། །དེ་མ་ཡིན་ནི་རང་མིན་གཞན། །བསླུས་པ་རང་ནི་གཞན་དུ་འཆོལ། །རང་གི་མཚན་ཉིད་རང་གྲུབ་པའོ། །དགེ་བྱེད་གང་ཞིག་དམན་པ་ནི། །ཚེ་འདིའི་ཁེ་དང་གྲགས་པ་དང་། །ཟས་ནོར་ཞིང་ཁམས་འདོད་ཐབས་སུ། །གཡོ་དང་གསོག་གིས་རང་འདོད་སྒྲུབ། །དགེ་བ་སྙད་འདོགས་གཞན་ནོར་འབྲལ། །གཡུང་དྲུང་བོན་ལ་འགལ་བར་རྩོད། །ཕྱི་དཀར་ནང་ནག་གང་ཟག་དེ། །ཝ་སྐྱེས་སེང་གེའི་ལྤགས་གྱོན་འདྲ། །དེ་དོན་གཞི་ལམ་འབྲས་བུ་ཡི། །དྭོགས་བཅས་ཐེ་ཚོམ་མི་སེལ་ཅིང་། །བཀའ་བགྲོ་བདེ་ཉམས་མི་བསྡུར་བར། །རྩོད་ངན་སྡང་བས་ཕ་རོལ་སྨོད། །དེ་ཡིས་དམྱལ་བར་གཞེན་འདེབས་བྱེད། །རང་རྒྱལ་འདོད་ལ་ཆགས་ཞེན་པས། །པྲིང་རྒྱུད་གནས་སུ་གཞེན་འདེབས་བྱེད། །བག་མེད་གཟུ་ལུམ་འགལ་སྨྲས་པས། །དུད་མུར་དབྱིངས་སུ་གཞེན་འདེབས་བྱེད། །བདེན་པའི་དོན་རྨོངས་ང་རྒྱལ་གྱིས། །ལྷ་མེན་རྩོད་པར་གཞེན་འདེབས་བྱེད། །ཚད་མར་མ་གྱུར་རྩོད་སྨྲས་པས། །མཁས་པས་ཁྲེལ་ཞིང་ཡ་ག་འདུ། །བྱེད་པའི་མཆོག་གྱུར་སྐྱེས་བུ་ནི། །འདི་རུ་དམན་པའི་ཆ་འཛིན་ཞིང་། །ཟས་ནོར་འཁོར་ལ་ཆགས་པ་སྤངས། །གཞན་ལ་མི་སྨོད་བདག་མི་བསྟོད། །བཟོད་པའི་སྟོབས་ཀྱིས་དགྲ་ཚོགས་འཇོམས། །ཐབས་ལ་མཁས་པའི་འགྲོ་བ་འདྲེན། །ཐེ་ཚོམ་བགྲོ་གླེང་རྩོད་པ་མཁས། །དམན་པའི་ཆ་བཟུང་འཕགས་པར་འགྱུར། །གཞི་ཚིག་དོན་ལ་སྦྱོར་བ་ཡིས། །ངན་སོང་སྒོ་གཅོད་ཐར་ལམ་འབྱེད། །ས་བཅུའི་ལམ་བགྲོད་འབྲས་བུ་ནི། །སྐུ་གསུང་ཐུགས་དང་ཡོན་ཏན་ལ། །མཐུན་མིན་དབང་དང་བླ་མེད་ཐོབ། །བགྲོ་རྩོད་དམན་པར་གྱུར་པ་ནི། །ཚོང་འདུས་འདྲ་བའི་གནས་ཡུལ་དུ། །མཐའ་མི་འདྲ་བའི་སློབ་དཔོན་ལ། །མུན་པ་འདྲ་བའི་བློ་སྦྱངས་པས། །ཆན་རྡོ་འདྲེས་འདྲའི་བཀའ་སྡེ་ཟིན། །བྱེའུ་སྙི་འཛིན་འདྲའི་བསྟན་པ་བཙུགས། །ཐ་མལ་མིག་སྔར་རབ་བརྗིད་ཀྱང་། །རྒྱུད་སྦྱངས་སྤྱན་སྔར་མཆོག་ཐོབ་མིན། །གཞན་སྨོད་སྙམ་ནས་ཕར་དྲིས་པས། །རྩོད་པར་ཁས་བླངས་ཡེངས་ལ་འཇོག །རྩོད་གཞི་མེད་པར་རྩོད་པ་བཟོ། །དྲི་སྐབས་མེད་པར་གལ་དུ་རྩོད། །བགྲོ་བར་ཁས་བླངས་རྩོད་སྐྱོན་འགེལ། །ཐེ་ཚོམ་བསལ་ནས་རང་ཆེ་འབྱིན། །རང་ལ་ཟུག་པའི་སྐྱོན་སྤངས་ནས། །དམ་བཅའ་ཉམས་པ་མི་སྤོང་ཞིང་། །གཏན་ཚིགས་ཁྱབ་པར་རང་འདོད་སྟོར། །ལུང་རིགས་དཔེ་ལ་ཁྱུར་མིད་བྱེད། །དམ་དུ་བཅས་པའི་བསྒྲུབ་བྱ་སྟོར། །ངེས་མེད་འགལ་བར་བསྒྲུབ་བྱར་མཐོང་། །ཐལ་རྡེབ་ཚིག་ངན་བརླངས་པོ་ཡིས། །ཕ་རོལ་ཞེ་འགེམས་དུག་ལྔ་བསྐྱེད། །ཐོས་པ་སྣུམ་ཞིང་ཆུས་བླུགས་འདྲ། །བསམ་པ་རྡོ་དང་ཆན་འདྲེས་འདྲ། །འབྲས་བུ་ལ་ཁའི་བྱ་སྒྲོ་འདྲ། །གང་ཞིག་བགྲོས་རྩོད་མཆོག་གྱུར་པ། །རིགས་བཟང་སྒོ་གཙང་སྦྱངས་འཕྲོ་བླངས། །ནམ་མཁའ་འདྲ་བའི་གནས་ཡུལ་དུ། །ཉི་ཤར་འདྲ་བའི་དཔོན་གསས་ལ། །སྒྲོན་མེ་འདྲ་བའི་བློ་སྦྱངས་པས། །འོད་གསལ་འདྲ་བའི་སྡེ་སྣོད་འབྱོངས། །བསྟན་པ་བདེན་གཉིས་ཉི་ཟེར་འདྲ། །ཐེག་སྒོ་ཀུན་ལ་རབ་སྦྱངས་ཞིང་། །གོམས་ཀྱིན་སླ་བས་ཀུན་ལ་འཇུག །ཟབ་འཕྲའི་གཞུང་གཅིག་རབ་གཤོག་པས། །གཅིག་ཤེས་ཀུན་ལ་མཁས་པར་འགྱུར། །མ་རྟོགས་ལོག་རྟོག་དུག་ལྔ་ལ། །སྣང་གསལ་འོད་ཆེན་འགྱེད་པར་འགྱུར། །ཐེ་ཚོམ་གེགས་སེལ་ཞུ་ལ་བརྩོན། །བཀའ་བགྲོས་བདེ་ཉམས་བསྡུར་ལ་མཁས། །རྩོད་པས་ལོག་རྟོག་འཇོམས་པར་བྱེད། །རྩོད་དུས་ངག་འཇོམས་གཟི་མདངས་ལྡན། །རང་དབང་མངོན་གྱུར་གཞན་དབང་གྲོལ། །དེ་ནི་སྨྲ་བའི་སེང་གེ་སྟེ།།གསན་པ་ཚོས་ལ་རྩིས་སྨན་འདྲ། །དགོངས་པ་ས་གསེར་ཆུས་འབྱེད་འདྲ། ། སྒོམ་པ་གསེར་གླེང་ཁྲོད་སླེབས་འདྲ། །འབྲས་བུ་ནམ་མཁའི་འཕྲོ་འདུ་འདྲ། ། དམན་གྱུར་དེ་ཡིས་དཔང་བྱས་པས། །ལོག་པར་གཅོད་དང་ཇི་ནར་འཇོག །མི་འདྲ་ལོག་པ་དཔེར་འཇོག་ཅིང་། །དཔེ་མེད་དཔེ་ལ་ལྡབ་སྨྲ་བྱེད། །དཔེ་ལ་དཔེས་མཚོན་བསྒྲུབ་བྱ་སྟོར། །དཔེ་དང་དཔང་པོ་འགྱུར་མ་ཡིན། །གང་ཞིག་དྲང་མཁན་མཆོག་གྱུར་པ། །གོ་བས་བདེན་རྫུན་གོ་མི་ཟློག །རྩོད་གཉིས་དོན་རྟོགས་གསོང་པོར་སྨྲ། །ལུང་རིགས་གཏན་ཚིགས་དཔེ་ཡིས་སྒྲུབ། །དཔེ་དང་དཔང་པོ་མཆོག་གྱུར་ཡིན། །བོན་ཐམས་ཅད་ཀྱི་ཡང་མཛོད། རྣམ་འབྱེད་འཕྲུལ་གྱི་ལྡེའུ་མིག་ལས། བྱ་བ་བྱས་པའི་ལེའུ་སྟེ་གཉིས་པའོ། ། མཚན་ཉིད་རྣམ་དབྱེ་གཅིག་གཞན་ནི། །ཤེས་བྱ་སྤྱི་ཡི་མཚན་ཉིད་ནི། །གཟུང་དོན་བརྡ་རྟགས་འབྲེལ་པ་ལས། །རང་གི་མཚན་ཉིད་འཛིན་པ་ཡིན། །གཟུང་དོན་བརྡ་ཡིས་མཚོན་པའི་དོན། །གཞན་གྱིས་རྗེས་ནས་ཟློག་པ་དང་། །རང་གི་གཟུང་དོན་གྲུབ་པ་དང་། །འབྲེལ་རྟགས་གཞི་ལ་གྲུབ་པ་ཡིན། །དེ་ལས་གཞན་པའི་མཚན་ཉིད་མིན། །གཟུང་དོན་བརྡ་