རྫ་ཁྲོ་ཚངས་དགོན་དུ་ནང་བསྟན་ལྔ་རིག་སློབ་གླིང་གི་སྐབས་དང་པོའི་མདོ་ཡི་དམ་བཅའ་ཆེན་མོ་འཚོགས་པ།

　　སྤྱི་ལོ་༢༠༢༢ལོའི་ཟླ་བ་༡ཚེས༡༩ནས༢༠ཉིན་སྟེ་གཉིས་ཀྱི་རིང་ལ་རྫ་ཁྲོ་ཚངས་དགོན་དུ་གཡུང་དྲུང་བོན་ནང་བསྟན་ལྔ་རིག་སློབ་གླིང་གི་སྐབས་དང་པོ་མདོ་ཡི་དམ་བཅའ་ཆེན་མོ་འཚོགས་ཤིང་། སློབ་གཉེར་བ་རེ་རེའི་ངོས་ནས་སྦྱང་སྟོབས་ཀྱི་དཔྱད་སྒོ་མི་འདྲ་བ་དང་། སློབ་རིམ་གྱི་གཞུང་ཚན་མི་འདྲ་བ་སྟེ། རྗེ་བདག་ཉིད་ཆེན་པོའི་འདུལ་བ་ནས་བཟུང་སྟེ། ཀུན་མཁྱེན་ཉི་མ་བསྟན་འཛིན་གྱི་སྡུད་གྲྭའི་བར་དུ་སོ་སོའི་སྦྱང་འབྲས་ལྟར་རིག་པའི་མཆོག་འབུལ་རྒྱ་ཆེར་མཛད། ལྷག་པར་དུ་རྫ་སྨོན་རྒྱལ་དགོན་པའི་མཁན་རིན་པོ་ཆེ་པད་མ་ཚེ་དབང་གིས་དབུ་འདྲེན་འོག་རྫ་སྨོན་རྒྱལ་དགོན་དང་། རྫ་འབུམ་རྨད་དགོན། གོ་ལམ་གཡུང་དྲུང་གླིང་སོགས་ནས་རིག་ལམ་པ་ཉི་ཤུ་ལྷག་ཅིག་ཆེད་ཕེབས་གནང་ཞིང་། རྣམ་གསུམ་ཤེས་རབ་རིག་པའི་ཚལ་ཆེན་ན་དགག་སྒྲུབ་ཀྱི་རིག་ལམ་གདལ་ཏེ་བསྔགས་བརྗོད་ཀྱི་མེ་ཏོག་གཏོར་བར་བྱས་པ་སོགས་ནི་རྒྱལ་བསྟན་རིན་པོ་ཆེའི་རྒྱན་དུ་འོས་པའོ། །