མདོ་སྨད་མདའ་ཚང་ཡུལ་གྱི་གནའ་དཔེ་སྐོར་གྱི་བཅར་འདྲི།

ཡིག་ཆའི་ཆེ་ཆུང་། MB

ཡིག་ཆའི་རིགས་གྲས། .rm

རིང་ཐུང་།

སྤེལ་དུས། 2013-07-07

ངོ་སྤྲོད་མདོར་བསྡུས། ཀན་ལྷོ་བརྙན་འཕྲིན་ཁང་གི་གཡུང་དྲུང་སྐྱབས་ནས་རྒན་འབྲུག་ཐར་ལ་མདོ་སྨད་མདའ་ཚང་ཡུལ་ནས་བོན་གྱི་དཔེ་རྙིང་གསར་རྙེད་དང་དཔེ་བསྒྲིགས་པར་སྐྲུན་སྐོར་ནས་བཅར་འདྲི་བྱས་པ།
སྤྱི་ལོ་2010ལོར་མདོ་སྨད་མདའ་ཚང་ཡུལ་དུ་དཔེ་རྙིང་འདི་འདྲ་ཞིག་ཡོད་པ་གསར་དུ་རྟོགས་རྗེས། རྒན་འབྲུག་ཐར་ལགས་ཀྱིས་ལོ་དེའི་ཟླ་དྲུག་པར་ལན་ཀྲིག་སློབ་ཆེན་གྱི་མི་རིགས་རིག་པའི་ཞིབ་འཇུག་སློབ་མ་དང་ཀན་སུའུ་དཔེ་སྐྲུན་ཁང་གི་ཞུ་ཆེན་པ། སྒྲ་ཕབ་བརྙན་ལེན་པ་བཅས་ཀྱིས་གྲུབ་པའི་ཀན་སུའུ་དམངས་དོན་བོད་ཀྱི་གནའ་དཔེ་དཀར་ཆག་དག་སྒྲིག་རྟོག་དཔྱོད་ཚོགས་པ་ཁྲིད་དེ་མདའ་ཚང་ཡུལ་དུ་ཕྱིན་པ་དང་། ས་དེའི་འབྲེལ་ཡོད་ལས་ཁུངས་ཀྱི་འགོ་ཁྲིད་དང་དཔེ་རྙིང་དག་ཉར་ཚགས་བྱས་མཁན་གྱི་བོད་ཁྱིམ་ཚོའི་རོགས་རམ་དང་རམ་འདེགས་འོག་དཔེ་རྙིང་རྩད་གཅོད་དང་བསྡུ་སྒྲིག་གི་ལས་ཀ་ཚེགས་མེད་ངང་འགོ་བརྩམས།
དཔེ་རྙིང་འདི་དག་མདའ་ཚང་ཡུལ་གྱི་རྐ་ངོགས་ཞང་དང་ཞིན་ཁྲིན་བོད་མའི་ཞང་། ནན་ཧི་ཞང་བཅས་ཞང་གསུམ་གྱི་བོད་ཁྱིམ་བཅུ་གསུམ་དུ་ཉར་བའི་དཔེ་རྙིང་ཡིན་ལ། རེབ་འདིར་ཁྱོན་གླེགས་བམ་སོ་གཅིག་རྙེད་སོན་བྱུང་བ་དང་། ཤོག་ངོས་སྟོང་ཚོ་བདུན་དང་བརྒྱ་ལྷག་ཡོད་པ་ཚང་མ་ལག་བྲིས་རྐྱང་རྐྱང་རེད། མང་ཆེ་བ་གནའ་བོའི་བོད་ཤོག་ཏུ་བྲིས་འདུག་ལ། གླེགས་བམ་གཅིག་ཀོ་བའི་ཐོག་ཞང་ཞུང་ཡིག་རྒན་གྱིས་བྲིས་པའི་རྩིས་གཞུང་གི་སྐོར་ཡིན། རེབ་འདིར་རྙེད་སོན་བྱུང་བའི་གླེགས་བམ་ཚང་མ་དཔེ་ཆ་འགོ་བཙེམས་མ་སོ་གཅིག་ཏུ་བཅོས་ཏེ་བསྒྲིགས་ཡོད།
