གླང་ཆེན་ཁ་འབབ་སྟོད་རྒྱུད་དུ་གནའ་བོའི་ཞང་ཞུང་རིག་གནས་ཀྱི་རིམ་མཐོའི་བང་སོ་རྙེད་པ།

[ཟླ་ཚེས། 2014-11-05 09:35:24][རྩོམ་པ་པོ། རིན་སྤུངས་པས་བསྡུས།][རྩོམ་ཁུངས། མཚོ་སྔོན་པོ་དྲ་བ།][ཀློག་གྲངས། ]

གླང་ཆེན་ཁ་འབབ་ཀྱི་སྟོད་རྒྱུད་དུ་ཞང་ཞུང་རིག་གནས་ཀྱི་རིམ་མཐོའི་བང་སོ་རྙེད་པ།
1.jpg

   2014ལོའི་སྤྱི་ཟླ6~9བར། ཀྲུང་གོའི་སྤྱི་ཚོགས་ཚན་རིག་ཁང་གི་གནའ་རྫས་རྟོག་ཞིབ་ཞིབ་འཇུག་ཁང་དང་བོད་རང་སྐྱོང་ལྗོངས་རིག་དངོས་སྲུང་སྐྱོབ་ཞིབ་འཇུག་ཁང་གཉིས་ནས་མཉམ་འབྲེལ་གྱིས་བོད་ལྗོངས་མངའ་རིས་གླང་ཆེན་ཁ་འབབ་ཀྱི་སྟོད་རྒྱུད་དུ་གནའ་རྫས་རྐོ་འཚོལ་གྱི་ལས་ཀ་བསྒྲུབས་པར། ཞང་ཞུང་རྒྱལ་རབས་སྐབས་ཀྱི་བང་སོ་ཡོད་པའི་ཡུལ་གཉིས་ནས་ས་དུར་གཅིག་དང་དོང་དུར་ལྔ་རྙེད་ཅིང་། དེ་ལས་རིག་དངོས་རྩ་ཆེན་འགའ་ལག་སོན་བྱུང་བས། གནའ་བོའི་ཞང་ཞུང་རིག་གནས་བསྐྱར་གསོ་ཞིབ་འཇུག་ལ་དཔྱད་གཞི་གལ་ཆེན་དུ་འདོན་སྤྲོད་གནང་ཡོད་པ་རེད།

2.jpg
རྫ་མ་ཚོན་རིས་ཅན།

   མངའ་རིས་ཁུལ་གྱི་སྒར་རྫོང་གི་གུ་རུ་གྱམ་དང་རྩ་མདའ་རྫོང་གི་མཁར་ནུབ་ཀྱི་གླང་ཆེན་ཁ་འབབ་ལྷོ་འགྲམ་དུ་གནའ་བོའི་བང་སོའི་རིགས་མི་འདྲ་བ་གཉིས་ཙམ་རྙེད་ཅིང་། དེ་ལས་ཤིང་གི་དུར་སྒམ་དང་གསེར་གྱི་ཞལ་འབག ཟངས་དང་ལྕགས། ཤིང་གི་ཡོ་ཆས་སོགས་བཏོན་པ་མ་ཟད། དོང་དུར་ལྔ་ལས་གྲུ་བཞི་ནར་མོའི་དུར་སྒམ་དང་། རྫ་མ་ཆེ་ཆུང་སྣ་ཚོགས། རྟ་དང་ལུག་སོགས་སྲོག་ཆགས་ཀྱི་རུས་པ་མང་པོ། མི་རུས་ཆ་ཚང་དང་གཤིན་རྫས་མང་པོ་བཅུག་ཡོད། མ་ཟད་ཤིང་གི་སོ་མང་དང་ཟངས་ཀྱི་མེ་ལོང་ཡུ་བ་ཅན། པང་གཅལ་ཚོན་རིས་ཅན། ཁལ་འཐག་ཡོ་ཆས། རྫ་མ་ཚོན་རིས་ཅན། མཆོང་སོགས་མང་པོ་བྱུང་།

3.jpg
མཆོང་གི་མགུལ་རྒྱན།

   རྩ་མདའ་རྫོང་གི་བང་སོ་ནས་རྙེད་སོན་བྱུང་བའི་གཞི་གྲངསC14ལྟར་ན། བང་སོ་དེ་རིགས་ནི་ལོ་ངོ1800ཡས་མས་སུ་བྱུང་བར་འདོད་ཅིང་། དུས་སྐབས་དེ་ནི་ཞང་ཞུང་རྒྱལ་རབས་དར་རྒྱས་ཆེ་བའི་སྐབས་ཡིན་ལ། གླང་ཆེན་ཁ་འབབ་ཀྱི་སྟོད་རྒྱུད་ནི་གནའ་བོའི་ཞང་ཞུང་གི་དབང་སྒྱུར་ལྟེ་གནས་ཡིན་པས། གཤིན་པོ་དེ་ཞང་ཞུང་གི་སྐུ་དྲག་ཅིག་ཡིན་ཤས་ཆེ་ཞེས་དཔྱད་བརྗོད་གནང་འདུག དེ་རིགས་ཀྱིས་ང་ཚོས་གནའ་བོའི་ཞང་ཞུང་གི་སྤྱི་ཚོགས་འཚོ་བའི་རྣམ་པ་དང་། མངའ་རིས་གུ་གེ་རྒྱལ་རབས་སྐབས་ཀྱི་གནའ་ཤུལ་གྱི་འདྲ་ས་དང་ཉེ་འབྲེལ་ས་ཁུལ་དག་གི་རིག་གནས་དང་འཚོ་བ། ཁོར་ཡུག སྡོད་གནས། ཡུལ་སྲོལ་སོགས་རིག་གནས་སྣ་མང་ཅན་ལ་ཞིབ་འཇུག་གནང་བའི་དཔྱད་གཞི་གལ་ཆེན་ཞིག་འདོན་སྤྲོད་གནང་ཡོད་པ་རེད།

 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།