གཤེན་སྲས་རིན་པོ་ཆེའི་མཛད་རྣམ་རྒྱལ་གཤེན་དགྱེས་པའི་མཆོད་སྤྲིན།

[ཟླ་ཚེས། 2018-11-07 21:33:03][རྩོམ་པ་པོ། གཤེན་བཙུན་ཉི་མ་འོད་ཟེར།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]


༄༅། །༢༠༡༩ལོའི་བར་གྱི་དམུ་རིགས་གཤེན་གྱི་གདུང་ལས་ད་ལྟའི་གཤེན་ཡབ་སྲས་ཡུམ་དང་བཅས་པའི་མཛད་རྣམ་མདོར་བསྡུས་རྒྱལ་གཤེན་དགྱེས་པའི་མཆོད་སྤྲིན།

  སྤྱིར་ལོ་རྒྱུས་ཐོག་ཡོངས་གྲགས་སུ་གདུང་རྒྱུད་ཆེ་དྲུག་ཡོད་པའི་ནང་ནས་དམུ་རིགས་གཤེན་ལྷའི་གདུང་རྒྱུད་ནི། བསྟན་འབྱུང་ལྷ་རྒྱུད་འཕྲེང་བ་ལས། དེ་ཡང་རྒྱལ་རིགས་གཤེན་གྱི་གདུང་རབས་ཀྱི་རྩ་བ། བསྐལ་པ་བཟང་པོའི་སངས་རྒྱས་སྟོང་རྩ་གཉིས་སམ་སྟོང་རྩ་བརྒྱད་བྱོན་རབས་དང་འབྲེལ་དགོས། ཞེས་གསུངས་པ་ལྟར། དང་ཐོག་བསྐལ་སྟོང་སངས་རྒྱས་བྱོན་ཚུལ་དང་སྲིད་པའི་གྲོལ་ཚུལ་སོགས་བརྒྱུད་དེ་བདག་བཅག་གི་སྟོན་པ་རྣམ་འདྲེན་བརྒྱད་པ་ཡང་དག་པར་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་ནས་ད་ལྟའི་སྐུ་འཚོ་བཞུགས་གཤེན་སྲས་ནོར་བུ་དབང་རྒྱལ་ཡན་ལ་རྒྱུད་པའི་ཟམ་མ་ཆད་པར་ལོ་རྒྱུས་ཐོག་ཏུ་མཚན་རིམ་གསལ་བ་རྣམས་ལ་གཞིག་ཚེ། གདུང་རབས་བརྒྱད་བཅུ་གྱ་དྲུག་ཙམ་སོང་བའི་ནང་རྣམ་འདྲེན་བླ་ཆེན་སྐྱེས་བུ་དམ་པ་བརྒྱ་དང་བརྒྱད་བཅུ་གྱ་བརྒྱད་ཙམ་སོང་བ་ནི་གསལ་བར་ཤེས་ཐུབ། དེའི་ནང་ཚན་གཤེན་འཛམ་གླིང་རིན་པོ་ཆེར་གཤེན་གྱི་བླ་བསྟོད་ནོར་འཕྲེང་ནང་ཁྱུང་སློབ་ཚུལ་རྒྱན་པས་གསོལ་འདེབས་འདི་ལྟར་གསུངས་ཏེ།

ཨེ་མ་ཧོ། ཀུན་བཟང་ཐུགས་སྤྲུལ་དྲན་པ་ནམ་མཁའི་སྐུ། །

སྙིགས་དུས་འགྲོ་བའི་མགོན་དུ་རྗེས་བརྩེའི་གར། །

དམུ་གཤེན་འཛ༵མ་གླིང༵་བསྟ༵ན་པ༵འི་ཉི་མ༵་ལ། །

གསོལ་བ་འདེབས་སོ་བདག་རྒྱུད་བྱིན་གྱིས་རློབས། །

  ཞེས་གསུངས་སོ། འཛམ་གླིང་རིན་པོ་ཆེ་བར་ཐ་ཇི་འགིར་དཔོན་འོག་གུང་པ་ཚང་དུ་མཆོད་ཡོན་གྱི་འབྲེལ་བ་ཆེ་ཞིང་ལུང་བསྟན་དག་དང་བསྟུན་ཏེ། གུང་པའི་སྲས་མོ་གཡང་ཆེན་ལྕམ་དུ་བཞེས་ནས་སྲས་ཐུགས་རྗེ་ཉི་མ་ངོ་མཚར་གྱི་རྟགས་དང་བཅས་སྐུ་འཁྲུངས། དེ་ཡི་དགུང་སྙིང་མེ་ཡོས་སྤྱི་ལོ་༡༩༢༧ཡིན། རྒྱལ་བ་ཉི་མའི་དབང་པོའམ་ཉི་མ་འབུམ་གསལ་ནི། བླ་བསྟོད་ནོར་འཕྲེང་ལས། ཨེ་མ་ཧོ། རྒྱལ་ཀུན་རང་གཟུགས་ཚེ་དབང་ཐུགས་དབྱིངས་ནས། བསྟན་འགྲོར་རྗེས་བརྩེའི་ཉི་མ་འབུམ་གསལ་ཞིང་། སྨིན་གྲོལ་ཟབ་མོའི་པད་ཚལ་རྒྱས་པའི་གཉེན། དམུ་གཤེན་བླ་མའི་ཞབས་ལ་གསོལ་བ་འདེབས།ཞེས་གསལ། ཁོང་ཡང་སྐུ་ན་ཆུང་ངུའི་དུས་ནས་བྱིས་པ་གཞན་དང་མི་འདྲ་བར་བློ་རིག་གསལ་ཞིང་ཁྱད་དུ་འཕགས་པའི་མངོན་རྟགས་དུ་མ་དང་ལྡན་པར་གསུང་། ནར་བསོན་དུས་ཀྲེ་བ་རུ་ཡར་ཕེབས་ཏེ་ཡབ་སྲས་མཇལ་ཕྲད་དང་ལྷན་བཞུགས་ཡུན་རིང་ཙམ་གནང་རྗེས་བར་ཐ་འཁྲུངས་ཡུལ་ལ་ཕེབས་། ཡབ་སྟོད་གངས་རི་སོགས་ལ་གནས་གཟིགས་ཕེབས་ཏེ་གདན་སར་འབྱོར། དེ་ནས་རིན་པོ་ཆེ་ཁོང་དགུང་ལོ་ཆེ་བར་བརྟེན་ཁོང་གིས་ཕྱག་ཡིག་དང་། གྲྭ་པ་དང་མི་ཆེན་བཏང་ཏེ་སྲས་ཐུགས་རྗེ་ཉི་མ་ཁྱེད་གདུང་འཛིན་སྐྱོང་ནས་གདན་སར་བཞུགས་དགོས་ལུགས་སོགས་ཀྱི་ཞུ་ནན་བྱས་ཀྱང་མ་ཕེབས་པར་ཇི་འགེར་དཔོན་གྱི་བུ་མོའི་མཉམ་དུ་བཞུགས་ཏེ་སྲས་གཅིག་བྱུང་ཡང་སྐུ་ན་ཆུང་དུས་ནས་གྲོངས། ཁོང་རྣམས་གདན་སར་ཡར་ལོག་ནས་འཛམ་གླིང་རིན་པོ་ཆེ་ལ་ཡར་ཞུ་བྱས། དེ་ནས་དུས་མི་རིང་བར་ཡབ་ཞིང་དུ་གཤེགས་པ་ཐོས་ནས། ཁོང་གི་ཐུགས་དགོངས་ལ་རྒྱལ་བ་གཤེན་གྱི་གདན་ས་མ་སྐྱོང་ན་མི་ཡོང་དགོངས་ནས་གདན་ས་དར་སྡིངས་སུ་ཕེབས་རྒྱུའི་དགོང་བསམ་ཞེས་པར་བརྟེན་དེ་ནས་ཁོང་གདུང་ལོ་ཉི་ཤུའི་ནང་ཕེབས་དུས་གཤེན་གྱི་ཕོ་བྲང་དུ་གདན་ཞུས་གནང་། གོང་མའི་ཁྲིར་མངའ་གསོལ། སྐུ་ཟླ་མཐོང་སྨོན་ཁུལ་ནས་ཡིན་པ་དབུ་མཛད་ལྷ་བའི་བུ་མོ་བསྟན་འཛིན་མཚོ་རྒྱལ་ལྕམ་དུ་བསུས། དེ་ལ་སྲས་ནོར་བུ་དབང་རྒྱལ་འཁྲུངས། དེ་ནས་ཁོང་གིས་གཤེན་ཚང་དགོན་པར་དེ་སྔོན་ཉམས་རྒུད་སོང་བའི་ཁང་པ་རྣམས་བཟོ་བཅོས་ལེགས་པར་མཛད་ནས་དགུ་གཏོར་སྐབས་བཀའ་དབང་དང་། གར་འཆམ་ཐེངས་གཅིག་གནང་བའི་སྐལ་པ་བཟང་པོ་བྱུང་བ་དང་། དེ་ནས་ཁོང་བསྟན་དང་འགྲོ་བའི་ཆད་དུ་སོག་སྡེའི་རྒྱད་ལ་གདུལ་བྱར་ཕེབས་སྐབས་སྤྱང་ནག་བླ་མ་མཐས་ཡས་རྒྱ་མཚོ་ཁོང་དང་མཇལ་འཛོམས་ཐོག་གཤེན་ཐུགས་རྗེ་ཉི་མ་ཁོང་གིས་མ་འོངས་མངོན་གཟིགས་མང་པོ་གསུང་ནས། གཤེན་ཚང་གི་རྟེན་རྩ་ཆེན་རྣམས་ཉེ་འཁོར་ཞབས་ཕྱི་བ་སྤུན་གུང་པ་ཆོས་ལྡན་ལ་ཁྱེད་རང་རྟེན་འདི་རྣམས་ཕྱི་བལྟ་མེད་པར་རང་ཡུལ་དུ་གདན་དྲོངས་ལ་སོང་། མ་འོང་རྗེས་མཇུག་རྣམས་ཀྱི་རྟེན་སྐལ་ཡིན་གསུང་ནས་འཕྲལ་མར་རང་ཡུལ་ལ་བཏང་གནང་། རྟེན་དེ་རྣམས་ད་ལྟ་གཤེན་ཚང་བླ་བྲང་ལ་བཞུགས་ཡོད། ང་ཡི་གདན་སར་བུ་སྤྲེལ་ལོ་བ་ཞིག་ཡོད་པ་དེ་མཐའ་ཡས་རིན་པོ་ཆེ་ཁྱེད་ཀྱིས་མི་གྲལ་ལྷ་གྲལ་ཡོང་བ་མཛད་རོགས་གསུང་ནས། མངོན་ཤེས་ཀྱི་རྩལ་སྟོབས་ཆེ་བའི་རྒྱལ་བ་གཤེན་གྱི་གདུང་འཛིན་ཉི་མ་འབུམ་གསལ་ལམ་ཐུགས་རྗེ་ཉི་མ་ཁོང་ནི་མཐར་སོག་ཡུལ་བྱང་ཆུང་མ་ཞེས་རྒྱལ་མོ་དངུལ་ཆུའི་ཆུ་ཕུད་ཞྭ་དམར་སྟག་རྩེ་དགྲ་འདུལ་གྱི་གཡོན་ཟུར། ལུང་ཡག་བྲག་ཁྲི་ཁར་གནས་ལ་དགོངས་པ་བོན་དབྱིངས་སུ་རྫོགས། ས་འདིར་སྐྱང་འཕགས་བླ་མ་མཐའ་ཡས་རིན་པོ་ཆེས་གཙོས་བླ་གྲྭ་རྣམས་ཀྱིས་སྐུ་གདུང་ཞུགས་འབུལ་མཛད། དེང་དུས་ཀྱང་ཡུལ་མི་རྣམས་ལ་གདུང་རུས་དང་རིང་བསྲེལ་སྙེད་རྒྱུ་ཡོད་འདུག་དེའི་སྲས་ནོར་བུ་དབང་རྒྱལ་མཆོག་ནི།