དོན་གོ་དོན་ལ། །གསུམ་པ་དགུར་སྲིད་དེ་ནི་མིན། །དབྱེ་དོན་རྩ་བའི་རྣམ་གྲངས་ཡིན། །འཇལ་བ་བློ་ཡིས་བྱེད་པའོ། །ཁས་བླངས་རང་གི་དམ་བཅའ་སྟེ། །གཏན་ཚིགས་དེ་ཡི་སྒྲུབ་བྱེད་ཡིན། །དཔེ་ནི་འདྲ་བའི་ཕྱོགས་ནས་མཚོན། །སྦྱོར་བ་བསྒྲུབ་བྱའི་རྫས་ལའོ། །དགག་པ་གཞན་གྱི་ལོག་ཤེས་དེ། །སྒྲུབ་པ་དོན་གྱི་མཚན་ཉིད་ཡིན། ། བསལ་བ་ལུང་དང་རིགས་པ་དང་། །མངོན་སུམ་རྗེས་དཔག་བཞི་ཡིས་ནི། །གཞན་དགག་བདག་འདོད་སྒྲུབ་པའོ། །རྫས་ཡོད་རྟེན་དུ་རུང་བ་དང་། །རང་འབྱོར་གཞན་ལ་མ་ལྟོས་དང་། །བྱ་བ་བྱེད་པའི་འགལ་མཐུན་དང་། །གཞན་གྱིས་བསྒྲུབ་པའི་སྒྲུབ་པ་དང་། །ཡིད་ཀྱིས་དམིགས་པའི་རྫས་ཡོད་དོ། །བཏགས་ཡོད་བཏགས་པའི་གཞི་དང་འབྲེལ། །མཚོན་པའི་མིང་དུ་བཏགས་པ་དང་། །ཆ་དང་ཤས་ལ་བཏགས་པ་དང་། །མ་ཡིན་མིང་དུ་བཏགས་པ་དང་། །མེད་ལ་ཡོད་པར་སྒྲོས་བཏགས་དང་། །དུས་ཀྱི་སྐབས་ལ་བཏགས་པའོ། །མཚོན་ཚུལ་དགག་པར་མཚོན་པ་དང་། །སྒྲུབ་དང་རྫས་དང་དོན་དང་མིང་། །དོན་དབྱིངས་མཚོན་པའི་ངོ་གང་ངོ་། །སྒོ་དམིགས་རང་རང་ངོ་གང་ལ། །གཞན་དུ་འཆུགས་པ་སྤང་པའོ། ། མེད་སྣང་མིག་བཙིར་ཟླ་གཉིས་ལྟར། །རྟོག་མེད་བློ་ལ་སྣང་བ་སྟེ། །འཁྲུལ་པ་དབང་པོའི་སྒོ་སྐྱོན་ཡིན། །ལོག་ཤེས་འབྱེད་པ་དྲུག་ཡིན་ཏེ། །སྣང་ལ་མ་ངེས་འདྲ་བས་བསླུ། །ཐེ་ཚོམ་དེ་དང་གཞན་སེམས་དང་། །ཡིད་དཔྱོད་ལྐོག་ཏུ་གྱུར་པ་དང་། །སྔར་བཅད་རྗེས་སུ་བཟློས་རྟོགས་དང་། །འཁྲུལ་པས་ལོག་པར་རྟོག་པ་དང་། །བླ་བརྡོལ་དོན་དུ་མ་ངེས་པའོ། །ཡང་དག་སྤྱི་གཅིག་བྱེ་བྲག་གཉིས། །ཡིན་སྣང་ཡིན་པ་ཉིད་དུ་སྣང་། །རྟོག་མེད་བློ་ལ་སྣང་བ་སྟེ། །འཁྲུལ་མེད་དབང་པོ་སྒོ་གཙང་ཡིན། །དེ་དག་རྣམ་པ་དྲུག་ཡིན་ཏེ། །དབང་པོ་ཡུལ་ལ་དངོས་ཆོད་དེ།། ཡིད་ནི་རྐྱེན་བཞིས་འཛིན་པ་དང་། །རང་རིག་རང་ལ་ཤར་རྟོགས་དང་། །རྣམ་ཐར་གཞན་དོན་འཛིན་པ་དང་། །རྣམ་གྲོལ་གྱི་བོན་དབྱིངས་གཟིགས་སོ། །མཚོན་བྱ་དངོས་དང་དབྱིངས་ཉིད་དང་། །གང་ན་ཡོད་མེད་མ་ཟིན་དང་། །རྗེས་སུ་དཔག་པར་བྱ་བའོ། །མཚོན་བྱེད་རང་བཞིན་ཤེས་རབ་དང་། །གང་གི་རྫས་ལ་དེ་བྱུང་བའོ། །མཚོན་ཚུལ་གང་ལ་གང་བརྟེན་དང་། །གཞན་ལ་འཚོལ་བ་མ་ཡིན་དང་། །རང་གི་རྒྱུ་འབྲས་འཕྲད་ཚུལ་ལོ། །རྗེས