བོན་བརྒྱ་རིན་པོ་ཆེ་མཆོག་གི་ཞབས་བརྟན་ལ་ཚེ་ཐར་སྲོག་བླུ་བཏང་བའི་སྐོར།

[ཟླ་ཚེས། 2015-08-24 11:34:53][རྩོམ་པ་པོ། ཁྲི་བསོད་བསྟན།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]

0.jpg

འཆི་མེད་སྟོན་མཆོག་དྲན་པ་རྗེ།། གསང་བ་འདུས་པ་ཚེ་དབང་ཞལ།། འཚེ་མེད་དཔལ་སྟེར་ཚེ་དཔག་མེད།། རྣམ་གསུམ་དབྱེར་མེད་བྱིན་ཕོབས་ཅིག།

2-1.jpg2-2.jpg

     ༄༅།། སྙིགས་དུས་ཀྱི་བསྟན་འགྲོའི་དེད་དཔོན་ཆེན་པོ་འགྲོ་བ་ལྷ་དང་བཅས་པའི་བསོད་ནམས་ཀྱི་ཞིང་མཆོག་ཏུ་གྱུར་བའི་ཡིད་བཞིན་གྱི་ནོར་བུ་གཅིག་པུ། ཕན་བདེ་ཀུན་གྱི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་འཛིན་སྐྱོངས་སྤེལ་བའི་བདག་ཉིད། བདག་ཅག་གི་དཔྲལ་བའི་མིག་དང་ཁོག་པའི་སྙིང་ལྟར་གྱུར་བའི་བཀའ་དྲིན་བཞི་རྫོགས་ཀྱི་བླ་མ་རིན་པོ་ཆེ། རྗེ་གྲུབ་ཐོབ་ཚེ་དབང་དངོས་བྱོན༧མཁས་དང་གྲུབ་པའི་གཙུག་རྒྱན་བོན་བརྒྱ་ཐམས་ཅད་མཁྱེན་པ་དགེ་ལེགས་ལྷུན་གྲུབ་རྒྱ་མཚོ་དཔལ་བཟང་པོ་མཆོག་གིས་གཤེན་བསྟན་སྤྱི་དང་ཁྱད་པར་དུ་མདོ་སྨད་བྱང་བརྒྱུད་དུ་མདོ་སྔགས་ཀྱི་བོན་བསྟན་རྒྱ་ཆེར་སྤེལ་ནས་བུ་སློབ་ནམ་མཁའི་སྐར་ཚོགས་ལྟར་གསོ་སྐྱོང་གནང་ཞིང་དགོན་སྡེ་ཉི་ཤུ་ལྷག་བཞེངས་བསྐྲུན་མཛད་དེ་རྩོད་ལྡན་འགྲོ་རྣམས་སྨིན་གྲོལ་གྱི་ལམ་ལ་བཀོད་པའི་སྐུ་དྲིན་གཞལ་མཐའ་ཡས་པས་ན།

 3-2.jpg3-1.jpg

     བོན་བརྒྱ་སྨན་རི་བཤད་སྒྲུབ་སྨིན་གྲོལ་གླིང་གི་འདུས་པ་སྤྱི་ནས། སྤྱིར་ཕན་བདེ་འབྱུང་གནས་ཀྱི་གཞི་མ་སངས་རྒྱས་གཡུང་དྲུང་བོན་གྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་བོན་བསྟན་འཛིན་པའི་རིས་མེད་སྐྱེས་མཆོག་དམ་པ་གང་ན་སུ་བཞུགས་རྣམས་ཀྱི་སྐུ་ཚེ་ལ་བགེགས་དང་བར་ཆད་ཞི་ཞིང་ཐུགས་ཀྱི་བཞེད་དགོངས་འབད་མེད་ལྷུན་འགྲུབ་ཡོང་བའི་ཕྱིར་དང་། བྱེ་བྲག་ཏུ་ཡངས་པའི་ཡུལ་གྲུ་ཀུན་ཏུ་ས་ཆུ་མེ་རླུང་གི་འབྱུང་བཞིའི་འཇིགས་པ་བྲལ་ཞིང་ནད་མུག་འཁྲུག་རྩོད་ཀྱི་བསྐལ་ངན་ཡོངས་སུ་ཞི་ནས་སྐྱེ་འགྲོ་མཐའ་དག་ཞི་བདེའི་དཔལ་ལ་ལོངས་སུ་སྤྱོད་ཐུབ་པའི་སྨོན་པ་རྒྱ་ཆེར་དང་། སྒོས་སུ་རང་ཅག་བོན་གྱི་བགོ་སྐལ་དུ་ཐོབ་པའི་༧སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་དང་སྐྱབས་རྗེ་མཚུངས་ཟླ་བྲལ་ཞིང་བཀའ་དྲིན་གཞལ་མཐའ་བྲལ་བ་བདག་ཅག་གི་དཔལ་ལྡན་རྩ་བའི་བླ་མ་རིན་པོ་ཆེ་༧བོན་བརྒྱ་དགེ་ལེགས་ལྷུན་འགྲུབ་རྒྱ་མཚོ་མཆོག་གི་སྐུ་ཚེ་རྒྱལ་མཚན་བསྐལ་བའི་མཐའ་རུ་གནས་ཤིང་བསྟན་འགྲོའི་འཕྲིན་ལས་རྒྱུན་ཆད་མེད་པར་རྩོལ་མེད་ཤུགས་འབྱུང་གིས་ལེགས་པར་འགྲུབ་པའི་ཞབས་བརྟན་དུ།

