ནང་བཅུད་འགྲོ་བའི་གྲོལ་ཚུལ་བཤད་པ།

[ཟླ་ཚེས། 2015-08-05 18:15:28][རྩོམ་པ་པོ། ཡོངས་འཛིན་དཔོན་སློབ་བསྟན་འཛིན་རྣམ་དག][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]

IMGP3315.jpg

     སྤྱིར་འགྲོ་བ་མི་ཡི་གྲོལ་ཚུལ་བསྟན་པ་ནི། རྫོགས་པའི་སངས་རྒྱས་ཀྱི་སྐྱེས་རབས་རྣམ་ཐར་རྒྱས་པ་དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་ལས། བདག་ཅག་གི་སྟོན་པ་སངས་རྒྱས་ཀྱིས་སྲས་ལུང་འདྲེན་གསལ་བ་ལ་གསུངས་པ། སྲས་སྤྲུལ་མདོ་༼ཇ་ཤ༢༡༩ཕ༡༽སྣོད་དང་བཅུད་གཉིས་སྲིད་ཚུལ་ལ། །སྣོད་ནི་འབྱུང་བ་ལྔ་ལས་ཆགས། །འབྱུང་བ་རིམ་ལྔ་མས་ཡར་བརྩེགས། །བཅུད་ནི་སྲིད་པ་དག་ལས་བྱུང་། །འོད་གསལ་ལྷ་ལས་ཡས་མར་གྲོལ། །ཞེས་དང་། བོན་ཉིད་བདེ་བ་ཆེན་པོའི་གནས། །མ་རྟོགས་སེམས་ཅན་ལས་ཀྱིས་འཁྲུལ། །ལས་ཀྱི་མ་རིག་རྐྱེན་དབང་ཅན། །རང་དབང་མ་རྟོགས་གཞན་དབང་གྱུར། །མ་རིག་ཉོན་མོངས་དུག་ལྔ་ཡི། །ཁམས་གསུམ་འཁོར་བའི་རྒྱུར་གྱུར་ནས། །སྡུག་བསྔལ་ཉོན་མོངས་སྦྱངས་པ་ལ། །དབྱིངས་དང་ཡེ་ཤེས་ཐུགས་རྗེ་ཡིས། །སེམས་ཅན་ཐར་པར་དྲངས་པའི་ཕྱིར། །སྣོད་བཅུད་ཐུགས་རྗེས་སྲིད་ནས་སུ། །འགྲོ་བ་འདྲེན་པའི་དཔལ་གྱུར་ཏེ། །ཞེས་དང་། མ་རིག་རྨོངས་པར་གྱུར་པ་ལ། །རིག་པའི་ཡེ་ཤེས་བསྐྱེད་པའི་ཕྱིར། །ཡེ་སྲིད་འཕྲུལ་གྱི་རྒྱལ་པོ་ཡིས། །རྒྱུར་མཐུན་སྲིད་པ་བསྐྱེད་པར་མཛད། །དབྱིངས་ནས་ཐུགས་རྗེ་འབྱུང་བའི་གནས། །དབྱིངས་ཉིད་ཀུན་ཏུ་བཟང་པོ་ཡིས། །མ་གཡོས་བོན་ཉིད་དབྱིངས་ཆེན་ལས། །གཡོ་བའི་ཡེ་ཤེས་འོད་ལྔ་ཤར། །འོད་ལྔ་རང་བཞིན་མཁའ་ལ་གསལ། །མཁའ་གསལ་བོན་ཉིད་ལྷུན་ལ་རྫོགས། ། རྫོགས་སྐུ་ཚོན་གང་ངོ་བོ་སྲིད། །ཞེས་དང་། དེ་ལ་ཡེ་སྲིད་རྒྱལ་པོ་ཡིས། །སངས་པོ་འབུམ་ཁྲི་ཞེས་སུ་བཏགས། །ཞེས་དང་། འགྲོ་བ་གང་ལ་གང་འདུལ་གྱི། །ཐུགས་རྗེ་ཐབས་དང་ལྡན་པའི་ཕྱིར། །སངས་པོ་འབུམ་ཁྲི་སྤྲུལ་པའི་ཡབ། །འོད་ལྔའི་སྙིང་པོ་ཀློང་དུ་འདྲིལ། །ཀློང་དུ་འབྱུང་བའི་ཡུམ་དུ་བསྐྱེད། །དབྱལ་གྱི་མོ་བཙུན་བཟང་མོ་ལ། །ཞེས་དང་། དེ་ལ་ཡེ་སྲིད་རྒྱལ་པོ་ཡིས། །མ་མ་གུང་ཁྲི་ཁྲི་མ་གསལ། །སྲིད་པའི་རྒྱལ་མོ་ཞེས་སུ་བཏགས། །ཞེས་དང་། འཁོར་བའི་སེམས་ཅན་དོན་མཛད་ཕྱིར། །རང་བཞིན་མཁའ་གསལ་ཕོ་བྲང་གི །ལོངས་སྤྱོད་རྫོགས་སྐུའི་ཞིང་ཁམས་སུ། །རྫོགས་སྐུ་གཤེན་ལྷ་འོད་དཀར་དང་། ། ཐབས་དང་ཐུགས་རྗེ་འབྲེལ་བར་བཞུགས། །ཞེས་དང་། སངས་པོ་ཡབ་ཀྱི་སྤྲུལ་པ་ལས། །ཐབས་ཀྱི་སྤྲུལ་པ་སྣ་ཚོགས་བསྟན། །སྲིད་པ་ཡུམ་གྱི་སྤྲུལ་པ་ཡི། ། ཤེས་རབ་རྫུ་འཕྲུལ་སྣ་ཚོགས་བསྟན། །ཐབས་དང་ཤེས་རབ་སྤྲུལ་པ་ལས། །ལྷ་གཤེན་སྲིད་པའི་ཐུགས་རྗེ་ཡིས། །འགྲོ་བ་ཐར་པར་དྲངས་པ་དང་། །སྣོད་བཅུད་སྟོང་པའི་རང་བཞིན་ལ། །མེད་ལ་ཡོད་པར་སྲིད་པ་དང་། །སྟོང་ལ་གང་བར་སྲིད་པ་དང་། ། སོགས་ནས། ཐབས་ཆེན་སྲིད་པ་སྡེ་བཅུ་ཡིས། །འགྲོ་བ་ཁ་ལོ་བསྒྱུར་བའི་ཕྱིར། །ཡེ་སངས་སྲིད་པའི་གནས་མཆོག་ཏུ། །ཐབས་མཆོག་སྲིད་པ་འབུམ་ཁྲི་དང་། །སྲིད་པའི་རྒྱལ་མོ་བྱ་བར་སྤྲུལ། །མཁའ་ཀློང་ཡངས་པའི་བར་སྣང་ལ། །གནམ་གྱི་ལྷ་རྒོད་ཐོག་པ་དང་། །འགྲན་གྱི་ཟླ་མེད་བྱ་བར་སྤྲུལ། །རྫུ་འཕྲུལ་ཀློང་གི་ས་གཞི་ལ། །སངས་པོ་འབུམ་ཁྲི་བྱ་བ་དང་། ། ཆུ་ལྕམ་རྒྱལ་མོ་བྱ་བར་སྤྲུལ། །ནམ་མཁའ་སྟོང་པའི་དབྱིངས་རུམ་དུ། །ཁྲི་བཞི་ནམ་ཏིང་བྱ་བ་དང་། ། ཐུགས་རྗེ་བྱམས་མ་བྱ་བར་སྤྲུལ། །བཅུ་གསུམ་དགུང་གི་ཡང་ཐོག་ཏུ། །ཤེལ་ཝེར་སྤུག་གེ་ཆེན་པོ་དང་། ། འོད་ཀྱི་ལྷ་མོ་བྱ་བར་སྤྲུལ། །མཁའ་གསལ་འོད་ཀྱི་གཞལ་ཡས་སུ། །ཇོ་བོ་རླུང་འདབ་བྱ་བ་དང་། །ཇོ་མ་གནམ་ཕྱི་བྱ་བར་སྤྲུལ། །བསྐལ་པ་འཁོར་བའི་འཇིག་རྟེན་ན། །ཁྲི་རྒྱལ་ཁུག་པ་བྱ་བ་དང་། །བསྐོས་པ་ཏིང་ནམ་བྱ་བར་སྤྲུལ། །ཀུན་ཁྱབ་ནམ་མཁའི་དབྱིངས་རུམ་ན། །ཡོངས་ལ་ཁྱབ་པ་བྱ་བ་དང་། ། འཕྲུལ་གྱི་རྒྱལ་པོ་བྱ་བར་སྤྲུལ། །ཡོངས་འདུས་ཤིང་གི་རྩེ་མོ་ན། །འཕྲུལ་གཤེན་སྣང་ལྡན་བྱ་བ་དང་། ། བཟང་ཟ་རིང་བཙུན་བྱ་བར་སྤྲུལ། །གླིང་བཞི་མེ་ཏོག་མཛེས་སྟེང་ན། །ཡེ་སྨོན་རྒྱལ་པོ་བྱ་བ་དང་། །རྫུ་འཕྲུལ་ལྷ་མོ་བྱ་བར་སྤྲུལ། །དེ་ལྟར་ཡེ་སྲིད་རྒྱལ་པོ་དང་། །ཡེ་སྲིད་འཕྲུལ་གྱི་རྒྱལ་མོ་ལ། །དུས་དང་གནས་སྐབས་སྲིད་པ་ཡི། །བླ་དྭགས་ཚིག་གི་མཚན་བཅུར་བཏགས། །སྲིད་པ་ཡབ་ཡུམ་དེ་གཉིས་ཀྱི། ། སྲིད་པ་དེ་གཉིས་སྤྲུལ་པ་ལས། །ཡོད་མེད་དགེ་སྡིག་སྲིད་པ་སྟེ། །མུན་དང་སྣང་གི་སྲིད་པ་ལ། །མུན་ལ་མེད་ཁམས་རྒྱལ་མོ་སྲིད། །སྣང་ལ་སྣང་བ་འོད་ལྡན་སྲིད། །དེ་ལས་དགེ་དང་སྡིག་ཏུ་སྲིད། །དེ་ལས་དཀར་དང་ནག་ཏུ་སྲིད། །འོད་རླུང་ནག་པོའི་སྤྲུལ་པ་ལས། །མེད་ཁམས་གདུག་པའི་རྒྱུ་འབྲས་སྲིད། ། འོད་རླུང་དཀར་པོའི་སྤྲུལ་པ་ལས། །ཡོད་ཁམས་དཀར་པོའི་སྤྲུལ་པ་ཆགས། །ཞེས་དང་། སྲིད་པའི་མཛོད་ཕུགས་ལས། ལྡེབ༦༽ རྒྱུ་ལྔའི་བཅུད་ལས་སྒོང་གཉིས་སྲིད། །དཀར་ནི་འོད་དང་ཟེར་ལས་བརྡོལ། །ཡོད་ཁམས་སྲིད་པའི་རྒྱལ་པོར་གསལ། ། ནག་ནི་མུན་དང་འཐིབས་ལས་བརྡོལ། །མེད་ཁམས་སྟོང་པའི་རྒྱལ་མོར་གསལ། །མེད་པར་དགའ་བ་ཡོད་མི་སྦྱོར། །ཚངས་པ་ཡབ་ནི་སྲིད་ལ་སྦྱོར། །ཀློང་ན་གཡུ་མཚོ་སྔོན་མོར་སྲིད། །མཚོ་དབུས་དབྱལ་མོ་གཅིག་སྲིད་པ། །ཆུ་ལྕམ་རྒྱལ་མོ་སྲིད་པའི་ཡུམ། ། སངས་པོ་ཆུ་ལྕམ་གཉིས་