དགེ་བཤེས་བློ་གྲོས་རབ་གསལ་ལགས་ཀྱི་ཡིག་གཟུགས།

དགེ་བཤེས་བློ་གྲོས་རབ་གསལ་ལགས་ནི། སྤྱི་ལོ་1971ལོར་ཁྱུང་ཡུལ་རྭ་ཁྲོམ་གྲོང་དུ་སྐྱེས། སྤྱི་ལོ་2002ལོར་༧སྐྱབས་རྗེ་སྨན་རི་མཁན་སློབ་རྣམ་གཉིས་དྲུང་ནས་དགེ་བའི་བཤེས་གཉེན་ཆེན་པོའི་ཕྱག་ཁྱེར་བླངས། སྤྱི་ལོ་2003 ལོར་དབྱིན་ཇིའི་མཐོ་སློབ་ཏུ་རྒྱལ་སྤྱིའི་བོད་རིག་པའི་གྲོས་ཚོགས་བཅུ་བར་ཚོགས་ཞུགས་བྱས། མུ་ཁྲི་བཙད་པོའི་ཞིབ་འཇུག་ཁང་དང་བོན་སྒོ་དུས་དེབ་ཀྱི་རྩོམ་སྒྲིག་ལས་ཀ་འགའ་སྒྲུབ་མྱོང་། སྔ་ཕྱིར་ཞང་བོད་ཚིག་མཛོད་རྩོམ་སྒྲིག་དང་། ཞང་བོད་ཀྱི་ལོ་རྒྱུས་གཙོར་བྱས་པའི་དཔྱད་རྩོམ་དེབ་གཅིག ཞང་བོད་ཡིག་གཟུགས་དུ་མའི་མ་ཕྱི་ཞེས་པ་དེབ་གཉིས་བཅས་མཁྱེན་ལྡན་རྣམ་པའི་སྤྱན་སྔར་བཤམས་སྟོན་བྱས། དེ་མིན་དུས་དེབ་སྣ་ཚོགས་ཐོག་ཞང་བོད་དང་འབྲེལ་བའི་དཔྱད་རྩོམ་དུ་མ་སྤེལ། ད་ཆར་ཁྱུང་ཡུལ་རིག་པ་འཁྲུངས་བའི་ཕ་ས་༧མེ་སྟོན་གདན་ས་མཐོང་གྲོལ་རི་ཁྲོད་དུ་དཔེ་ཁྲིད་བྱེད་ཞོར་ཞང་བོད་རིག་གནས་སོགས་ལ་ཉམས་ཞིབ་བྱེད་མུས་སུ་མཆིས།