གདུང་སྲེག་ཆེ་ཆུང་ནས་བསྟན་པའི་འབྲུ་བཀོད་སྐོར་ལ་བསྐྱར་ཞིབ།

   དེ་ཡང་གདུང་སྲེག་ཆུང་བའི་གཞུང«གདུང་སྦྱོང་ཟབ་མོ་སྲེག་ཆོག་ཆུང་བ་ཡི་གེ་འཁོར་ལོ»ལས་བསྟན་པའི་འབྲུ་བཀོད་སྐབས་ཀ་མད་སུམ་ཅུ་དང་།  དབུ་ཚེག་ཤད་གསུམ།  དབྱངས་བཞི།  ཡ་སྟ་བཅས་བསྡོམས་ཡི་གེ་སུམ་ཅུ་སོ་བརྒྱད་དུ་གྲངས་ངེས་སུ་བསྟན་ཡོད་པ་དང་། །དེ་རྣམས་ལུས་གནས་གང་དང་གང་ཞིག་ལ་འགོད་དགོས་པ་རིམ་པས་བཤད་པ་ལ།  ཀ༐ _{སྤྱི་གཙུག}   ཁ༐ _{མིག་གཡས།}  ག _{མིག་གཡོན།}  ང་༐ _{རྣ་བ་གཡས།}    ཅ༐ _{རྣ་བ་གཡོན།}  ཆ༐ _{སྣ་གཡས།}   ཇ༐ _{སྣ་གཡོན།}  ཉ༐ _ཁ།  ཏ༐ _{ལག་པ་གཡས།}   ཐ༐ _{ལག་པ་གཡོན།}  ད༐ _{མགྲིན་པ།}  ན༐ _{ཐུགས་ཀ།}  པ༐ _{གློ་བ་གཡས།}  ཕ༐ _{གློ་བ་གཡོན།}  བ༐ _{ལྟེ་བ།}  མ༐ _{མཆིན་པ།}  ཙ༐ _{མཁལ་མ་གཡས།}  ཚ༐ _{མཁལ་མ་གཡོན།}  ཛ༐ _{མཚེར་པ།}  ཝ༐ _{མཁྲིས་པ།}  ཞ༐ _{རྒྱུ་མ།}   ཟ༐ _{ཕོ་བ་གཉའ་མ།}   འ༐ _{རྐང་པ་གཡས།}   ཡ༐ _{རྐང་པ་གཡོན།}  ར༐_{རྐང་མཐིལ།}  ལ༐ _{གསང་དབུགས་བྱང་ཐུང་།}    ཤ༐ _{བྱང་ཤ་སྨུག་པོ།}  ས༐ _{རུས་པ།}  ཧ༐ _{ཁྲག་དང་དྲོད།}  ཨ༐ _{སེམས་དང་རྣམ་ཤེས།}   ༄༅༅།། _{སྤྱི་བོ།}   ་་་_{ཐུགས་ཀ།}  །།།_{མགྲིན་པ།}  ཨིཨིཨི། _{མིག་མདོ།}  ཨུཨུཨུ། _{ཙི་ཏའི་གསང་སྒོ།}   ཨེཨེཨེ། _{ཤངས་ཟོམ།}   ཨོཨོཨོ། _{ལྗགས་ཀྱི་དང་གོང་།}   མྱམྱམྱ་ _{སྙན་གྱི་སྒོ།}བཅས་སོ།།  འདིར་དོགས་དཔྱོད་དགོས་པ་ཞིག་ནི་གཞུང་གི་ཡིག་ཆུང་ལས།  “དང་ཐོག་ཤད་ཚག་བུ་དྲུག་རྣམ་ཤེས་བརྒྱད་ལ་བཀོད།” ཞེས་དང་། མེ་སྤར་སྐབས། “ཡེ་གཤེན་བརྒྱད་ཀྱིས་མེ་སྤར་བས། །རྣམ་ཤེས་བརྒྱད་ཀྱི་བག་ཆགས་བསྲེག་གྱུར་ཅིག” ཅེས་གསུངས་ཤིང་།  