སྲིད་པས། །མིང་དགུ་སྲིང་དགུ་བཅོ་བརྒྱད་འཁྲུངས། །སྤྲུལ་པ་དགུ་གཉིས་བཅོ་བརྒྱད་འགྱེད། །ཅེས་དང་། མེད་ཁམས་སྟོང་པའི་རྒྱལ་མོ་དང་། །མུན་ནག་འཐིབས་ཀྱི་བཙུན་མོ་བཤོས། །ལྷ་སྲིན་མིང་སྲིང་བཅུ་དྲུག་བྱུང་། །ཞེས་གསུངས་པ་ལྟར། ནང་བཅུད་སྒོ་ང་དཀར་ནག་གཉིས་ལས་རིགས་དྲུག་གྲོལ་ཚུལ་བཤད།
     གཞན་ཡང་བླ་ཆེན་དྲན་པས་མཛད་པའི་མཛོད་སྒྲ་འགྲེལ་ལས། ལྡེབ༦༢༽ནས། དམུ་ཡད་ཀྱི་ལྷ་བཅོ་བརྒྱད་དེ། རྟ་ལྷ་དམར་པོ། གཡག་ལྷ་དུམ་པོ། བ་ལྷ་བཞོན་མོ། ལུག་ལྷ་གསང་པོ། ར་ལྷ་འཚེར་པོ། ཞེས་སོགས་དང་། ཡང་དེའི་འཕྲོ་ནས་ལྡེབ༦༤༽ནས། ལྟོ་འཕྱེ་ནམ་བུ་ཐུང་དང་བཤོས། །བུ་དགུ་གཅན་བཞི་བཅུ་གསུམ་བྱུང་། །ཞེས་པ། སྟག་བུ་གཟིག་བུ་གཉིས། དོམ་བུ་དྲེད་བུ་གཉིས། འཕར་བུ་སྤྱང་བུ་གཉིས། དབྱི་བུ་གསའ་བུ་གཉིས། ཝ་མོ་ཚེའུ་སེར་དང་དགུའོ། །གཅན་བཞི་ནི། བྱ་གཅན་ཁྲ། བྱི་གཅན་ཟེ།༼སྲེ་མོ།༽ཉ་གཅན་སྲམ། ཀླུ་གཅན་ཁྱུང་དང་བཞིའོ། །ཞེས་སོགས་ནས་ལྟས་ངན་མིང་སྲིང་དགུ། ལྷ་བདུད་མིང་སྲིང་ལྔ། ཡུལ་གདོན་མིང་སྲིང་དགུ། ཀླུ་བདུད་མིང་སྲིང་ལྔ། ས་བདག་མིང་སྲིང་དགུ། ས་སྲིན་ལྕམ་དྲལ་ལྔ། ཐེའུ་རང་སྤུན་དགུ། བྱུར་དང་མི་ལ་མིང་སྲིང་ལྔ་ལས་སོགས་པས་མི་དང་མི་མ་ཡིན་དང་། དུད་འགྲོའི་རིགས་གྲོལ་ཚུལ་བསྟན།
     མདོ་དྲི་མེད་ཇ་༢༢༤༽ ལས། དེ་ནས་འགྲོ་བ་དྲངས་པའི་ཕྱིར། །ལྷ་དང་གཤེན་དང་སྲིད་པ་གསུམ། །འགྲོ་བ་དྲངས་ཕྱིར་རིམ་པར་བྱོན། །སྲིད་པ་བར་དུ་སྲིད་པ་ལ། །སྲས་ནི་ཕོ་དགུ་མོ་དགུ་དང་། ། དབོན་ནི་ཕོ་མོ་བཅོ་བརྒྱད་དེ། །ཁམས་ནི་སུམ་ཅུ་སོ་དྲུག་དང་། །སྟེང་ན་ལྷ་གར་རྟེན་གསུམ་དང་། ། འདོད་ཁམས་གཟུགས་ཁམས་གཟུགས་མེད་ཁམས། ། གར་ནི་མཐུ་སྟོབས་སྤྲུལ་པ་ཡི། །