གཤེན་རབ་ཀུན་གྱི་མཆོག་གྱུར་ཐོད་དཀར་སྲ༵ས། །

སྲ༵ས་མཆོག་དེ་ཡི་བརྒྱུད་འཛིན་དབྱིག་གི་ནོར་། །

ནོར་བུ་ཀུན་ལས་རྣམ་རྒྱལ་དམུ་རིགས་བུ༵། །

བུ༵་རྒྱུད་དྲི་བྲལ་སྲིད་གསུམ་ཡོངས་ལ་དབ༵ང་། །

དབ༵ང་འགྱུར་འཁོར་ལོས་ཉོན་མོངས་ཀུན་ལས་རྒྱ༵ལ། །

རྒྱ༵ལ་བསྟན་ཉིན་མོར་བྱེད་ལ་མཆོད་ཅིང་བསྟོད། །

  དམུ་རིགས་གཤེན་གྱི་བསྟན་པའི་བདག་ཉིད་ད་ལྟའི་སྐུ་འཚོ་བཞུགས་ཀྱི་སྐྱབས་རྗེ་དམ་པ་གཤེན་སྲས་རིན་པོ་ཆེ་སྤྲུལ་སྐུ་ཉི་ཟླ་དབང་གྲགས་མཚན་ནམ་ནོར་བུ་དབང་རྒྱལ་མཆོག་ནི། རིགས་སྲས་དམ་པ་རྒྱལ་བའི་མྱུ་གུ་སྟེ། མཆོག་ཉིད་ཀྱི་ཕྱི་ནང་གསང་གསུམ་གྱི་རྣམ་ཐར་བསམ་གྱི་མི་ཁྱབ་པ་རྣམས། བདག་འདྲའི་སོ་སྐྱེ་ཕལ་པ་ཞིག་གིས་དཔྱོད་ཡུལ་གཏན་ནས་མིན་ནའང་། སྐྱབས་རྗེ་བླ་མ་དམ་པ་འདི་ཡིས་བསྟན་འགྲོའི་ཆེད་དུ་རླབས་ཆེན་གྱི་མཛད་འཕྲིན་རྒྱ་ཆེན་བསྐྱངས་པ་ལས་ཐུན་མོང་ཕྱི་ཡི་རྣམ་ཐར་སྐོར་ཞིག་གུས་པས་བསྐུལ་བར་བརྟེན། ཁོང་ཉིད་ཀྱིས་གསུང་གི་བཀའ་བསྩལ་གནང་བ་གཞིར་བཟུང་ནས་སྒྲོ་སྐུར་སོགས་ཀྱི་མ་ལྷད་པར་དྲང་བརྗོད་ཀྱི་ལམ་ནས་ཕྱི་རབས་པ་རྣམས་ལ་གསོལ་འདེབས་སམ་བཀའ་དྲིན་རྗེས་དྲན་གྱི། རྟེན་དུ་ལོ་རིམ་གྱི་སྒོ་ནས་ཆུ་བོའི་ཞུར་རྒྱུན་བཞིན་རྣམ་ཐར་མདོར་བསྡུས་ཤིག་འགོད་པར་བྱ་བ་ལ་སྤྲོ་བ་སྐྱེས། དེ་ཡང་གང་ཉིད་ཀྱི་འཁྲུངས་ཡུལ་ནི། ལུང་ལས། རྒྱལ་བ་གཤེན་གྱི་གདུང་འཛིན་དུ། གཤེན་སྲས་ནོར་དབང་བྱ་བ་འབྱུང་། ཅེས་གསུངས་པ་ལྟར་སྔོན་རབས་དུས་སུ་བོན་གྱི་འདུ་གནས་སོ་བདུན་དུ་གྲངས་པའི་ནང་ཚན་ཕྲིན་ལས་འགྲོ་འདུལ་སྤྲུལ་པའི་གནས། སྒྲུབ་སྡེ་སོ་བདུན་གྱི་ཡ་གྱལ་རི་བོ་གླང་ཆེན་འགྱིང་འདྲའི་གནས་ཀྱི་མདུན་རོལ་དུ་བརྗིད་ཆགས་ཉམས་དགའི་གནས་ཆེན་གསེར་སྒོ་ཁྲ་མོའི་འདབས་སུ་ཞྭ་དཀར་གཡུང་དྲུང་བོན་གྱི་བསྟན་པའི་མངའ་བདག་བདག་ཅག་གི་རྣམ་འདྲེན་རྫོགས་པའི་སངས་རྒྱས་ཀྱི་གདུང་རྒྱུད་འཁྲུལ་བ་མེད་པ་གསེར་གྱི་ཉག་ཐག་ལ་རིན་པོ་ཆེའི་ཕྲེང་བ་བརྒྱུས་པ་ལྟར་གནས་པའི་བྱིན་རླབས་ཀྱི་ཚན་ཁ་མ་ཉམས་པར་རིས་མེད་འགྲོ་བ་ཡོངས་ཀྱི་སྐྱབས་མགོན་གཡུང་དྲུང་བོན་གྱི། བསྟན་པའི་མངའ་བདག་རྒྱལ་བ་སྲས་དང་བཅས་པའི་རྣམ་རོལ་རྒྱུན་མ་ཆད་པར་འཁྲུངས་པའི་རྒྱལ་རིགས་གཤེན་ཚང་ངམ་དམུ་རིགས་གཤེན་གྱི་སྐྱེས་ཆེན་དམ་པ་རྣམས་པའི་འཁྲུངས་གནས་གཤེན་ཚང་ཕོ་བྲང་དུ་ལུང་ཟིན་གྱི་སྐྱེས་ཆེན་དམ་པ་ཡབ་གཤེན་ཆེན་ཉི་མ་འབུམ་གསལ་དང་། ཡུམ་མཐོང་སྨོན་དབུ་མཛད་ལྷ་བའི་སྲས་མོ་བསྟན་འཛིན་མཚོ་རྒྱལ་གཉིས་ཀྱི་སྲས་སུ་བོད་རབ་བྱུང་བཅུ་དྲུག་པའི་མེ་ཕོ་སྤྲེལ་ལོ་སྟེ་སྤྱི་ལོ་༡༩༥༦ལོར་དགེ་ལེགས་ཀྱིས་རྟགས་མཚན་དུ་མ་དང་བཅས་གཟུགས་སྐུ་མངོན་པར་འཁྲུངས། ཆུང་ནས་རྒྱུད་དུལ་བ་དང་། རང་གཤིས་བཟང་བ་སོགས་སྐྱེས་བུ་དམ་པའི་ངང་ཚུལ་རང་བཞིན་ལྷན་སྐྱེས་སུ་མངའ་བ་དང་། སྤྲུལ་པའི་སྐུ་མཆོག་ཁྱད་དུ་འཕགས་པའི་ཡོན་ཏན་དུ་མ་རྒྱུད་ལ་ལྡན་པ་སྟེ་རྒྱལ་བའི་སྲས་མཆོག་ནོར་བུ་དབང་གི་རྒྱལ་པོ་ཞེས་མཚན་གསོལ་མཛད། རྒྱལ་བའི་སྐུ་སྲས་ཡིན་པའི་རྟགས་སུ་ཆུང་བྱིས་པའི་སྐུ་དུས་ནས་ཀྱང་མངོན་ཤེས་ལ་ཐོགས་པ་མེད་པ་ནི་ད་ལྟ་དར་སྡིངས་ཀྱི་རྒན་རབས་རྣམས་པས་གསུངས་རྒྱུན་མི་འདྲ་བ་བརྗོད་ཀྱིས་མི་ཚར་བ་མང་པོ་འདུག སྤྱི་ལོ་༡༩༦༠ལོར་དགུང་ལོ་ལྔར་ཕེབས་སྐབས་རི་རྒྱལ་དགོན་ཁྲི་བརྟན་ནོར་གླིང་གཙུག་ལག་ཁང་དུ་གཤེན་གྱི་བླ་བརྒྱུད་རིམ་བྱོན་གྱི་གསེར་ཁྲི་ལ་ཞབས་གསོལ་གདན་ཞུས་མཛད་པའི་སྐབས། མཁན་ཆེན་བསྟན་འཛིན་རྒྱལ་མཚན་གྱིས་དམུ་རྒྱལ་གཤེན་ལ་རྩེ་གཅིག་དད་པའི་སྒོ་ནས་ཕུལ་བས་སྐུ་ཚེ་འཕོ་མེད་རྒྱུན་རིང་བརྟན་པའི་ཆེད། གསོལ་འདེབས་འདི་ལྟར་གསུངས་ཏེ།

ཨེ་མ་ཧོ། རྒྱལ་བསྟན་ཉིན་བྱེད་གསེར་གྱི་ལྷ་ལམ་ལས། །

རྒྱལ་སྲས་རྣམ་རོལ་ལོང་སྐུའི་ཉི་ཤར་བས། །

རྒྱལ་བསྟན་གསལ་ཞིང་སྐྱེ་དགུའི་གཙུག་རྒྱན་མཆོག །

རྒྱལ་གཤེན་གདུང་འཛིན་བསྐལ་བརྒྱར་ཞབས་བརྟན་ཤོག །

       ཅེས་གསུངས་ཡོད་པ་གཤེན་གྱི་ཚོགས་འདོན་ནང་གསལ། དེའི་རྗེས་ལོ་འགའ་ཤས་ཡབ་ཡུམ་གྱི་ལྷན་དུ་དང་པོའི་ཡི་གེ་ཀློག་འདོན་སོགས་འགོ་ཙམ་སྟེ་བཞུགས་རྒྱུ་བྱུང་རུང་དེ་ནས་མི་རིང་བར་ཁྱོན་ཡོངས་ནས་དུས་འགྱུར་ཆེན་པོའི་ཟང་ཟིང་འགོ་ཚུགས་ཏེ། ཡབ་དང་དཔོན་གཡོག་རྣམས་སྨད་ཕྱོགས་སུ་ཕེབས་རན་ཏེ་ཡུམ་དང་གཤེན་སྲས་ཁོང་གཉིས་ལྷན་དུ་ཕེབས་རྒྱུར་ཟན་རྟགས་བསྒྲིལ་ཏེ་སྒྲུབ་ཁང་དུ་ཡི་དམ་ལྷ་དང་སྲུང་མའི་ཚོགས་རྣམས་ལ་རྟགས་ལུང་ཞུས་པས་ཡུམ་སྲས་གཉིས་གདན་ས་རང་དུ་བཞུགས་རྒྱུར་ཐུགས་ཐག་བཅད་ཐོག ཡབ་དང་དཔོན་འཁོར་རྣམས་ཧོར་སོག་སྡེ་ཕྱོགས་སུ་ཕེབས་ཏེ་སྐྱང་འཕགས་བླ་མ་གཞན་ཕན་མཐའ་ཡས་རྒྱ་མཚོ་རིན་པོ་ཆེ་དང་ཞལ་མཇལ་བྱུང་ནས་མཐའ་ཡས་རིན་པོ་ཆེ་མཆོག་ལ་འདི་ལྟར་གསུངས། མ་འོངས་མངོན་གཟིགས་ཀྱིས་ཁྱེད་རང་དུས་འགྱུར་སྐབས་སུ་སྐྱོན་ཆག་ཡོང་གི་མ་རེད། ང་ཡི་ཕ་ཡུལ་གཤེན་དར་སྡིངས་སུ་རིགས་ཀྱི་སྲས་ཆུང་སྤྲེལ་ལོ་བ་ཞིག་ཡོད་པས་རྗེས་སུ་ཁྱེད་ཀྱི་ཐུགས་ལ་བཞག་ཏེ་གཟིགས་རྟོག་གནང་རོགས་དགོས་ཞེས་བཀའ་མངགས་ནན་གྱིས་གནང་སྟེ་ཁོང་རྣམས་དུས་དེ་ནས་ཞལ་གྱེས་གནང་། དེ་རྗེས་ཡུམ་སྲས་གཉིས་རིག་གསར་སྐབས་ཀྱི་རླུང་འཚུབ་དྲག་པོའི་ཁྲོད། ལོ་བཅུ་ལྷག་ཙམ་རིང་འཁྱགས་ལྟོགས་བཀྲེས་སྐོམ་གྱི་སྡུག་བསྔལ་སྣ་ཚོགས་མྱོང་དགོས་བྱུང་བ་ལས་ཐུན་མིན་མདོ་སྔགས་སེམས་གསུམ་དང་ཐུན་མོང་རིག་པའི་གནས་སོགས་ལ་སྦྱངས་པ་མཛད་རྒྱུ་ནི་དེ་བས་བརྗོད་ཐབས་བྲལ། ལྕགས་ཕོ་ཁྱི་ཡི་ལོ་དགུང་ལོ་བཅོ་ལྔ་བཞེས་ཏེ་སྤྱི་ལོ་༡༩༧༠ནས་ལོ་ལྔ་ཙམ་གྱི་ནང་དཀའ་སྡུག་གི་ཁྲོད་སྔ་ཕྱིར་ཡུམ་དང་ལྷན་དུ་ཆུ་ལྷོ་གཞུང་དང་གཞིས་རྩེ་སོགས་ས་ཆ་གང་སར་ཕེབས་དགོས་བྱུང་བ་དང་། དེའི་རྗེས་ཡུམ་སྐུ་ན་ཕྲ་བའི་དུས་ནས་དཀའ་སྡུག་ཤིན་ཏུ་ཆེ་བར་བརྟེན་དགོངས་པ་རྫོགས། ཆུ་ཕོ་བྱི་བའི་ལོ་སྟེ་དགུང་ལོ་བཅུ་བདུན་ཙམ་ནས་ཁོང་གཅིག་པུར་ལུས་པ་དང་འཚོ་བ་སོགས་གང་ཅིར་དཀའ་ངལ་ཧ་ཅང་ཆེན་པོ་བྱུང་བར་བརྟེན་མུས་ལུང་སོགས་སུ་ཕེབས་པའི་སྐོར་གྱི་སྐུ་ངལ་བྱུང་ཚུལ་སེམས་གྱི་མི་བཟོད་པ་མང་དག་ཅིག་གསུང་རྒྱུ་འདུག་ཀྱང་རེ་རེ་བཞིན་བརྗོད་ཀྱིས་མི་ཚར་བ་དང་ཡིག་ཚོགས་ལ་འཇིག་སྟེ་མ་བྲིས། མི་དམངས་ཀུང་ཧྲེའི་སྐབས་དར་སྡིངས་སུ་རུ་ཁག་གཉིས་པའི་ཕྱུགས་རྫི་གནང་སྟེ་བཞུགས། ཤིང་ཕོ་སྟག་གི་ལོ་སྤྱི་ལོ་༡༩༧༤དགུང་ལོ་བཅུ་དགུ་བཞེས་སྐབས་སྙུང་ཞི་དང་སྐུ་ངལ་གཉིས་ཀྱི་མ་བཟོད་པར་ཁོང་གཅིག་པུ་གཞིས་རྩེར་རྐང་ཐང་དུ་ལན་གཉིས་ཙམ་ཕེབས། མེ་ཕོ་འབྲུག་གི་ལོ་སྤྱི་ལོ་༡༩༧༦ནས་ལོ་གཉིས་ཙམ་གྱི་རིང་ལ་བཀྲ་ཤིས་ལྷུན་པོར་སྤོ་བོ་རྒུ་འགྲུམ་ལགས་ཀྱི་ཤག་ཏུ་བཞུགས། མེ་མོ་སྦྲུལ་གྱི་ལོ་དགུང་ལོ་ཉི་ཤུ་རྩ་གཉིས་ཕེབས་ཏེ་སྤྱི་ལོ་༡༩༧༧ལོའི་ལོ་མཇུག་ཏུ་མཐའ་ཡས་རྒྱ་མཚོ་རིན་པོ་ཆེ་མཆོག་གིས་ཁོང་རང་གི་ཚ་བོ་ཉི་ཤུལ་ཡ་གཞིས་རྩེ་ནས་གཤེན་སྲས་གདན་འདྲེན་ཞུ་བར་མངགས། ཁོང་གཞིས་རྩེར་ཕེབས་ཏེ་གང་སར་བཙལ་བས་གཤེན་སྲས་སྨན་ཁང་དུ་བཞུགས་ཡོད་པ་ཤེས་རྗེས། ཁོང་གིས་སྨན་པ་དང་དམངས་སྲིད་ཅུས་བཅས་ཚང་མར་གཤེན་སྲས་ལྷ་སར་གདན་རྒྱུའི་རེ་ཞུ་བྱས་རྗེས་ཁོང་རྣམས་ལྷ་སར་ཕེབས་ཏེ་ཨ་ཁུ་ཡི་དམ་གྱི་ནང་དུ་ཉིན་ཤས་བཞུགས་པ་དང་། དེ་དུས་མཐའ་ཡས་རིན་པོ་ཆེ་ལས་མིར་ཐོན་པ་དང་། ཁོང་གིས་ལས་ཞོར་དུ་གཤེན་སྲས་མཆོག་གི་འཚོ་བ་སོགས་གང་ཅིར་ཐུགས་དགོངས་ཟབ་བཞེས་གནང་བ་དང་སྲིད་རྒྱལ་དྲེའུ་དམར་དང་བྱམས་མ། མ་རྒྱུད་ཀྱི་གསོལ་འདེབས་ལ་སོགས་འདོན་ཆ་བསླབ་གནང་བ་དང་དབང་ལུང་ཁྲིད་བཅས་གནང་བྱུང་གསུངས། དགུང་ལོ་ཉི་ཤུ་རྩ་གསུམ་ཕེབས་པ་ས་ཕོ་རྟ་སྤྱི་ལོ་༡༩༧༨ལོར་ཏང་གི་ཆོས་ལུགས་དད་མོས་སྲིད་ཇུས་རང་དབང་མངོན་འགྱུར་གྱི་དཔྱིད་རླུང་དལ་པོ་བག་ཕེབས་ཀྱི་སྒོ་ནས་གངས་རིའི་ལྗོངས་འདིར་ལྡང་རྗེས་གཞི་ནས་ཁོང་གི་འཚོ་བ་སོགས་གང་སྤྱིར་བསམ་ཡུལ་ལས་འདས་པའི་སྒྱུར་བ་བྱུང་བར་བརྟེན། མཐའ་ཡས་རྒྱ་མཚོ་མཆོག་དང་ཨ་མདོ་འཇིག་མེད་བཅས་ལྷན་དུ་ཀོང་པོར་ཕེབས་ཏེ་གནས་མཆོག་བོན་རིར་བསྐོར་བ་སྐྱོན་གནང་སྟེ་དགོན་ཤུལ་ཁག་དང་སྒྲུབ་གནས་རྣམས་ལ་ཞབས་བཅགས་ཀྱང་མཛད། ས་མོ་ལུག་དགུང་ལོ་ཉི་ཤུ་རྩ་བཞིར་ཕེབས་ཏེ་སྤྱི་ལོ་༡༩༧༩ལོར་མཐའ་ཡས་རྒྱ་མཚོ་མཆོག་དང་ཚ་རོང་སྤྲུལ་སྐུ་སྦྱིན་པ་རྒྱལ་མཚན་རྣམ་གཉིས་ལྷན་དུ་གཡུང་དྲུང་གླིང་དུ་ཕེབས་ཏེ་དུ་ཏྲི་སུའི་སྒྲུབ་པ་ཟླ་བ་གཅིག་ལྷག་ཙམ་བཞུགས་ཏེ་ཕྱིར་ལྷ་སར་ཕེབས། སྤྱི་ལོ་༡༩༨༠ལོ་ནས་སྐྱངས་འཕགས་བླ་མ་ཁོང་དང་གྲུབ་དབང་བསྟན་པའི་ཉི་མ་རྣམ་གཉིས་ཟུང་འབྲེལ་གྱིས་ཁོང་ཉིད་ལ་སྨན་བཅོས་མཛད་པ་སོགས་བཙའ་རྫི་དང་འཚོ་སྐྱོང་གནང་བས་གཤེན་སྲས་རིན་པོ་ཆེ་ཉིད་སྐུ་ཡི་སྙུང་གཞི་སོགས་དྭངས་ཞིང་འཚར་ལོངས་བྱུང་བ་མ་ཟད་ན་ཚོད་སྨིན་ཅིང་འགྲོ་ལུགས་འདུག་ཏང་སོགས་ཀྱང་བྱུང་ཡོད་པ་དང་། དེ་རྗེས་སྐྱངས་འཕགས་བླ་མ་ཁོང་གིས་མ་འོང