དེའི་བུ་དྲུག་ནི།  སྟེང་བུ་གི་གུ་འགྲེང་བུ་ན་རོ་གསུམ། འོག་བུ་ཞབས་ཀྱུ་ཡ་སྟ་ར་སྟ་གསུམ་ཡིན་པ་ཡོངས་གྲགས་ལྟར་ལ།  འོན་ཏེ་འབྲུ་བཀོད་ཀྱི་ཚིག་བཤད་སྐབས་ར་སྟ་མ་བྱུང་ཞིང་གལ་ཏེ་ཡོད་པའི་དབང་དུ་བྱས་ཀྱང་འགོད་ས་རྣམ་ཤེས་བརྒྱད་དུ་གྲངས་ངེས་བསྟན་པ་དང་མི་མཚུངས་པས་འདིའི་དགོངས་པ་ཅི་ཞིག་ཡིན་སྙམ་ན།  འདི་ལ་དེ་སྔོན་དཔྱད་བརྗོད་མཛད་པ་དེ་འདྲ་མ་མཇལ་རུང་། གཞུང་གི་དོན་ལ་བརྟགས་ན་འདི་ལྟར་ཡིན་དགོས་འདུག་སྟེ། བུ་དྲུག་ཅེས་པའི་དོན་ཁྱབ་མཐའ་ལྟ་བུ་མ་ཡིན་པར་དངོས་བསྟན་དབུ་ཚེག་ཤད་གསུམ་ཐོག་ཡི་གེའི་བུ་དྲུག་ལས་ར་སྟ་ཕུད་པའི་ལྔ་པོ་བསྡོམས་ན་འབྲུ་བརྒྱད་བྱུང་བ་དེ་དག་རྣམ་ཤེས་བརྒྱད་ཅེས་དེའི་རྟེན་སོ་སོར་བཀོད་དགོས་པར་གཞུང་ཚིག་གོང་འོག་བབ་ཀྱིས་ཤེས་ཐུབ།  ཡང་བུ་ཡིག་དྲུག་ལས་ར་སྟ་དོར་བའི་རྒྱུ་མཚན་ཅི་ཡོད་ཅེ་ན། དེ་ནི་གཞི་རྩའི་ཀ་མད་སུམ་ཅུའི་ཐོག་རྣམ་ཤེས་བརྒྱད་དང་འབྲེལ་བའི་ཡིག་འབྲུ་བརྒྱད་བཀོད་དགོས་པའི་དབང་དུ་མཛད་ཅིང་། བུ་དྲུག་གི་ཕྱི་མ་ར་སྟ་ཡིན་པས་དོར་བ་ཡིན་པར་སྙམ། འོ་ན་དེ་དག་རྣམ་ཤེས་བརྒྱད་ལ་འགོད་ཚུལ་ཇི་ལྟར་ཡིན།  མ་གཞི་བེམ་རིག་བྲལ་བའི་ཕུང་པོ་ལ་རྣམ་ཤེས་མེད་པས་དེའི་དགོངས་གཞི་ཇི་ལྟར་ཡིན་ཞེ་ན། རོ་ལ་རྣམ་ཤེས་མེད་པ་བདེན་མོད་སྔར་ལུས་ཀྱི་གནས་སམ་རྩ་ལ་དེ་འབྲེལ་གྱི་རྣམ་ཤེས་སོ་སོའི་རྟེན་བྱེད་པ་ལྟར། འདིར་ཡང་དེའི་རྫས་རྒྱུན་ལ་ཐབས་ཁྱད་པར་ཅན་རྫས་སྔགས་ཏིང་འཛིན་དང་འབྲེལ་བའི་སྒོ་ནས་སྦྱང་བྱ་སྦྱོང་ཚུལ་ཡོད་པས་དོགས་པ་མི་དགོས་ཤིང་། དེས་ན་གཞུང་གི་དགོངས་དོན་ཁྱུང་བཙུན་མུ་ལས་མཛད་པའི་འབྲུ་བཀོད། «ཡི་གེའི་གོ་བགོ་ཏིང་འཛིན་དང་ཚིག་བཤད»ཅེས་པའི་གཞུང་ལྟར་མིག་རྣ་སྣ་ལྕེའི་རྣམ་ཤེས་བཞི་ཡི་རྟེན་སྐབས་གསལ་ལྟར་དང་། ལུས་ཀྱི་རྣམ་ཤེས་ནི་སྤྱི་བོ། ཡིད་ཀྱི་རྣམ་ཤེས་ནི་མགྲིན་པ། ཉོན་ཡིད་རྣམ་ཤེས་ནི་ཐུགས་ཀ། ཀུན་གཞིའི་རྣམ་ཤེས་ནི་ཙི་ཏའི་གསང་སྒོ་བཅས་ཡིན་པར་གཞུང་དེར་བརྟགས་ན་ཤེས་ཐུབ་ཅིང་།  དེ་དག་ལའང་དཔྱད་གཞི་གཞན་པ་སྤྱི་སྤུངས་རྩ་བསྐྱེད་སྐབས།  རྣམ་ཤེས་ཚོགས་བརྒྱད་ཀྱི་རྩ་བརྒྱད་ངོས་འཛིན་ཚུལ་ལ།  ༡ མིག་རྩ། _{མིག་གཉིས་ཀྱི་དཀྱིལ།} ༢ རྣ་རྩ། _{རྣ་བ་གཉིས།} ༣ སྣ་རྩ། _{སྣ་སྦུབ་གཉིས།} ༤ ལྕེ་རྩ། _{ལྕེ་ལ།} ༥ ཚིགས་རྩ། _{ཚིགས་པ་ལྔ་པ།} ༦ གསང་རྩ། _{གློ་བའི་ངར་སོ་སྟེ་གློ་ཡུ།} ༧ གཡོན་དམར། _{སྙིང་སུལ་གསུམ་གྱི་གཡོན།} ༨ གཡས་དཀར་_{སྙིང་སུམ་གསུམ་གྱི་གཡས།} བཅས་ལ་སྦྱར་བ་འདི་དག་ལ་དཔྱད་ནའང་ཕན་ཚུན་དོད་མཚུངས་སུ་ཤེས་པར་འགྱུར་སྙ། ཡང་དེའི་གདུང་སྦྱོང་སྐབས་སུ་གསལ་བའི་ཉི་ཟླ་གཉིས་དང་དཔའ་བོ་འབྲུ་ལྔ་བཅས་ཡོད་པ་ལས།   ཉི་མ༐ _{ཕྱག་མཐིལ་གཡས།}  ཟླ་བ༐ _{ཕྱག་མཐིལ་གཡོན།} ཡཾ༐ _{ཞབས་གཡས།}  རྃ༐ _{ཞབས་གཡོན།}   ཁཾ༐ _{ཕྱག་མཐིལ་གཡས།}  སྲུྃ༐ _{ཕྱག་མཐིལ་གཡོན།} ཨ༐ _{ཐུགས་ཀའི་དང་གོང་།}  ཨཱོྃ༐ _{དཔྲལ་བ།} བཅས་བསྟན་ཡོད།

   གོང་གསལ་འབྲུ་བཀོད་ཀྱི་ལུས་གནས་གསང་དབུགས་བྱང་ཐུང་ལྟ་བུ་འགའ་ཞིག་གནས་གང་ཞིག་ཡིན་པར་གོ་དཀའ་ཙམ་ཡོད་པ་ལྟར་འདིར་སྔོན་བྱོན་མེས་པོ་གོང་མ་དག་གི་ཞལ་ཤེས་ཡི་གེར་ཕབ་པ་དཔེ་བདག་བསྟན་ཟེར་ཞུ་བ་ཅན་ཞིག་འདུག་པ་ལྟར་བཀོད་པ་ནི།  སྤྱི་གཙུག་ནི་སྐྲ་མཚམས་ནས་ཡར་སོར་ལྔའི་ཐོག  དཔྲལ་བ་ནི་སྐྲ་མཚམས་ནས་མར་ཚོན་གང་ཐོག སྨིན་མཚམས་ནི་སྐྲ་མཚམས་ནས་མར་སོར་དོའི་ཐོག  མགྲིན་པ་ནི་ཁ་ནས་མར་མཐོ་གང་མིན་ཙམ་ཨོག་མའི་ཐོག  ཐུགས་ཀྱི་དང་གོང་ནི་ཨོག་མ་ནས་མར་མཛུབ་གང་ཐོག   གསང་དབུགས་བྱང་ཐུང་ནི་ཐུགས་ཀྱི་དང་གོང་ནས་ཡར་མར་ཚོན་གང་ཐོག  དེ་ཡང་མཆོག་ལ་ཡར་དང་།  ཕལ་པ་ལ་མར་འཇལ།  ཐུགས་ཀྱི་དཀྱིལ་ནི་གསང་དབུགས་ནས་མར་སོར་དོ་ཐོག  བྱང་ཤ་སྨུག་པོ་ནི་དང་གོང་ནས་གཡས་སུ་ཚོན་གང་ཐོག  ཕོ་བ་ནི་ཐུགས་དཀྱིལ་ནས་མར་ཚོན་གང་ཐོག  རྒྱུ་མ་ནི་ལྟེ་བ་ནས་མར་ཚོན་གང་ཐོག  གསང་གནས་ནི་རྒྱུ་མ་ནས་མར་ཚོན་གང་ཐོག  གློ་བ་རྒྱབ་ལ་འགོད་དེ།   ལྟག་ཁུང་ཚིགས་པ་དང་པོ་ནས་མར་བརྩིས་པའི་ཚིགས་པ་ལྔ་པའི་ཐོག་ནས་གཡས་སུ་ཚོན་གང་ཐོག་གློ་བ་གཡས།  དེའི་གཡོན་དུ་ཚོན་གང་ཐོག་གློ་བ་གཡོན།  མཆིན་པ་ནི་གཡས་ཀྱི་གྲུ་མོ་མར་བཀུག་པའི་མཆན་ཁུང་འོག་གི་ཐད།  མཚེར་པ་ཡང་གཡོན་གྱི་གྲུ་མོ་མར་བཀུག་པའི་མཆན་ཁུང་འོག་གི་ཐད།  མཁྲིས་པ་ནི་མཆིན་པ་ནས་མར་ཚོན་གང་ཐོག  མཁལ་མ་གཡས་ནི་རྒྱབ་ཀྱི་ཚིགས་པ་བདུན་པའི་གཡས་སུ་ཚོན་གང་ཐོག མཁལ་མ་གཡོན་ཡང་དེའི་གཡོན་དུ་ཚོན་གང་ཐོག  རྐང་མཐིལ་ནི་ཕོ་ཡི་གཡས་དང་མོ་ཡི་གཡོན།  སེམས་ནི་ཐུགས་ཀྱི་དཀྱིལ།  ཁྲག་ནི་བྱང་ཤའི་ཐོག  བྱང་ཤ་ནི་མཆིན་པ་ལ་ཟེར།  རུས་ནི་གསང་གནས་སྤུ་ཡོད་མེད་མཚམས།  ཤ་མཚེར་པའི་ཐོག  དྲོད་ལྟེ་འོག་ཨ་ཤད་བསྐྱེད་ས་བཅས་སུ་ངོས་འཛིན་པ་དང་།  དེར་མ་གསལ་བ་རྣམས་ནི་སླ་བས་མ་བྲིས་སོ། །