་དཔག་རང་གི་མཚན་ཉིད་ལ། ། ལྟར་སྣང་ངེས་པ་མ་ཡིན་ལ། །མཚོན་བྱ་མཚོན་བྱེད་མཚོན་ཚུལ་ལོ། །ཁྱབ་བྱ་ཁྱབ་བྱེད་འབྲེལ་བ་ཡང་། །བྱ་བའི་ཡུལ་ལ་བྱེད་པས་ཁྱབ། །ཁྱབ་བྱ་སྒོས་ལ་ཁྱབ་བྱེད་སྤྱི། །གྲངས་སྤྱིས་རིགས་ལ་ཁྱབ་པ་དང་། །རིགས་སྤྱིས་གྲངས་ལ་ཁྱབ་པའང་སྲིད། །གྲངས་ཀྱི་གཅིག་ལོག་སྤྱི་ཡང་ལོག །རིགས་ཀྱི་སྒོ་ལྡོག་སྤྱི་མི་ལྡོག །འབྲེལ་བ་དངོས་དང་གནས་སྐབས་ཏེ། །དངོས་པོ་རང་བཞིན་འབྲེལ་བ་དང་། །རྒྱུ་དང་འབྲས་བུ་འབྲེལ་བ་ཡིན། །གནས་སྐབས་གནས་དང་ཤ་རག་དང་། །ལས་དང་བརྡ་དོན་འབྲེལ་བའོ། །བོན་ཐམས་ཅད་ཀྱི་ཡང་མཛོད་རྣམ་འབྱེད་འཕྲུལ་གྱི་ལྡེའུ་མིག་ལས། འཇལ་བྱེད་རྒྱས་པར་བཤད་པའི་ལེའུ་སྟེ་གསུམ་པའོ། །ད་ནི་གཞལ་བར་བྱ་བ་ལ། །དོན་དམ་ཀུན་རྫོབ་སྤྲོས་བྲལ་གསུམ། །བོན་གྱི་རང་བཞིན་གནས་པ་ཡིན། །སངས་གཞི་འབྱུང་གཞི་སོག་གཞི་གསུམ། །རྟེན་དུ་ཤེས་པར་བྱ་བ་ཡིན། །མུ་སྟེགས་རུ་ཏྲ་ཕྱོགས་འཛིན་གསུམ། །ཚར་གཅོད་གནས་སུ་ཤེས་པ་ཡིན། །རྒྱུ་དང་འབྲས་བུ་ཡང་རྩེ་གསུམ། །ལ་ཤན་དབྱེ་བའི་གྲུབ་མཐའ་ཡིན། །ས་དང་ལམ་དང་གནས་དང་གསུམ། །འཁོར་ཐར་དབུ་མར་ཤེས་པ་ཡིན། །བོན་སྐུ་རྫོགས་སྐུ་སྤྲུལ་སྐུ་གསུམ། །བསྒྲུབ་བྱ་ཀུན་གྱི་མཐར་ཐུག་ཡིན། །དེ་ལས་ཀུན་རྫོབ་བདེན་པ་ནི། །གཟུང་དོན་དག་དང་མ་དག་གཉིས། །ཟླ་བ་གཅིག་དང་གཉིས་སྣང་མཚུངས། །བརྡ་དོན་ཀུན་རྫོབ་དག་མ་དག །དེ་ཡི་གོ་དོན་མཚན་ཉིད་ནི། ། དག་པ་སྣང་ལ་དོན་བྱེད་ནུས། །མ་དག་དོན་བྱེད་ནུས་པས་སྟོང་། །རྣམ་པ་གནམ་ཟླ་ཆུ་ཟླ་དང་། །སྲེག་མེ་འདྲེ་མེ་ལས་སོགས་སོ། །དོན་ནི་གཅིག་མིན་ཐ་དད་དེ། །རྒྱུ་འབྲས་འབྲེལ་བ་སྲིད་པ་ཡིན། །ལས་ནི་དགེ་སྡིག་གང་སྤྱད་འགྲུབ། །དོན་དམ་པ་ཡི་གཟུང་དོན་ནི། །མཚན་མ་བློ་ཡུལ་མ་ཡིན་ཏེ། །ཡོད་མཐོང་སྣང་གྲགས་རིགས་པ་ཡིས། །དཔྱད་ན་འཇིག་པ་མ་ཡིན་པའོ། །མཚན་ཉིད་སྒྲོ་མེད་སྤྲོས་བྲལ་ཏེ༑ །རྣམ་པ་སྙིང་པོ་འོད་ཟེར་གཉིས། །དོན་ལ་ཐ་དད་མེད་པ་ཡིན། །རྟོགས་བསྒོམས་འབྲས་བུ་བླ་མེད་ཡང་། །སྐུ་གསུམ་དོན་ལ་སྤྲོ་བསྡུ་ཡིན། །བོན་ཐམས་ཅད་ཀྱི་ཡང་མཛོད། རྣམ་འབྱེད་འཕྲུལ་གྱི་ལྡེ་མིག་ལས། བོན་བདེན་པ་གཉིས་ཀྱི་ལེའུ་སྟེ་བཞི་པའོ། །སངས་གཞི་ཀུན་གཞི་བྱུང་ཆུབ་སེམས། །ཡེ་ནས