ཁ་གྲངས་མང་ལ་ནང་དོན་རྒྱ་ཆེ་བའི་བོན་གྱི་དཔེ་རྙིང་འདི་དག་ནི་དུས་སྔ་ལ་ནང་དོན་ངོ་མཚར་ཆེ་བ། སྐུང་ཡིག་དང་བརྡ་རྙིང་། ཞང་ཞུང་གི་སྐད་བཅས་ཀྱིས་བཅིངས་དྲགས་པས་དོན་རྟོགས་དཀའ་བ། གླེགས་བམ་གྱི་ངོས་སམ་ཡིག་འབྲུའི་བར་མཚམས་སུ་ལྐོག་གྱུར་གྱི་རི་མོ་སྣ་ཚོགས་ཀྱིས་བརྒྱན་འདུག ནང་དོན་གྱི་ཆ་ནས་གཙོ་བོ་ཞང་ཞུང་གི་རྒྱལ་རབས་ལོ་རྒྱུས་དང་ཚོ་ཤོག་ལོ་རྒྱུས། ཞང་ཞུང་གི་ཡིག་གཟུགས་རྙིང་བ། ས་འདུལ་གཏོ་བཅོས། བསང་འབུལ་མཆོད་པ། མི་ཚེ་ཆོ་སྒྲུབ། མདོས་ཡས་གཏོང་བ། ཐན་འགོག་ཆར་ཕབ། ལྷ་གསོལ་བརྔན་རྒྱག ཕྱྭ་དང་གཡང་འགུག གཙང་ཤེས་སེལ་འདེབས། བླ་འབོད་ཚེ་འགུག མོ་ལུང་རྩིས་རྒྱག འདྲེ་སྲི་གླུད་གཏོང་སོགས་ཡ་ཐོག་བོད་མའི་སྤྱི་ཚོགས་འཚོ་བ་དང་བསམ་བློ། ཡུལ་སྲོལ་གོམས་གཤིས་སོགས་མཚོན་པའི་ནང་དོན་རེད།
བོན་གྱི་དཔེ་རྙིང་གླེགས་བམ་འདི་དག་ནང་དོན་དང་ཡི་གེ། བརྡ་ཆད་སོགས་ཀྱི་ཐོག་ནས་དབྱེ་ཞིབ་བྱས་མཐར་དུས་རབས་ལྔ་བ་དང་དྲུག་པའི་དུས་ཀྱི་དཔེ་རྙིང་ཡིན་པ་ཐག་ཆོད་བྱུང་ཡོད་ལ། དེའི་ཡར་སྔོན་གྱི་བོད་མའི་བསམ་བློ་དང་མཚན་ཉིད་རིག་པ། ཆོས་ལུགས། ཚན་རིག་ལག་རྩལ་སྐོར་གྱི་སྟོང་ཆ་བསབ་པའི་ཡིག་ཆ་རྩ་ཆེན་ཡིན་ཟེར།
བཅར་འདྲིའི་ལས་ཀའི་ཁྲོད་བློ་ཡིད་ལས་འདས་པ་ཞིག་ནི། རྒན་འབྲུག་ཐར་ལགས་ཀྱིས་ཡིག་གཟུགས་འདི་ནི་གངས་རིའི་ཁྲོད་ཀྱི་ཡི་གེ་ཞེས་པ་དེ་རེད་ཅེས་ད་སྔ་མཐོང་མ་མྱོང་བའི་ཡིག་གཟུགས་ངོ་མཚར་བོ་ཞིག་དཔེ་ཆའི་ནང་ཡོད་པ་བསྟན་བྱུང་བ་དེ་དང་། གཞན། འདི་ནི་ལོ་ངོ་སྟོང་ཕྲག་འགའི་ཡར་སྔོན་དུ་ཞང་ཞུང་གི་ཡུལ་དུ་འཚོ་བའི་རྟ་ལག་པ་བཞི་ཅན་གྱི་ལག་རུས་དང་རྨིག་པ་རེད་ཅེས་རྟའི་ལག་རུས་རྨིག་པ་དང་ལྡན་མའི་རུས་ཚིགས་དངོས་ཤིག་བསྟན་པ་ནི་བག་ཆགས་ཆེས་ཟབ་ལ་ཆེས་བརྗེད་དཀའ་ཤོས་རེད།
དགེ་འབྲུག་ཐར་ལགས་ཀྱི་མཚམས་སྦྱོར་སོགས་གཟིགས་འདོད་ན་གཤམ་གྱི་དྲ་གནས་སུ་གཟིགས་པར་འཚལ།http://old.himalayabon.com/article/news/20130108930.html

ཐོབ་སྐར།

གཟིགས་ཐེངས།

 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།