   དེ་ཡང་གདུང་སྲེག་ཆེ་བའི་གཞུང«གཤེན་གྱི་གདུང་སྦྱོང་ཟབ་མོ་སྲེག་ཆོག་ཆེ་བ་ཡི་གེ་འཁོར་ལོ»ཞེས་པ་ལས་གསལ་བའི་འབྲུ་བཀོད་ལ།  ཡེ་ཤེས་ལྔ་ཡི་ས་བོན་འབྲུ་ལྔ་སྟེ། ཨཱོྃ༐ ཁཾ༐  ཡཾ༐  རྃ༐  མཾ༐  བཅས་དང་། རིགས་དྲུག་སྦྱོང་བྱེད་འབྲུ་དྲུག་སྟེ། ཉ༐  ད༐  ཁ༐  ཀ༐  ཧཱུྃ༐  ཨ་བཅས་བསྡོམས་པས་ཡི་གེ་བཅུ་གཅིག་བྱུང་ཞིང་། དེ་རྣམས་ལུས་གནས་གང་དང་གང་ཞིག་ལ་འགོད་དགོས་པ་ཡང་།  ཨཱོྃ༐ _{ཐུགས་ཀྱི་དཀྱིལ།}  ཁཾ༐ _{འཕྲག་པ་གཡས།}  ཡཾ༐ _{པུས་མོ་གཡས།}   རྃ༐ _{པུས་མོ་གཡོན།}  མཾ༐ _{འཕྲག་པ་གཡོན།}  ཉ༐ _{རྐང་མཐིལ་གཡས་གཡོན།} ད༐ _{ལྟེ་བ།} ཁ༐ _{ལག་མཐིལ་གཡོན།} ཀ༐ _{ཐུགས་ཀྱི་དང་གོང་།}  ཧཱུྃ༐ _{དཔྲལ་བ།} ཨ༐ _{སྤྱི་བོ།}  འདིར་གསལ་བའི་ལུས་གནས་སོ་སོའི་ངོས་འཛིན་ནི་གོང་གསལ་ལྟར་ཤེས་སླ།  ད་དུང་གཞུང་འདིའི་འབྲུ་བཀོད་མཇུག་ཏུ་འཕྲག་པ་གཡས་གཡོན་གཉིས་དང་།  སྤྱི་བོ་གསུམ་ལ་སྡོང་བུ་གསུམ་དགོས་པ་དེ་ནི་སྐུ་གསུང་ཐུགས་གསུམ་མཚོན་བྱེད་དང་།  ད་དུང་སྤྱི་བོར་དར་དཀར་ལེབ་མོ་ཞིག་བཏག་དགོས་པ་དེ་ནི་འཁོར་བའི་ལམ་སྒོ་བཅོམ་ཞིང་ཐར་པའི་ལམ་སྒོ་ཕྱེད་པའི་མཚོན་བྱེད་ཡིན་པར་གསུངས། གཞན་ཡང«ཡི་གེའི་གོ་བགོ་ཏིང་འཛིན་དང་ཚིག་བཤད»ཅེས་པ་ལས་སྤྱི་བོར་རིགས་ལྔའི་ས་བོན་དང་།  ཐུགས་ཀའི་དང་གོང་དུ་གསལ་བ་དགུ་འཛབ།   ཞབས་ལ་ངན་སོང་དོང་སྤྲུགས་སྙིང་པོ་བཅས་འགོད་པར་གསུངས་པ་ཡང་གཞུང་གི་བསྟན་དོན་ཡིན་ནོ། །ད་དུང་འབྲུ་བཀོད་ཡི་གེའི་སོ་སོའི་མཚོན་དོན་དང་དེའི་དགོས་ཆེད་སོགས་ཤེས་རྒྱུ་མང་ཡང་གཞུང་ལ་གཟིགས་ན་འཐུས་ཤིང་།  འབྲུ་བཀོད་ཀྱི་དཔེ་རིས་དང་།  དེ་དག་འབྲི་ལུགས། སྦྱར་བའི་ཐབས་ཚུལ་ཞིབ་ཕྲ་རྣམས་ཉམས་མྱོང་མཁས་པའི་ཞལ་ནས་ཤེས་པར་བསམ་སྟེ་འདིར་འགོད་པའི་ངལ་བ་མ་བྱས་སོ། །