་ཤེས་རིག་རྒྱལ་པོ་ཡིན། །སངས་པ་ཡེ་སངས་རྒྱས་པའི་གཤེན། །ཡེ་སངས་ཡེ་རྟོགས་ཡེ་གྲོལ་ཏེ། །སྐུ་གསུམ་ཐུགས་རྗེ་འབྱུང་གནས་ཡིན། །འབྱུང་གཞི་ཅི་ཡང་མ་ཡིན་སེམས། །ཅིར་ཡང་སྣང་བའི་ཡིད་ཤེས་རྒྱུས། །འཕེན་བྱེད་ལས་ཀྱི་རླུང་གིས་འཕངས། །ལུས་སེམས་འབྲེལ་བའི་དབང་པོ་ཤོར། །དེ་ཡིས་གཟུང་ལ་འཛིན་པར་བྱེད། །སོག་གཞི་ཀུན་གཞིའི་རྣམ་ཤེས་ཏེ། །འཇུག་པའི་ཚོགས་དྲུག་འོད་དང་ཟེར། ། གཟུགས་སྒྲ་དྲི་རོ་རེག་བོན་ལ། །མིག་རྣ་སྣ་ལྕེ་ལུས་ཡིད་ཀྱིས། །མ་ཡིན་ཞུམ་ལ་ཡིད་སེམས་མཐོ། །ཆགས་སྡང་མ་ཡིན་ཡོན་ཏན་ལས། །ལྔ་ལྔ་ཉི་ཤུ་རྩ་ལྔར་གྱེས། །དེ་ལས་དྲུག་ཅུ་རྩ་གཅིག་དང་། །བརྒྱད་ཁྲི་བཞི་སྟོང་ཡོངས་སུ་འཕྲོས། །ཡིད་ཀྱིས་དེ་ལྟར་བྱེ་བྲག་ཕྱེས། །ཉོན་མོངས་ཅན་གྱིས་བདག་ཏུ་ཞེན། །ཀུན་གཞི་སེམས་ལ་བག་ཆགས་བསྒོས། །ཟད་དང་འཕེལ་བར་རྐྱེན་གྱིས་བསྐྱེད། །དེ་ཡིས་ཐར་དང་འཁོར་བ་བྱུང་། །ཡེ་དག་ལྷུན་གྲུབ་སྤྲོས་བཅད་ཅིང་། །སངས་འབྱུང་སོག་པའི་གཞི་ལས་དཔག །སངས་འབྱུང་སོག་པའི་གཞི་གསུམ་ཡང་། །ངོ་འབྲེལ་གཅིག་མིན་ཐ་དད་མིན། །རྐྱེན་དང་སྐབས་ཀྱིས་ཤེས་པའོ། །འཁྲུལ་པ་འབྱུང་བའི་གཞི་ལས་ནི། །སངས་གཞི་མ་རྟོགས་ལོག་རྟོག་ཡིན། །རྣམ་ཤེས་གཞི་ལ་བག་ཆགས་བསགས་སོ། །བོན་ཐམས་ཅད་ཀྱི་ཡང་མཛོད། རྣམ་འབྱེད་འཕྲུལ་གྱི་ལྡེ་མིག་ལས། གཞི་གསུམ་གཅིག་དབྱེན་གྱི་ལེའུ་སྟེ་ལྔ་པའོ། །གེ་ཤན་རྟག་ཆད་ཕྱོགས་རེར་ལྟ། །རྟག་པར་མི་འགྲུབ་རྣམ་པར་གསལ། །ཆད་པར་མ་ངེས་རང་བཞིན་སྣང་། །རྩེ་གཉིས་མི་རྟོགས་ངོ་བོ་གཅིག །རུ་ཏྲས་མཉམ་ལ་གཞན་སྨོད་བྱེད། །སྐྱོན་མེད་སྐྱོན་བརྗོད་རང་ལ་འཁོར། །དོན་ལ་དགག་དང་བསྒྲུབ་པ་མེད།། ཕྱོགས་གཏད་མེད་གཡེམ་ལ་རྒྱུག །ཤ་བཙོན་བཏང་ནས་གནམ་བྱ་འཛིན། །ཁ་སྟོང་ཁྱི་གསར་བྱ་འདེད་འདྲའོ། །སྡེ་སྣོད་རིམ་པས་འཇུག་པ་ནི། །ཕྱྭ་གཤེན་ཕྱི་རོལ་ལྟ་བའི་གཤེན། །སེམས་ལ་ལྷ་འདྲེ་མེད་པ་ལ། །ལ་ཁར་སོ་པ་བཞག་འདྲ་བས། །ཡེ་ཤེས་སྤྱན་མེད་ཤ་མིག་གིས། །བག་ཆགས་རྒྱུ་བ་བགེགས་སུ་མཐོང་། ། རང་གི་དོན་བོར་གཞན་དོན་བསྒྲུབ། །གཅམ་བུ་ལག་སྟོང་ཡ་མཚན་ཆེ། །ཡང་རྩེ་ཐིག་ལེ་ཉག་ཅིག་སེམས། །སྐྱེ་མེད་ཨེ་མ་ངོ་མཚར་ཆེ། །སྣང་གཤེན་ཚུར་རོལ་སྣང་བའི་གཤེན། །སྲོག་མེད