ལོ་ངོ་སྟོང་གི་བོན་གྱི་བྲག་བརྐོས་རི་མོ་གསར་རྙེད་བྱུང་བ།

   ཉེ་ཆར། རྒྱལ་རོང་ཆུ་ཆེན་རྫོང་ནས་བོན་པོའི་བྲག་རྐོས་རི་མོ་ཚོ་གཅིག་རྙེད་ཡོད། ང་རང་རྒྱལ་གྱི་ཆོས་ལུགས་གནའ་རྫས་རྟོག་ཞིབ་པ་མཁས་ཅན་ཝུན་ཡུས་ཁྲེང་དང་ཀྲུང་དབྱང་མི་རིགས་སློབ་གླིང་གི་དགེ་རྒན་ཆེན་མོ། བོད་ཁུལ་གྱི་བྲག་རྐོས་རི་མོ་རྟོག་ཞིབ་པ་མཁས་ཅན་ཀྲང་ཡྰ་སྭ་རྣམ་གཉིས་དང་ལྷན་དུ་ཆུ་ཆེན་རྫོང་གི་བྲག་རྐོས་རི་མོ་རྟོག་ཞིབ་བྱེད་དུ་ཕྱིན།

   བྲག་རྐོས་རི་མོ་དེ་དག་ནི་རྔ་བ་ཁུལ་ཆུ་ཆེན་རྫོང་ཐོག་ནས་སྤྱི་ལེ་གསུམ་ཙམ་ལས་མེད་པའི་ལི་ཝེལ་ས་ཆ་རུ་འདུག གཡས་གཡོན་གཉིས་ཀྱི་བྲག་ངོས་སུ་བོན་གྱི་བླ་མ་ཡི་དམ་དང་། མཁའ་འགྲོ་ཆོས་སྐྱོང་། ལྷ་དང་ཀླུ། ད་དུང་བྱ་དང་གཅན་གཟན། ཤིང་དང་ཆུ་བོ། བུམ་པ་དང་དུང་དཀར་སོགས་བརྐོས་འདུག ཅའོ་ཧྲུའུ་རྣམ་གཉིས་ཀྱིས་རི་མོ་དེ་དག་དུས་རབས་བཅུ་གཅིག་པ་ནས་བཅུ་གཉིས་པ་ཙམ་གྱི་ལོ་རྒྱུས་ཡོད་པའི་བསམ་ཚུལ་བཏོན། དོན་དངོས་དེ་འདྲ་ཡིན་མིན་བོད་རང་གི་རི་མོ་མཁས་ཅན་དང་བོན་གྱི་ལོ་རྒྱུས་ལ་ཆ་རྒྱུས་ཆེ་བའི་མཁས་དབང་ཚོས་བརྟག་དཔྱད་གནང་ན་ཧ་ཅང་འགྲིག་སྙམ།

   ས་གནས་དེ་ལ་ཆ་རྒྱུས་ཆེ་བའི་བོན་པོའི་མཆོག་སྤྲུལ་བསྟན་པའི་རྒྱལ་མཚན་གྱིས་གསུང་རྒྱུར། རབ་བརྟན་ཡུལ་གྱི་ལོ་རྒྱུས་དང་བྲག་རྐོས་རི་མོ་དག་གི་མཚོན་དོན་སོགས་ལ་བལྟས་ན་གནས་འདི་ནི་མ་རྒྱུད་དང་གསང་གཅོད་ཀྱི་གནས་རི་ཞིག་ལ་ངོས་བཟུང་ན་ཤིན་ཏུ་འགྲིག་པར་མ་ཟད། རབ་བརྟན་དྲུང་ཡིག་མགོན་པོ་ཐར་གྱིས་ཁོང་གི་ལག་ཏུ་སྤྲད་པའི་རྒྱལ་རོང་ལོ་རྒྱུས་དང་ས་ཁྲ་སོགས་ལ་བལྟས་ན། གནས་འདི་ནི་ལི་ཝེལ་དུར་ཁྲོད་ཞེས་གསལ་པོར་བཀོད་འདུག མ་ཚད་པར་ཁྱུང་ལུང་དྲན་པ་ནམ་མཁའ་དང་འོད་ལྡན་འབར་མ་སོགས་གནས་འདིར་ཕེབས་ཏེ་གནས་སྒོ་ཕྱེ་བ་གསལ་ལ། དྲན་པ་ནམ་མཁའ་རྒྱལ་རོང་ཕེབས་པའི་གནས་ཚུལ་སོགས་ནི་རྒྱལ་རོང་དམུ་རྡོའི་བསང་མཆོད་དང་ཡུལ་ལྷའི་བསང་མཆོད་སོགས་སུ་གསལ་པོར་བཀོད་འདུག་གསུངས། གནས་འདི་ནི་རྒྱལ་རོང་གནས་ཆེན་དམུ་རྡོ་དང་། མཐའ་བཞི་ན་གནས་རི་ཆེན་པོ་བཞི། དེའི་མཐའ་ན་གནས་འབྲིང་བརྒྱད། དེའི་མཐའ་ན་གནས་ཕྲན་དྲུག་ཅུ་རྩ་གཉིས་ཡོད་པའི་ནང་གསེས་གནས་འབྲིང་བརྒྱད་ཡོད་པའི་ནང་གི་གཅིག་རེད། གནས་ཡིག་དང་ལོ་རྒྱུས་ཡིག་ཚང་ལྟར་ན་རྒྱལ་རོང་བྱ་རུ་གཙུག་ལྡན་ཞེས་པའི་གནས་ཡིན་པར་ཡང་གསལ།