་མངོན་གཟིགས་ཀྱི་གཤེན་སྲས་དེ་ཉིད་མཆོག་སྤྲུལ་གྲུབ་དབང་བསྟན་པའི་ཉི་མ་ཁོང་ཉིད་ལ་བཅོལ་གདམ་མཛད་གནང་ཏེ་དུས་དེ་ནས་ཁོང་རྣམས་པའི་སྐུ་ཚེའི་སྐྱིད་སྡུག་མཉམ་མྱོང་མཛད། ལྕགས་མོ་བྱ་དགུང་ལོ་ཉི་ཤུ་རྩ་དྲུག་བཞེས་ཏེ་སྤྱི་ལོ་༡༩༨༡ལོར་གདན་ས་དར་སྡིངས་སུ་ཆོས་འགོ་དར་ཚུན་གྱི་ཕེབས་ཐེངས་དང་པོ་བསྐྱངས་ཏེ་ཁྲི་བརྟན་ནོར་རྩེར་སྒེར་སྲུང་བཙན་རྒྱལ་ཐོག་རྒོད་འབར་བའི་བཞུགས་ཁང་གསར་བཞེངས་གནང་བ་དང་། གསེར་སྒོ་ཁྲ་མོ་གཞིག་ཤུལ་དུ་བསྟན་པའི་དར་ཆེན་ཞིག་བཙུགས་གནང་སྟེ་མ་འོངས་པར་སངས་རྒྱས་བསྟན་པ་དར་ཞིང་རྒྱས་པ་ཡོང་བའི་ཐུགས་སྨོན་མཛད་དེ་ཉིན་ཞག་འགའ་ཤས་བཞུགས། ཆུ་ཕོ་ཁྱི་ཡི་ལོ་དགུང་ལོ་ཉི་ཤུ་རྩ་བདུན་སྤྱི་ལོ་༡༩༨༢ལོར་གཞིས་རྩེ་ས་གནས་ཆོས་ཚོགས་ཀྱི་ལས་འཛིན་དུ་བཞུགས། ཆུ་མོ་ཕག་གི་ལོ་དགུང་ལོ་ཉི་ཤུ་རྩ་བརྒྱད་བཞེས་ཐོག་སྤྱི་ལོ་༡༩༨༣ལོར་རིན་པོ་ཆེ་ཉིད་ལ་སྐུ་ཡི་ཕྱག་རྒྱ་མ་ཞིག་དགོས་པར་ཤར་ཚེ་སྐབས་དེར་ཧོར་རྒྱལ་སྲས་བླ་མ་གཡུང་དྲུང་རྒྱལ་བ་མཆོག་དང་། དེ་བཞིན་དུ་སྨན་རིའི་དཔོན་སློབ་ཚུལ་ཁྲིམས་དབང་ལྡན། གཡུང་དྲུང་གླིང་དགེ་སློང་ཤེས་རབ་བསྟན་འཛིན། སྐྱངས་འཕགས་བླ་མ་གཞན་ཕན་མཐའ་ཡས་རྒྱ་མཚོ། ཚ་རོང་སྤྲུལ་སྐུ་སྦྱིན་པ་རྒྱལ་མཚན། མཁས་དབང་ཤེས་རབ་མཆོག་ལྡན། གྲུབ་དབང་བསྟན་པའི་ཉི་མ། ཞུ་བླ་ཉི་ཟླ་ཚེ་དབང་། མཁས་དབང་བསྟན་འཛིན་དབང་གྲགས། རྣལ་འབྱོར་ནོར་སྐྱབས་རིན་པོ་ཆེ་སོགས་ཀྱིས་གཙོས། བོན་གྱི་བླ་མ་ཆེ་ཁག་ཡོངས་རྫོགས་བཀའ་གྲོས་གནང་ནས་ཁོང་གིས་སྐུ་ཡི་ཕྱག་རྒྱར་འོས་པའི་རྒོད་ལྕམ་དོན་འབར་མ་ཞིག་སུ་ཡིན་ལྷ་སྲུང་ལ་རྟགས་ལུང་ཞུ་རྒྱུར་ཐུགས་དགོངས་ཟབ་བཞེས་མཛད་དེ་རིགས་བཟང་ཁུངས་བཙུན་ཞིང་མཚན་རྟགས་དང་ལྡན་པའི་བུ་མོ་བདུན་ཙམ་ཞིག་བོན་གཞིས་ཐོབ་རྒྱལ་གསར་པའི་སྒྲུབ་ཁང་ནང་དུ་རྒྱལ་བ་སྨན་རིའི་མཁན་སློབ་རྣམས་པས་གཙོས་འདུས་གྲྭ་རྣམས་ཀྱིས་བོན་སྐྱོང་གནད་སྒྲུབ་ཀྱི་ཟན་རྟགས་བསྒྲིལ་ཏེ་ད་ལྟའི་གཤེན་སྲས་རྣམས་པའི་མ་ཡུམ་ཡེ་ཤེས་མཁའ་འགྲོ་ཉི་མ་མཚོ་མོ་རྟགས་ལུང་བཞིན་དང་པོར་དོན་ཏེ་ལྕམ་དུ་བཞེས། ཤིང་མོ་གླང་སྤྱི་ལོ་༡༩༨༥ལོར་གཤེན་གྱི་གདན་ས་དཔལ་ལྡན་དར་སྡིངས་སུ་གཤེན་ཚང་བླ་བྲང་ཕྱི་ནང་ཚང་མ་གསར་བཞེངས་ལེགས་པར་མཛད་པ་དང་ སོག་སྡེ་བོན་དགོན་དཔལ་ལྡན་ནོར་བུའི་གླིང་དེ་ཉིད་བསྐྱར་བཞེངས་གྲུབ་པའི་དགའ་སྟོན་རྟེན་འབྲེལ་དུ་གདན་འདྲེན་ཞུས་བཞིན་དེ་ཁའི་སྐུ་གསུང་ཐུགས་རྟེན་རྣམས་ལ་མངའ་གསོལ་རབ་གནས་མཛད་པ་དང་སོག་སྡེ་བྱང་ཤོག་གཞི་ཡིས་དུག་ཆུའི་སྲག་ཐང་ལ་རྟ་རྒྱུག་སོགས་ཀྱི་མཛད་སྒོ་ནང་ཕེབས་ཏེ་དད་ལྡན་མང་ཚོགས་ལ་ཚེ་སྒྲུབ་བྱ་རི་མ་ཡི་བཀའ་དབང་སོགས་ལེགས་པར་བསྩལ་གནང་མཛད། མེ་མོ་ཡོས་སྤྱི་ལོ་༡༩༨༧ལོར་དགུང་གྲངས་སུམ་ཅུ་སོ་གཉིས་ཐོག་གྲུབ་དབང་བསྟན་པའི་ཉི་མ་རིན་པོ་ཆེ་དང་བཅས་སྐུ་འཁོར་རྣམས་གདན་ས་དར་སྡིངས་སུ་ཕེབས་ཏེ། གནས་ཆེན་གསེར་སྒོ་ཁྲ་མོ་ཐོག་མའི་གསར་བཞེངས་ཀྱི་རྨང་གཞི་གཏིངས་གནང་བ་དང་ལོ་དེར་གཞིས་རྩེ་ས་གནས་ནང་བསྟན་མཐུན་ཚོགས་ཀྱི་འཚོགས་གཙོ་གཞོན་པ་དང་། ལྗོངས་ནང་བསྟན་ཐུན་ཚོགས་ཀྱི་ལས་འཛིན་མཛད། ལོ་དེར་པན་ཆེན་རིན་པོ་ཆེ་གཞིས་རྩེར་ཕེབས་པ་དང་། པན་ཆེན་རིན་པོ་ཆེ་མཆོག་དང་མཇལ་འཕྲད་གནང་ཞིང་པན་ཆེན་རིན་པོ་ཆེ་མཆོག་ནས་ཁོང་ལ་མཐོང་ཆེན་གནང་སྟེ། གཤེན་ཐུགས་རྗེ་ཉི་མའི་སྐབས་སུ་ཁོང་དར་སྡིངས་སུ་ཕེབས་མྱོང་ཚུལ་གསུངས་ཤིང་། གཞིས་རྩེ་ས་གནས་ཀྱི་དབུ་ཁྲིད་རྣམས་ལ་གཤེན་སྲས་ཁོང་ལ་ལྟ་རྟོག་དང་གཟིགས་སྐྱོང་ཡག་པོ་གནང་དགོས་པའི་བཀའ་སློབ་གནང་། དེ་དུས་ལྷ་སར་གཤེན་ཚང་གི་ཕྱག་མཛོད་ཚེ་དབང་རྡོལ་ལགས་ཀྱི་གཟིམ་ཁང་དུ་ལྷན་བཞུགས་ལོ་ཁ་ཤས་མཛད། ས་ཕོ་འབྲུག་སྤྱི་ལོ་༡༩༨༨ལོར་རག་ཤི་རྟོགས་ལྡན་དྲི་མེད་གཡུང་དྲུང་གི་སྐུ་མདུན་ནས་སྔོན་འགྲོའི་ཁྲིད་ལུང་དང་སྲིད་རྒྱལ་དྲེའུ་དམར་གྱི་བཀའ་གཏད་རྗེས་གནང་དང་བཅས་པ་ཞུ་གནང་མཛད་པ་དང་། ལོ་དེར་དར་སྡིངས་སུ་ཕེབས་ཏེ་ཁྲི་བརྟན་ནོར་བུ་རྩེའི་འདུས་སྡེ་བླ་སློབ་རྣམས་ལ་བྱིན་རླབས་རྗེས་གནང་དང་། བསྟན་པ་འཛིན་སྐྱོང་སྤེལ་གསུམ་གྱི་བཀའ་སློབ་ལམ་སྟོན་བཅས་གནང་། སྤྱི་ལོ་༡༩༨༩ལོའི་ནང་སྐུ་ལ་སྙུང་གཞི་ལྗིད་མོ་ཞིག་བྱུང་བ་དང་ཡང་སྤྱི་ལོ་༡༩༩༠ལོའི་སྤྱི་ཟླ་བཅུ་གཅིག་པའི་ནང་སྙུང་གཞི་ལྕི་བར་བརྟེན་རྒྱ་ནག་ཁྲེན་ཏུར་སྨན་ཁང་དུ་གདན་འདྲེན་མི་ཞུ་ཐབས་མེད་བྱུང་བས་གྲུབ་དབང་བསྟན་པའི་ཉི་མ་མཆོག་གིས་སྐུའི་ཞབས་ཞུ་དང་ཕྱག་རོགས་སོགས་གནང་བར་མཛད། ཆུ་ཕོ་སྤྲེལ་སྤྱི་ལོ་༡༩༩༢ལོའི་ནང་སྐུ་ལ་སྙུང་གཞི་ཕྲན་ཙམ་བྱུང་ཡོད་པ་དང་ལོ་དེའི་ཟླ་བ་༥པའི་ཚེས་༡༤ཉིན་ནས་ཤིན་ཏུ་སྙུང་གཞི་ཚབ་ཆེན་པོ་བཞེས་པའི་དུས། སངས་རྒྱས་གཡུང་དྲུང་བོན་གྱི་བསྟན་པ་ལ་དཀའ་དྲིན་ཤིན་ཏུ་ཆེ་བ་ཡང་སྒོས་གཤེན་རིན་པོ་ཆེའི་སྐུ་ལ་ཐུགས་རྗེའི་དཀའ་དྲིན་བསམ་གྱི་མི་ཁྱབ་པ་གྲུབ་དབང་བསྟན་པའི་ཉི་མ་མཆོག་གིས་ཡོངས་འཛིན་དཔོན་སློབ་བསྟན་འཛིན་རྣམ་དག་རིན་པོ་ཆེ་གདན་དྲངས་ནས་དཔོན་སློབ་རིན་པོ་ཆེ་དང་མཆོག་སྤྲུལ་བསྟན་པའི་ཉི་མ་རིན་པོ་ཆེ་རྣམ་གཉིས་ཀྱིས