་སྐྱེ་འཆི་མེད་པ་ལ། །ཚོང་འདུས་ལོ་ཚ་ལྟ་བུ་ཡིས།། རང་གི་དོན་བོར་གཞན་དོན་རྩོལ། །མི་ཡི་གཡང་བསྐྱབ་རང་ཕྱྭ་ཉམས། །སྒེར་བུ་མདོ་ཤོར་ཡ་མཚན་ཆེ། །ཡང་རྩེ་ཐིག་ལེ་ཉག་ཅིག་སེམས། །མི་སྒོམ་སྒོམ་མེད་ངོ་མཚར་ཆེ། །འཕྲུལ་གཤེན་ཚུར་ལ་རྩོལ་བའི་གཤེན། །སེམས་ཉིད་དགྲ་གཉེན་མེད་པ་ལ། །གསོད་སྡང་སེང་གེའི་རྩལ་འདྲ་བས། །རང་སྐྱོན་བོར་ནས་གཞན་སེམས་སྒྲོལ། །དཔའ་བོ་གཡུལ་ཤོར་ཡ་མཚན་ཆེ། །ཡང་རྩེ་དམིགས་མེད་མ་བཅོས་དང་། །དགྲ་དང་ཟུན་མེད་ངོ་མཚར་ཆེ། །སྤྱི་ཐོ་ཚུར་རོལ་སྲིད་པའི་གཤེན། །སེམས་ཉིད་ཐིག་ལེ་ཉག་ཅིག་ལ། །ལམ་གསུམ་བགྲོད་པའི་མི་གསུམ་ལྟར། །གཅིག་ཏུ་བསྡུས་པའི་རྩོལ་བས་བཅིངས། །རང་གི་སྐྱོན་བཞག་གཞན་ལུས་འདྲེན།། ས་མཁན་ལམ་རྡུགས་ཡ་མཚན་ཆེ། །ཡང་རྩེ་ཡེ་སངས་རྒྱས་པ་ཡིས། །མ་བགྲོད་གནས་སླེབས་ངོ་མཚར་ཆེ། །དགེ་བསྙེན་སྦྱིན་པས་བསྒྲུབ་པའི་གཤེན། །སེམས་ལ་རྒྱུ་འབྲས་མེད་པ་ལ། །མཁའ་ལ་ཆར་འབབ་ལྟ་བུ་ཡི། །འདུས་བྱས་སྦྱིན་པའི་རྒྱུ་འབྲས་ཀྱིས། །འཁོར་བའི་གཡང་སར་རྟག་ཏུ་སྤྱོད། །བཞིན་ལེགས་བཀྲག་གསལ་ཡ་མཚན་ཆེ། །ཡང་རྩེ་དབྱིངས་ལས་ཡེ་ཤེས་ཤར། །མ་བྱིན་ཀུན་ཚོམ་ངོ་མཚར་ཆེ། །དྲང་སྲོང་གཙང་དག་སྤྱོད་པའི་གཤེན། །སེམས་ཉིད་ཡེ་བྱང་ཡེ་ཆུབ་ལ། །འཁྱགས་པས་ས་བསྡམས་འདྲ་བ་ཡིས། །སྐྱེ་མེད་མི་འགག་འབྲས་བུ་སྟོར། །ལམ་པས་ཁྲིད་འདོད་ཡ་མཚན་ཆེ། །ཡང་རྩེ་ཁ་དོག་དབྱིབས་མེད་སེམས། །འདིར་འགྲོ་མེད་པ་བྱང་ཆུབ་སེམས། །ལྷ་རྩེ་བསྙེན་བསྒྲུབ་རྩོལ་བའི་གཤེན། ། རང་འབྱུང་ཐིག་ལེ་རྩོལ་བྲལ་སེམས། །རུས་སྦལ་བསྐུམས་འདྲའི་ལྟ་བ་ཡིས། ། ཡབ་ཡུམ་བ་གའི་ཐིག་ལེ་ལས། །བྱིས་པ་སྟོབས་འབྱེད་ཡ་མཚན་ཆེ། །ཡང་རྩེ་དབྱིངས་ལས་ཡེ་ཤེས་ཤར། །སྟོང་ལ་སྣང་ཤར་ངོ་མཚར་ཆེ། །སྣང་རྩེ་ཏིང་འཛིན་གནས་པའི་གཤེན། །ཅིར་སྣང་དབྱིངས་ཤེས་རང་སྣང་ལ། །མཁའ་ལ་ཉི་ཤར་འདྲ་བ་ཡིས། །ད་གཟོད་ལྟ་བ་ཡ་མཚན་ཆེ། །ཡང་རྩེ་གཟའ་གཏད་མེད་པ་ཡིས། །ཡེ་སངས་རྒྱས་རྟོགས་ངོ་མཚར་ཆེ། །དེ་ལྟར་དམན་པའི་ཐེག་པ་བརྒྱད། །ཀུན་རྫོབ་དོན་མེད་མ་ཡིན་ལ། །གཤེན་རབ་བསླུས་འབེབས་མ་ཡིན་ཞིང་། །ཐེག་བརྒྱད་ལམ་འབྲས་མེད་མིན་པས། །དམན་སྤྱོད་མཆོག་ལ་མོས་པའི་ལམ། །མོས་སྤྱོད་དག་པས་དོན་ལ་ངེས