གདུང་རབས་གསུམ་པ་ཤེས་རབ་རྒྱལ་མཚན་གྱི་ལྕམ་གཅོང་མོ་ལ་སྲས་བསོད་ནམས་སེང་གེ་དང་། དེ་འོག་རྒྱལ་མཚན་རྩེ། མ་གཅིག་ལ་བསོད་ནམས་དབང་ཕྱུག་གསུམ་ཡོད།   གདུང་རབས་བཞི་པ་བསོད་ནམས་སེང་གེ་ལ་སྲས་དྲུག་ཡོད་པའི་གོ་ན་བཟའ་ལ་སྲས་ཆེ་བ་རྒྱལ་མཚན་འབུམ་དང་ཆུང་བ་ཨ་འབེས་གཉིས།  ལྕམ་རོང་མོ་བཟའ་ལ་སྲས་ཆེ་བ་གྲགས་པ་འབུམ།  ཆུང་བ་ནང་པ་ཀུན་དགའ་རྒྱལ་མཚན་གཉིས། རོང་མོ་གཅིག་ལ་སྲས་འོད་ཟེར་སེང་གེ་དང་ཨ་རྩེ་བཟའ་ལ་རྣམ་འཇོམས་སྐྱབས་བཅས་འཁྲུངས།  
   གདུང་རབས་ལྔ་པ་གྲགས་པ་འབུམ་གྱི་སྲས་གཞིར་བཟའ་ཨ་སྐྱིད་ལ་གྲགས་པ་འོད་ཟེར་རམ་ཨ་གྲགས།  དེ་འོག་གྲགས་པ་དབང་ཕྱུག   ཆུང་བ་ཁྱུང་རྒོད་ཡེ་ཤེས་རྒྱལ་མཚན་གསུམ་འཁྲུངས།  ཁྱུང་རྒོད་ཡེ་ཤེས་རྒྱལ་མཚན་རྨེའུ་སྟོན་པའི་སྐྱེས་ཕྲེང་ཡིན་པས་སྐུ་ཚེ་གོང་བོར་ཐོས་བསམ་སྒོམ་གསུམ་གྱི་ཉམས་ལེན་གནང་ནས་འགྲོ་དྲུག་སེམས་ཅན་བརྩེ་བ་ཆེན་པོས་སྐྱོང་ཞིང་བསྟན་དོན་མཐར་ཕྱིན། གདུང་རབས་དྲུག་པ་ཨ་གྲགས་ཀྱི་སྲས་རོང་མོ་མཚོ་ལ་གེ་འབུམ། ནང་སོ་གཡུང་དྲུང་ཡེ་ཤེས། གདུང་རབས་བདུན་པ་གེ་འབུམ་གྱི་སྲས་སྟག་ལུང་དབང་མོ་ལ། འབུམ་རྗེ་གྲགས་པ་དང་། ནང་སོ་གཡུང་དྲུང་རྒྱལ་མཚན་གཉིས།  འབུམ་རྗེ་གྲགས་པ་ནི།  དཔོན་ལ་འབུམ་རྗེ། ས་ལ་འབུམ་མཚོ་ཞེས་སྒར་ཁང་ཚང་གི་འབྲོག་ས་འབུམ་མཚོ་ནང་ལ་སྐུ་འཁྲུངས་པས་འབུམ་རྗེ་གྲགས་པ་ཞེས་སུ་ཐོགས་པར་བཤད། སྒར་ཁང་ཚང་གི་བླ་དཔོན་གཤེགས་སྐབས་གདུང་ས་དེར་འདེབས་སྲོལ་ཡོད།  ད་ལྟ་མཐོང་ཡུལ་དུ་བང་སོ་དེལ་འབུར་ཉི་ཤུ་ལྷག་འདུག འབུམ་རྗེ་གྲགས་པ་ཁོང་གིས་ཕྱོགས་བཞིར་དམག་གིས་ལས་བྱས་པས། “ན་དམར་མཚོ་ཁ་ཕྱིན་ཆད།  འབྲི་འདམ་བྱང་ཡུལ་ཚུན་ཆད།  དངུལ་ཆུ་གསེར་ལྡན་ཡན་ཆད། ས་མི་འགྱུར་རྫོང་གཞི་བཅོ་བརྒྱད་བཞག”ཅེས་གསུང་པས་རྫོང་བཅོ་བརྒྱད་ནི། “སྤུ་ཡི་དཀར་མོ་འབུམ་རྫོང་། ༡ གསེར་མདོ་སྔོན་མོ་གཡུ་རྫོང་། ༢ སྟག་སྡེ་སྟག་རྫོང་ཁྲ་མོ། ༣ རྨ་རོང་ནག་རྫོང་མདའ་མཁར། ༤ མོང་རྩེ་གད་མཁར་སྐྱ་བོ། ༥ ར་སྐྱེས་སྲིན་པོའི་མཁར་རྫོང། ༦ གཟིག་ལུང་ཚེར་མཁར་ཟངས་རིང་། ༧ གྲིབ་གདོང་མཁར་ནག་ཡོལ་བ། ༨ སྒོ་རའི་དམར་འཁྱིལ་མ་རྫོང། ༩ ཝེར་རྫོང་སྦི་ལི་ཞབས་མཁར། ༡༠ ཆུ་འབུམ་རྟ་བྲང་ཆེ་རྫོང་། ༡༡ དགུ་ཡ་འབྲས་ཀྱི་ཐུན་རྫོང་། ༡༢ སྟོད་ན་དཔོན་པོ་སེང་གེ་རྫོང་དང་། ༡༣ སྨད་ན་གཡོག་མོ་ཁྲུ་ད་རྫོང་། ༡༤ བར་ན་བློན་པོ་སྐྱ་ག་རྫོང་། ༡༥ ངེད་ཁྱིམ་ཤྭ་བ་ཡུ་མོ་རྫོང་། ༡༦ ཐོད་ལ་སྟག་མོ་ངར་བ་རྫོང་། ༡༧ རི་དམར་མེ་རི་འབར་བ་རྫོང་དང” ༡༨ཞེས་དང་།     གདུང་རབས་བཅུ་གཉིས་པ་ལྷུན་གྲུབ་གྲགས་པ་ལ་ལྕམ་ཧོར་མོ་ཞིག་ཕུལ་དེ་ལ་སྲས་གཙོ་མཆོག་གྲགས་པ། རྣམ་དག་རྒྱལ་མཚན་གཉིས་སྒར་ཁང་ལ་བཞུགས། འབྲོང་བཟའ་ལ་གྲགས་པ་རྣམ་རྒྱལ་དང་གྲགས་པ་རྣམ་སྲས་གཉིས་བྱ་ཟེར་བཞུགས།      རྩེ་དྲུག་སྒྲུབ་ཁང་ནང་དུ་ལོ་གཉིས་རིང་སྟག་སླག་ཅན་གྱི་གཏེར་མ་དྲག་སྔགས་དབལ་མོ་བསྙེན་བསྒྲུབ་མཛད་དེ་གྲུབ་རྟགས་ཐོན་པ་བྱུང་།  དེ་རྗེས་རི་དགོན་སྡེ་གསུམ་གྱི་རེ་བ་བཞིན་ལོ་རྒྱུས་ཐོག་གི་སྒར་ཁང་བླ་སྡེ་ཡོངས་ཀྱི་འདུལ་བའི་མ་དགོན་ཕུག་ལེབ་དབུ་མ་སྟག་རྩེ་བསྐྱར་བཞེངས་གནང་སྒང་ཡིན།  གདུང་རབས་ཉེར་གཉིས་པ་ཚེ་དབང་མཆོག་གྲགས་ཀྱི་ལྕམ་ཧོར་གཙང་བཟའ་རིན་ཆེན་དར་མཚོ་ལ་སྲས་རྒྱལ་མཚན་གྲགས་པ་དང་རིག་འཛིན་འབྲུག་གྲགས་གཉིས་བཅས་ད་ལྟའི་བར་དུ་ཁྱུང་སེར་སྒར་ཁང་བླ་བྲང་གི་གདུང་རབས་ཟམ་མ་ཆད་པ་གནས་པའི་བྱུང་བ་མདོར་ཙམ་བརྗོད་པ་འདི། དབྲ་རིགས་ཁྱུང་སེར་གྱི་གདུང་ལས་འཁྲུངས་པའི་སྐྱབས་རྗེ་གཡུང་དྲུང་མགོན་པོ་རིན་པོ་ཆེའི་བཀའ་ཡིས་བསྐུལ་མ་ལ་བརྟེན་ནས།   ཁྱུང་པོ་བླ་ཆུང་བློ་གྲོས་རྒྱལ་མཚན་གྱིས་མཛད་པའི་<<ཁྱུང་པོའི་ལོ་རྒྱུས་དཀར་ཆབ་ཆེན་མོ>>དང་། ཁྱུང་པོ་གཡུ་ཁྲིས་མཛད་པའི་<<མ་ཡིག་གཡུ་མགོ་མ>> <<ཁྱུང་པོའི་གདུང་རབས་གསེར་སྒམ་མ>> <<མ་ཡིག་གུང་སྔོན་མ>>སོགས་ཡོངས་སུ་གྲགས་པའི་ཁྱུང་རབས་ཚད་ལྡན་དག་གོ་བསྡུར་ཐེངས་མང་བྱས་ཐོག་རྒན་རབས་ཤེས་ཆེན་འགའ་བཀའ་འདྲི་ལན་མང་ཞུས་ནས། རྣམ་དཔྱོད་ཀྱི་ཤེས་རབ་མི་ཆེ་ནའང་བསམ་བློ་རྣམ་པར་དག་པའི་ཀུན་ནས་སློང་སྟེ། དེ་སྔོན་ལོ་རྒྱུས་ལས་གདུང་རབས་ཁ་མ་གསལ་བ་དང་འཁྲུགས་པ་གོ་རིམ་བསྡེབས་པ་སོགས་འཕྲི་སྣོན་ཅུང་ཙམ་བགྱིས་ཤིང་དངོས་ཡོད་ཀྱི་བྱུང་བ་མདོར་བསྡུས་སུ། ཁྱུང་སེར་རྒྱལ་པོའི་མངའ་ཁམས་སུ་དལ་རྟེན་རྙེད་ཅིང་ཤེལ་ལེ་རྒྱ་སྐར་གླིང་གི་དགེ་བཤེས་ཀྱི་གྲལ་མཐར་འཛིན་པ་རྨ་རོང་ཁྲི་གཙུག་རྒྱལ་མཚན་འབོད་པ་དེས་སྤྱི་ལོ་༢༠༢༡ལོའི་ཟླ༤པའི་ཚེས༢༨ཉིན་གུ་གེར་མཇུག་རྫོགས་པར་ཧྲུན་པའོ།།

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།