4-1.jpg4-2.jpg

      སྤྱི་ལོ་༢༠༡༥ལོའི་བོད་ཟླ་༧ཚེས༩ཉིན་རེབ་གོང་བོན་བརྒྱ་དགོན་གྱི་དམངས་གཙོ་ཨུ་ཡོན་ལྷན་ཁང་གི་མི་སྣ་དང་དགོན་པའི་ལས་སྣེ། རེབ་གོང་བོན་མང་ཕུར་ཐོགས་སྟོང་དང་དགུ་བརྒྱའི་ལས་སྣེ་འགའ་བཅས་མཚོ་ལྷོ་ཁུལ་མགོ་མང་གྲོང་བརྡལ་གྱི་བཤས་རར་སོང་ནས་ལུག་བརྒྱ་དང་བཅུ་གསུམ་ཉོས་ཏེ་སྲོག་བབླུ་བྱས། ཚེས་༡༠ཉིན་བླ་མ་ཚེ་དབང་རིག་འཛིན་སྐུ་བལྟམས་པའི་དུས་ཆེན་ཁྱད་པར་ཅན་ལ་དམིགས་ནས་རང་དགོན་གྱི་ཚོགས་ཆེན་འདུ་ཁང་དང་བོན་བརྒྱ་བླ་བྲང་རྩེ་མཆོག་གསུམ་མཆོད་པའི་ལྷ་ཁང་དུ་གྲྭ་མང་ལྷན་རྒྱས་ནས་བླ་མ་ཚེ་དབང་རིག་འཛིན་གྱི་ཆོ་གའི་གཞུང་ཚོགས་ཀྱི་མཆོད་སྤྲིན་རྒྱས་འབུལ་ཞུས། ཚེ་ཐར་སྲོག་བབླུ་བཏང་བའི་ཡུལ་གནས་སུའང་ཞོགས་པའི་ཉི་ཤར་གྱི་རྩེ་མོར་ལྷ་བསང་དང་ཇོ་དར། རླུང་རྟ་བསྐྱོན་ཏེ་ལུག་རེ་རེ་ལ་ཚེ་མདུད་སྲུང་རྟགས་འདོགས་པ་དང་ཚེ་མདོ་ཚེ་སྒྲུབ་སོགས་གསུང་སྒྲོག་ནས་ཚེ་ཐར་ལ་བཏང་། མཐར་བསྔོ་བ་སྨོན་ལམ་གྱི་རྒྱས་གདབ་པ་དང་བཅས་སྒོ་ཕྱུགས་དེ་དག་ལ་རང་དབང་གི་མཁའ་དབུགས་གསར་བ་ཞིག་བསྩལ།

5-2.jpg5-1.jpg

     དེ་ལྟར་ཚེ་ཐར་བྱས་ན་ནི་མདོ་ལས། སྲོག་གཅོད་གོང་ན་སྡིག་གཞན་མེད།། ཅེས་པ་ལྟར། མ་ཧཱ་པཎྚི་ཏ་དབྲ་སྟོན་ངག་དབང་བསྐལ་བཟང་བསྟན་པའི་རྒྱལ་མཚན་མཆོག་གི་ཞལ་སྔ་ནས། སྲོག་གཅོད་ལས་ལྷག་པའི་སྡིག་པ་མེད་པས་ན། སྲོག་མི་གཅོད་པར་ཚེ་ཐར་དུ་བཅུག་ན། དེ་ལས་ལྷག་པའི་དགེ་བའང་གཞན་མེད་ལ། ཁྱད་པར་རང་ལ་དབང་བའི་སྒོ་ཕྱུགས་རིགས་ཚེ་ཐར་དུ་བཞག་ན་ཚེ་གེགས་སེལ་བ་དང་། ཕྱི་མར་ཚེ་རིང་བར་འགྱུར་བ་སོགས་ཕན་ཡོན་མཐའ་ཡས་པ་ཡིན། ཞེས་གསུངས་པ་བཞིན་གྱི་མཐུ་ལ་བརྟེན་ནས་སྤྱིར་སངས་རྒྱས་གཡུང་དྲུང་བོན་གྱི་བསྟན་པ་དར་ཞིང་རྒྱས་པ་དང་། སྒོས་སུ་འཇིག་རྟེན་གྱི་ཁམས་འདི་ལ་ས་གཡོ་ཆུ་འཁྲུགས་ཀྱི་ཆོ་འཕྲུལ་རང་སར་ཞི་ནས་སྐྱེ་འགྲོ་ཀུན་ལ་བདེ་སྐྱིད་ལྡན་པ། ལྷག་པར་བཀའ་དྲིན་སུམ་ལྡན་གྱི་རྩ་བླ་རིན་པོ་ཆེ་བོན་བརྒྱ་དགེ་ལེགས་ལྷུན་འགྲུབ་རྒྱ་མཚོ་མཆོག་གི་སྐུ་ཚེ་ཞབས་པད་ཡུན་ནས་ཡུན་ཏུ་བརྟན་པའི་སྐྱབས་ཞུ་མཛད་བཞིན་པ་བཅས་ཀྱི་གནས་བསྡུས་མཚམས་སྦྱོར་ཙམ་མོ།།

6-1.jpg7-2.jpg

སྐུ་ཚ་གཡུང་དྲུང་དབང་རྒྱལ་དང་རླངས་ཚང་ནམ་མཁའ་གཉིས་ནས་པར་རིས་མཁོ་འདོན་གནང་།

 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།