དབལ་གསས་དགུ་ཁྲི་དགུ་འབུམ་དང་། །བདར་གསས་ཉིས་ཁྲི་ཆིག་སྟོང་དང་། །འཐོར་གསས་སུམ་བརྒྱ་དྲུག་ཅུ་དང་། ། དབལ་མོ་ཉིས་ཁྲི་བདུན་འབུམ་སྟེ། །རྟེན་ནི་ཕྱྭ་སྲིད་སྐོས་གསུམ་དང་། །གིང་ཆེན་སྲིད་རྗེ་འབྲང་དཀར་དང་། །མ་ཧ་ཕྱྭ་རྗེ་རིང་དཀར་དང་། །སྐོས་པ་སྐོས་རྗེ་འབྲང་དཀར་ཏེ། །ལྷ་གར་རྟེན་དང་གསུམ་དུ་སྲིད། །བར་ན་མི་སྨྲ་གཤེན་གསུམ་སྟེ། །མི་ནི་ལྷ་ལས་མི་རུ་གྲོལ། །ཁྲི་བཞི་རྒྱལ་ལས་འགྲོ་བ་སྟེ། །དང་པོ་ལག་ན་གཞོང་ཐོགས་དང་། །ཕོར་ཐོག་བྲེ་ཐོག་ཕུལ་ཐོག་སྟེ། །ཤེད་ཅན་༼ གླིང་བཞིའི་མིའི་རྩ། ༽ཤེད་བདག་ཤེད་བུ་དང་། །ཤེད་ལས་བསྐྱེད་པ་འཁོར་ལོ་བསྒྱུར། ། གཡུང་དྲུང་ཁྱིམ་བདུན་དྲུམ་ཤིང་བཅུད། ། མེ་ཏོག་སྦུབས་གནས་མི་ལས་སོགས། །རི་རབ་བང་རིམ་གནས་པ་དང་། །གླིང་བཞི་རི་བདུན་མི་རྣམས་སྲིད། ། སྨྲ་ནི་མི་འམ་ཅི་ལ་སྟེ། །ལྗོན་པ་སྐྱེས་དྲུག་ཏིང་ཙུག་དང་། །མགོ་བརྙན་ཅན་ལས་སོགས་པ་སྟེ། །གླིང་ཕྲན་བརྒྱད་དུ་གནས་པར་སྲིད། །གཤེན་ནི་འགྲོ་བའི་དོན་མཛད་དེ། །རང་བཞིན་མཁའ་ལ་བྱོན་པ་དང་། །རྫུ་འཕྲུལ་ཀློང་དུ་བསྐྱེད་པ་དང་། །ཐུགས་རྗེ་ཐབས་ཀྱིས་སྤྲུལ་པ་སྟེ། །འགྲོ་བ་འདྲེན་པའི་དོན་ཆེད་དུ། །ཕྱྭ་གཤེན་འཕྲུལ་གཤེན་སྲིད་གཤེན་དང་། །སྣང་གཤེན་གྲུབ་གཤེན་གྲོལ་གཤེན་དང་། །འགྲོ་བའི་དོན་མཛད་གཤེན་དུ་སྲིད། །འོག་ན་འདྲེ་སྲིན་བྱུར་གསུམ་སྟེ། །འདྲེ་ནི་ལྷ་ལ་འགྲན་དུ་ཚོལ། །སྲིན་ནི་མི་ལ་བདུད་དུ་ཆེ། །བྱུར་ནི་གཤེན་ལ་བར་ཆོད་རྩོམ། ། ལྷ་མིན་ལྷ་རུ་བརྫུ་བ་དང་། །མི་མིན་མི་རུ་བརྫུ་བ་དང་། །ཕན་དང་གནོད་པའི་རང་བཞིན་ཅན། ། དབལ་ཡོག་ཁྲིན་དང་གཉེར་འོལ་མཚམས། །དམུ་བདུད་བཙན་དང་སྲིད་སྐོས་ཕྱྭ། །ལྷ་སྡང་བདུད་དུ་འབེབ་པ་སྟེ། །ཟླ་ཉི་སྐར་དང་སྤྲིན་གཞའ་དལ། །ཟེར་དང་ལོ་རྫི་མཁའ་ལ་རྒྱུ། །ཀླུ་གཉན་རྒྱལ་དང་སྨན་གཟེད་སྲིད། །འདྲེ་སྲིན་བྱུར་དང་གཤིན་རྗེ་ཆུད། །དྲི་ཟ་གནོད་སྦྱིན་ཀླུ་དབང་དང་། །གདུག་པ་ཞེ་ངན་ས་བདག་ཚོགས། །གདུག་རྩུབ་ལྷ་མིན་སྡེ་རུ་སྲིད། ། ཞེས་གསུངས་པས། དེ་ལ་ཁ་ཅིག་ན་རེ། གོང་གི་གཡེན་སྡེ་རྣམས་མེད་དེ། མིས་མ་མཐོང་ངོ་ཞེས་སོགས་ཟེར་ན། དེ་ནི་རིགས་ཀྱི་དབང་གིས་བསྐལ་དོན་དུ་སོང་བ་ཡིན་པས། མིས་མ་མཐོང་ན་མེད་པས་མ་ཁྱབ་བོ།།
     གཞན་ཡང་འདི་འདྲ་སྨྲ་བས། ཚད་མ་མངོན་སུམ་གཅིག་པུར་འདོད་པའི་ལུགས་སོ། །ལུང་འདི་རྣམས་ཀྱི་བརྗོད་དོན་དང་བསྟུན་ནས། སེམས་ཅན་སྤྱི་མཐུན་གྱི་ལས་ཀྱི་དབང་གིས་རིགས་དྲུག་གི་འགྲོ་བ་བྱུང་ཞིང་། དེ་ཡང་ཕྱི་རོལ་པའི་འདོད་པ་ལྟར་གྱི་འཇིག་རྟེན་བྱེད་པོས་བྱས་འདོད་པའི་ལོག་རྟོག་ལྡོག་པའི་ཆེད་དུ་དྲང་ངེས་གཉིས་ཀྱི་ལམ་བཟང་ལ་བརྟེན་ན། ཕ་རོལ་པོའི་འདོད་པ་དང་མཐུན་པ་ལྟ་བུའི་དྲང་དོན་སྣོད་བཅུད་ཀྱི་བཀོད་པ་ཐ་སྙད་ཙམ་དུ་སྲིད་པའི་རྐྱེན་ལ་བརྟེན་ནས་བྱུང་བ་ལྟར་བཤད་ནས། ངེས་དོན་དུ་རང་དབང་གིས་གྲུབ་པའི་བྱེད་པོ་མེད་པས་སྤྱི་ཁེགས་པས་བྱེ་བྲག་ཤུགས་ལ་ཁེགས་པ་ཡིན་པས་ནང་སྲིད་པས་སྣོད་བཅུད་ཀྱི་བཀོད་པ་སྤྲོས། ལྷ་ཆེན་གཤེན་ལྷའི་ཐུགས་རྗེ་ལ་བརྟེན་མཆོག་གི་སྤྲུལ་སྐུ་རྣམ་འདྲེན་བརྒྱ་བའི་མགོན་པོ་སྤྲུལ། བདེར་གཤེགས་དེ་རྣམས་ཀྱི་གནས་ལུགས་དང་སྐྱེ་གནས་འཇིག་པ་ཐམས་ཅད་རང་བཞིན་རྣམ་དག་གི་ཆར་གྱུར་པའི་ངོ་བོ་ཉིད་སྐུ་ལས་འདས་ས་མེད་པས། དེ་ལ་དབྱིངས་ཀྱི་ཡུམ་ས་ཏྲིག་ཨེར་སངས་ཞེས་བརྗོད་པས་དོན་ལ་འགྲོ་བའི་ཚེ་ཡི་དམིགས་རེ་ལ་ལྷ་མོ་ལྷ་ཆེན་སྲིད་པ་གཤེན་རབ་བཅས་བཞི་རེ་ངེས་པར་འབྱུང་བ་ཡིན་ནོ།།
འོ་ན་མདོ་ལས། སྟོན་པའི་རང་བཞིན་དཀོན་ན་བཙུན། །བསྟན་པ་གཅིག་ལ་སྟོན་པ་གཅིག །གླིང་བཞི་གཅིག་ལ་ཉི་མ་གཅིག །ཞེས་གསུངས་པས་དེ་མི་འཐད་ཟེར་ན། དེ་ཡང་བསྟན་པ་གཅིག་གི་ཆེད་དུ་བྱ་བའི་གདུལ་བྱ་བསྟན་པ་དེ། སྟོན་པའི་སངས་རྒྱས་གཅིག་ལས་དུ་མ་མི་དགོས་ཞེས་པའི་དོན་ཡིན་ནོ། །དེ་ལྟར་མ་ཡིན། མཚན་མདོ་དང་། བསྐལ་བཟང་སོགས་ལུང་རྣམ་དག་མིན་པར་འགྱུར་རོ། ། རང་གི་གཞུང་ཁུངས་མ་འདི་རྣམས་ཀྱི་རྗེས་སུ་འབྲེང་ནས་ནང་བཅུད་ཀྱི་འགྲོ་བའི་བྱུང་ཚུལ་འདི་ལྟར་བཤད་པ་ཡིན་ལ། གཞན་ཡང་དེང་དུས་སུ་དར་ཁྱབ་ཆེ་བའི་དུར་ས་བསློགས་ནས་རྙེད་པའི་རས་དུམ་ལྷུ་བསྒྲིགས་པ་ལས་མཐོང་བའི་འདྲ་མིན་གྱི་དུད་འགྲོའི་གཟུགས་ལས་རིམ་བཞིན་གནམ་ལ་འཕུར་དགུ། ས་ལ་འཛུལ་བཅུ། བར་ལ་འགྲིམས་དགུ། སྤྲ་སྤྲེལ་ལས་མི་ཡི་འགྲོ་བ་བྱུང་ཚུལ་སོགས་བཤད་པ་མཐོང་མོད། དེ་ལྟར་ན་དེང་དུས་དེ་ལྟར་མི་འགྱུར་བའི་རྒྱུ་རྐྱེན་གང་མ་ཚང་ཞེས་འདྲིའོ། །ཁྱེད་རང་ལ་ཡང་དེ་ལྟ་མཚུངས་སོ་ཟེར་ན། དེ་མི་མཚུངས་ཏེ། ས་བོན་གྱིས་མྱུ་གུ་ལན་གཅིག་བསྐྱེད་ཟིན་པའི་འོག་ཏུ་སླར་མི་བསྐྱེད་དེ་དགོས་པ་མེད་པའི་ཕྱིར། དེ་བཞིན་དུ་བདེ་བར་གཤེགས་པའི་ཐུགས་རྗེ་མ་འགག་པ་ལ་བརྟེན། ནང་བཅུད་ཀྱི་འགྲོ་བའི་སོན་གཞི་ལན་གཅིག་སྤྲུལ་པའི་འོག་ཏུ་སླར་དེའི་བྱ་བ་ལ་མི་འཇུག་སྟེ། དགོས་པ་མེད་པའི་ཕྱིར་རོ། །གཞན་ཡང་འདིའི་སྐོར་རྣམ་གྲངས་མང་པོ་ཞིག གཡུང་དྲུང་བོན་གྱི་བསྟན་འབྱུང་མཁས་དབང་དཔལ་ཚུལ་གྱིས་མཛད་པའི་ལྡེབ ༨༣༢༽ནས་གསལ་ལོ།།

《འབེལ་གཏམ་ལུང་གི་སྙིང་པོ》ལས་ཚན་བཤུས་བྱས།
2012ལོའི་«ཞང་བོད་ཞིབ་འཇུག»སྤྱི་དེབ་དང་པོ་ལས་དྲངས།

 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།