   ས་གནས་དེའི་བླ་མ་འཇམ་དབྱངས་དང་མཆོག་སྤྲུལ་ནམ་མཁའ་ཚུལ་ཁྲིམས་སོགས་ཀྱིས་གསུངས་པ་ལྟར་ན། གནས་འདི་ནི་བོན་པོའི་མ་རྒྱུད་གསང་མཆོག་མཐར་ཐུག་གི་གནས་ཡིན་པ་དང་བྲག་རྐོས་རི་མོའི་ཐོག་གནས་བརྒྱད་སྲུང་བའི་མཁའ་འགྲོ་དང་ས་འདུལ་གྱི་མཆོད་རྟེན། དབལ་གཤེན་བརྒྱད། མེ་བརྒྱད། ཤིང་བརྒྱད། ཆུ་བརྒྱད། གཅན་བརྒྱད་སོགས་ཀྱི་རི་མོ་བརྐོས་ཡོད་པ་དང་། ད་དུང་བྲག་རྐོས་ལྷ་རིས་འོག་གི་མཚན་བྱང་ཡི་གེ་རུ་བོན་གྱི་སྟོན་པ་འཆི་མེད་གཙུག་ཕུད་དང་། ལི་ཤུ་སྟག་རིང་། རྨེ་སྟོན་རི་ཁྲོད་པ། བོན་ཞིག་ཁྱུང་ནག ཁྲོ་ཚང་འབྲུག་ལྷ་སོགས་མ་རྒྱུད་སྐོར་གྱི་དཀྱིལ་འཁོར་ལ་སྐུ་གཟུགས་དང་མཚན་བྱང་གསལ་པོ་བཀོད་ཡོད་པས་བོན་གྱི་རྫོགས་པ་ཆེན་པོའི་གནས་ཆེན་ཞིག་ཡིན་པའི་ར་སྤྲོད་གནང་།

 ད་དུང་བོན་གྱི་བསྟན་པ་སྐྱོང་བའི་བདག་མོ་ཡེ་ཤེས་དབལ་མོའི་འདྲ་གཟུགས་དང་གཟུངས་སྔགས་ཀྱང་བརྐོས་འདུག རང་གི་ལྟ་ཚུལ་ལ། རི་མོ་འདི་དུས་རབས་གཅིག་གི་ནང་བརྐོས་པ་ཞིག་ཡིན་མིན་ལ་ཐེ་ཚོམ་ཅུང་འདུག སྒྲུབ་ཕུག་གཡས་གཡོན་སུ་བརྐོས་མ་དེ་དག་གི་ལྟ་སྐུའི་འོག་ཏུ་མཚན་བྱང་ཁ་གསལ་པོ་བརྐོས་ཡོད་པས་བོན་པོའི་མ་རྒྱུད་སྐོར་གྱི་ལྷ་ཡིན་མིན་ལ་ཐེ་ཚོམ་གཏན་ནས་ཟ་མི་དགོས། འོན་ཏེ་མཚན་བྱང་གི་ཡིག་གཟུགས་ལ་བལྟས་ན་བསྟན་པ་ཕྱི་དར་རྗེས་སུ་བརྐོས་པ་འདྲ་ཞིང་། གོང་མ་ཆན་ལུང་གིས་རྒྱལ་རོང་དབང་དུ་མ་བསྡུས་སྔོན་དུ་བརྐོས་པ་ཞིག་ཡིན་ངེས་ལགས་སྙམ། ད་དུང་ཁྱད་མཚར་བའི་གནས་ཚུལ་ཞིག་ནི་བོན་བོའི་བསྟན་པ་སྐྱོང་བའི་བདག་མོ་ཞེས་མཚན་དུ་གསོལ་བའི་ཡེ་ཤེས་དབལ་མོའི་འདྲ་གཟུགས་དང་གཟུངས་སྔགས་སོགས་བྲག་ལ་གསལ་པོར་བརྐོས་འདུག འོན་ཏེ་དེའི་འདྲ་གཟུགས་དང་ད་ལྟའི་ཡེ་ཤེས་དབལ་མོའི་འདྲ་གཟུགས་བར་འགྱུར་བ་ཆེན་པོ་བྱུང་འདུག་པའི་ཐོག་ནས་བརྟག་ན་བྲག་བརྐོས་རི་མོ་འདི་དག་དུས་རབས་གཅིག་ཏུ་བྱུང་བ་ཞིག་ཡེ་ནས་མི་འདྲའོ།། གཞན་ཡང་བེེ་རོ་ཙ་ནའི་རྡོ་རྐོས་འོག་ཏུ་གཡུང་དྲུང་བོན་གྱི་བསྟན་པ། རྒྱལ་ཚབ་བེེ་རོ་ཙ་ན། གནས་འདིར་བྱིན་གྱི་རླབས་ཤིག་ཤེས་བཀོད་འདུག་པ་འདི་ལ་བརྟག་ན་དོན་དུ་བེེ་རོ་ཙ་ནས་རྒྱལ་རོང་དུ་བན་དེའི་བསྟན་པ་སྐྱོང་ངམ་བོན་གྱི་བསྟན་པ་སྐྱོང་ཡོད། རྒྱལ་རོང་ཡུལ་གྱི་རྫོགས་པ་ཆེན་པོའི་བྲག་རྐོས་རི་མོས་རྙིང་མའི་རྫོགས་པ་ཆེན་པོ་དང་བོན་པོའི་རྫོགས་པ་ཆེན་པོ་མི་འདྲ་ས་གང་ཞིག་ཡོད་པ་སོགས་ཀྱི་འདྲི་ཚིག་ཞིག་མང་པོ་ཞིག་ཀྱང་མི་འགོད་རང་འགོད་དུ་གྱུར་འདུག་སྙམ།

(དཀོན་མཆོག་རྡོ་རྗེས་བྲིས་ཤིང་པར་བླངས།)