། །ཡང་རྩེ་བརྗོད་མེད་ནམ་མཁའ་འདྲ། །སྟོང་གསལ་སྣང་བའི་ནམ་མཁའ་ལ། །མི་གཡོ་མཉམ་གསལ་ཉི་མ་ཤར། །གླེང་བྲལ་མ་བཅོས་རྩོལ་བྲལ་འོད། །རང་རང་བདག་ཉིད་མུན་ཀློང་སེལ། །མཁའ་ཀློང་དབྱིངས་སུ་ཀུན་སངས་རྒྱས། །བོན་ཐམས་ཅད་ཀྱི་ཡང་མཛོད། རྣམ་འབྱེད་འཕྲུལ་གྱི་ལྡེ་མིག་ལས། གཞལ་བྱ་གྲུབ་མཐའི་ལེའུ་སྟེ་དྲུག་པའོ། །གོང་འོག་ལ་ཤན་དབྱེ་བ་ནི། །རྟོགས་པ་ཡོད་པའི་རྟོགས་རྟོགས་རྣམས། །རྟོག་མེད་སྤྲོས་བྲལ་གཏིང་རྫོགས་པར། །འདིར་སངས་རྒྱས་ཡུལ་མེད་པས་ཡུལ་ཤེས་གཉིས་མི་སྤྱོད། །གཟུང་འཛིན་གཉིས་སུ་བཏགས་པས་འཁོར་བའི་གནས་སུ་གོལ། །ཐིག་ལེ་ཉག་ཅིག་སེམས་ལ་དུ་མར་བགྲང་དུ་མེད། ། མ་རྟོགས་ལོག་པར་རྟོག་པའི་མཐའ་དགུ་སྤྲོས་པར་གོལ། །གཉིས་འཛིན་སེམས་ལ་རྫོགས་པའི་གཉིས་མེད་དོན་དུ་གྲོལ། །སེམས་ལ་རྒྱུ་རྐྱེན་མེད་པས་བྱ་རྒྱུ་བྱེད་མཁན་མེད། །མ་རྟོགས་ལོག་པར་རྟོག་ན་སྐྱེ་རྒྱུ་དུག་ལྔར་སྣང་། །དུག་ལྔ་རང་སར་གྲོལ་བས་རང་འབྱུང་ཡེ་ཤེས་ཆེན་པོ་ཉིད། །སེམས་ལ་སྤང་བླང་མེད་པས་དགག་དང་བསྒྲུབ་པ་མེད། །རང་གིས་ཕྱོགས་ཆར་གཟུང་བས་མཐའ་དགུ་སྤྲོས་པར་གོལ། །སེམས་ལ་རྒྱ་ཕྱོགས་མེད་པས་གོལ་དང་མ་གོལ་མེད། །སེམས་ཉིད་སྟོང་ཡངས་གསལ་བས་མཚན་མའི་དངོས་མ་གྲུབ། །དངོས་པོ་མཚན་མར་གཟུང་བས་ཡུལ་དང་དབང་པོར་གོལ། །སྣང་བ་ཅིར་ཡང་གསལ་བས་གཅིག་ཏུ་གོལ་ས་མེད། །ཐིག་ལེ་ཉག་གཅིག་སེམས་ལ་ཐུགས་རྗེ་ཕྱོགས་བཅུར་སྟོན། །གཅིག་ཏུ་མ་ཡིན་དུ་མ་སྤངས་པ་མེད། །ཅིར་ཡང་མ་ཡིན་གང་ཡང་འགག་པ་མེད། །གང་ཡང་མི་སྤོང་གང་ཡང་བསྒྲུབ་ཏུ་མེད། །མཁའ་གསལ་འདི་ལ་གར་ཡང་གོལ་ས་མེད། །བག་ཆགས་གནས་མེད་མཁའ་ལ་བྱ་འཕུར་འདྲ།། ཐིག་ལེ་སེམས་ལ་འདི་ཞེས་གཟའ་གཏད་མེད། །འདོད་པ་ཀུན་འབྱུང་ཡིད་བཞིན་ནོར་བུའི་ཚུལ། །ཞེས་བྱ་སྟེ། བོན་ཐམས་ཅད་ཀྱི་ཡང་མཛོད། རྣམ་འབྱེད་འཕྲུལ་གྱི་ལྡེ་མིག་ལས། བོན་ཐམས་ཅད་ལ་བཟླ་བའི་ལེའུ་སྟེ་བདུན་པའོ། །དེ་ལྟར་ཚིག་ཏུ་བརྗོད་པ་རྣམས། །རང་རྒྱུད་སེམས་དང་མ་འདྲེས་ན། །གཅོལ་མེད་གཞའ་ཚོན་འདེད་དང་འདྲ། །རུག་གིས་བསྲེས་ལ་རྒྱུད་ལ་བསྟེན། །ཐོས་དང་བསམ་དང་སྒོམ་པ་ལ། །བདུན་བདུན་ཉི་ཤུ་རྩ་གཅིག་དགོས། །དང་པོ་སྔོན་དུ་དགོས་པ་བདུན། །ཡིག་རྩིས་དང་དུ་ལེན་པ་ནི། །ཀུན་གྱི་རྒྱུ་རུ་དགོས་པ་ཡིན། ། དཔོན་གསས་སྐུ་ལ་འཁོར་མཁས་པ། །བྱེད་པ་རྐྱེན་དུ་དགོས་པ་ཡིན། །དད་པ་གཏིང་ནས་སྐྱེས་པ་ནི། །ཕྱིར་མི་ལྡོག་ལ་དགོས་པ་ཡིན། །བླ་མས་གསུངས་པའི་ཟིན་དྲན་ནི། །བསམ་གླེང་དུས་ན་དགོས་པ་ཡིན། །བརྩོན་འགྲུས་སྟོབས་དང་ལྡན་པ་ནི། །དགེ་སྤྱོད་བསྐུལ་མར་དགོས་པ་ཡིན། །སོ་ནམ་གཞན་ལ་འདོར་བ་ནི། །ཐོས་བསམ་སྒོམ་ལ་དགོས་པ་ཡིན། །བར་དུ་བསམ་གཞིར་གཅེས་པ་བདུན། ། ལུས་ཀྱི་བཅའ་གཞིར་ཉམས་པ་ནི། །སྐྱེས་བུ་གྲུ་ལ་བརྒལ་འདྲ་གཅེས། །སེམས་ཀྱིས་གཞན་དོན་བསམ་པ་ནི། །མཁའ་ལ་ཉི་མ་ཤར་འདྲ་གཅེས། །དགེ་སྡིག་བྱེ་བྲག་ཕྱེད་པ་ནི། །ས་གསེར་ཆུ་ཡིས་འབྱེད་འདྲ་གཅེས། །བུ་ནོར་བསླུ་བར་ཤེས་པ་ནི། །ལམ་ནོར་སླར་ལོག་འདྲ་བ་གཅེས། །སྡུག་བསྔལ་ཉམས་སུ་ལེན་པ་ནི། ། ཁྲི་མུན་དོང་གི་བཙོན་འདྲ་གཅེས། །བདེ་འགྲོའི་གནས་ལ་བྲོད་པ་ནི། །བུ་གཞོན་ཨ་མ་མཐོང་འདྲ་གཅེས། །དམ་ཚིག་གཞུང་དུ་སྲོང་བ་ནི། །གསེར་ལ་ནགས་མཚུར་བཏང་འདྲ་གཅེས་སོ། །ཐ་མར་ཉམས་སུ་བླང་ཐབས་བདུན། །ལྟ་བ་གདེང་དང་ལྡན་པ་ནི། །མཁའ་ལ་ཁྱུང་ཆེན་ལྡིང་འདྲའི་ཉམས། །བྱ་བྲན་འཕུར་རླབས་ལྟ་བུ་མིན། །སྤྱོད་པ་བོགས་དང་ལྡན་པ་ནི། །བལ་ཐག་ཆུར་བཅུག་འཐེན་འདྲའི་ཉམས། །རྔ་ལྤགས་འཐེན་འདྲ་ལྟ་བུ་མིན། །སྒོམ་པ་བསྐྱེད་དང་ལྡན་པ་ ནི། །ཟླ་བ་ཡར་ངོ་འདྲ་བའི་ཉམས། །ཟླ་བ་མར་ངོ་ལྟ་བུ་མིན། །འབྲས་བུ་རང་སེམས་རྟོགས་པ་ནི། །རྒྱལ་བུས་རྒྱལ་ས་འཛིན་འདྲའི་ཉམས། །ཁྱི་གུས་ཟས་དྲི་འདེད་འདྲ་མིན། །དུག་ལྔ་དག་པའི་སངས་རྒྱས་ནི། །སྦྲུལ་མཐོང་ཐག་པར་གྲོལ་འདྲའི་ཉམས། །ཐག་པ་སྦྲུལ་སྣང་ལྟ་བུ་མིན། །སྐུ་གསུམ་དོན་ལ་སྤྲུལ་པ་ནི། ། ནམ་མཁའ་ཉི་མ་དྲོས་འདྲའི་ཉམས། །མཚོ་ནང་རྡོ་བསྐྱུར་ལྟ་བུ་མིན། །ཞེས་གསུངས་ཏེ། བོན་ཐམས་ཅད་ཀྱི་ཡང་མཛོད། རྣམ་འབྱེད་འཕྲུལ་གྱི་ལྡེ་མིག་ལས། པྲ་ཁྲིད་ཉམས་ཀྱི་ལེའུ་སྟེ། །གནས་བརྒྱད་པའོ། །ནང་གསེས་རྡེའུ་དུ་བཅུ་གཅིག །སྤྱིར་གྲངས་རྡེའུ་དྲུག་ཅུ་ལྔ། །གཅོ་ལྕམ་གུང་མའི་རྒྱུད་ལ་བསྟེན། །དམའ་མོ་ཐུགས་ཁར་གསལ་འདེབས་མཛོད། །རྣམ་པར་འབྱེད་པའི་གདམས་དོན་གསུམ་པའི་ལེའུའོ། ། ། །

 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།