་ཁོང་གི་སྙུང་གཞིའི་ཐད་ལ་ཐུགས་ཁྲལ་ཆེན་པོ་གནང་བ་དང་སྙུང་གཞི་དྲག་སྐྱེད་ཡོང་བའི་ཐུགས་སྨོན་སྐྱབས་འཇུག་དང་ཞབས་རིམ་ཀྱང་ཞུས། དེའི་སྐབས་གཤེན་ཁྲི་བརྟན་ནོར་བུའིི་རྩེ་ནས་སྲིད་རྒྱལ་དྲེའུ་དམར་མོའི་ཁྲི་ཚོགས་དང་དྲན་པ་ཚེ་སྒྲུབ་ཀྱི་བསྒྲུབ་པ། དབལ་མོ་སྟོང་ཚར་སོགས་ཀྱི་ཞབས་རིམ་ཡང་ཞུས། དེ་ནས་རིམ་བཞིན་སྐུའི་སྙུང་གཞི་དྭངས་བ་དང་ལོ་དེའི་སྤྱི་ཟླ་༡༠པའི་ཚེས་༡༧ཉིན་སྐྱབས་རྗེ་སྨན་རིའི་ཡོངས་འཛིན་བསྟན་འཛིན་རྣམ་དག་མཆོག་གིས་ཁོང་ལ་གསང་ཆེན་མ་རྒྱུད་ཀྱི་དབང་བཞི་ཆ་ཚང་དང་། ཚེ་དབང་བོད་ཡུལ་མའི་དབང་བཞི་རྗེས་གནང་དང་བཅས་པ་བཀའ་དྲིན་བསྩལ་གནང་། ཤིང་ཕོ་ཁྱི་སྤྱི་ལོ་༡༩༩༤ཙམ་ནས་ལོ་འགའ་ཤས་བོན་གྱི་བརྟེན་འགྱུར་ཆེན་མོའི་དཔར་སྐྲུན་གྱི་ལས་ཀར་གྲུབ་དབང་སྤྲུལ་སྐུ་བསྟན་པའི་ཉི་མ་མཆོག་ལ་ཕྱག་རོགས་གནང་སྟེ་བོད་ལྗོངས་མི་དམངས་དཔེ་སྐུན་ཁང་དུ་བཞུགས་པ་དང་སྐྱབས་རྗེ་སྨན་རིའི་ཡོངས་འཛིན་བསྟན་འཛིན་རྣམ་དག་མཆོག་གངས་ལྗོངས་སུ་ཕེབས་ཐེངས་གཉིས་པ་བསྐྱངས་སྐབས་ཁོང་ལ་བྱང་ཁྲིད་དང་རྒྱལ་ཐེབས་དབང་ཁྲིད་ལུང་མང་པོ་གནང་བར་མཛད། ཤིང་མོ་ཕག་སྤྱི་ལོ་༡༩༩༥ལོ་ཚུན་ནས་གཙང་སྨན་རི་དགོན་སོགས་ལ་དངོས་སུ་ཞབས་ཀྱིས་བཅགས་ཏེ་བསྟན་པ་མ་ཉམས་བརྒྱུད་འཛིན་ཡོང་ཆེད་གཟིགས་སྐྱོངས་ཀྱིས་མཛད་བཟང་རླབས་པོ་ཆེ་འཇོག་གནང་མཛད། མེ་མོ་གླང་སྤྱི་ལོ་༡༩༩༧ལོར་དགུང་ལོ་བཞི་བཅུ་ཞེ་གཉིས་ལ་ཕེབས་ཏེ་ལྷ་ལྡན་དུ་གཤེན་ཚང་བླ་བྲང་གསར་དུ་གཟིགས་ཏེ་ཡབ་སྲས་ཡུམ་སྐུ་འཁོར་དང་བཅས་ད་ལྟའི་བཞུགས་གནས་དེ་ཡིན་པས་དེ་ཡང་ལྷ་གདན་དུ་གཤེན་གྱི་བླ་བྲང་བྱུང་བ་ལོ་རྒྱུས་ཐོག་གི་དང་པོ་དེ་ཡིན་པར་སྣང་ངོ་། ས་མོ་ཡོས་སྤྱི་ལོ་༡༩༩༩ལོར་བོད་རང་སྐྱོང་ལྗོངས་ནང་བསྟན་མཐུན་ཚོགས་ཀྱི་འཚོགས་གཙོ་གཞོན་པའི་འགན་བཞེས་གནང་བ་དང་། ལོ་དེར་རྒྱལ་ཡོངས་ཆོས་ཚོགས་ཀྱི་ལས་འཛིན་མཛད། སྤྱི་ལོ་༢༠༠༡ལོའི་ནང་སྐུ་ལ་སྙུང་གཞིས་རྐྱེན་པས་རྒྱ་ནག་ཧྲང་ཧའེ་གྲོང་ཁྱེར་རུ་སྨན་བཅོས་ལ་ཕེབས་པ་དང་ལོ་འདིའི་ཟླ་བ་༢པའི་ཚེས་༢༢ཉིན་སྐུའི་སྙུང་གཞི་དྭངས་ཏེ་དེ་ཁའི་སྨན་པ་རྣམས་ལ་ཐུགས་རྗེ་ལེགས་འབུལ་གྱི་ཕྱག་རྟགས་ཕུལ་གནང་མཛད་དེ་ཕྱིར་ཕེབས། ཆུ་མོ་ལུག་སྤྱི་ལོ་༢༠༠༣ལོའི་ཟླ་བ་༧པའི་ཚེས༡༧པ་སངས་ནམ་གྲུའི་འགྲུབ་སྦྱོར་ཉིན་གཤེན་རྒྱལ་ཡབ་སྲས་གསུམ་ལྷན་བཞུགས་ཀྱི་གནས་ཆེན་གསེར་སྒོ་ཁྲ་མོ་དང་རི་རྒྱལ་དགོན་ཁྲི་བརྟན་ནོར་བུའི་རྩེར་ཁྲི་གསོལ་མཛད་པའི་སྐལ་བཟང་ཉིན་གྲུབ་དབང་བསྟན་པའི་ཉི་མ་མཆོག་གིས་རང་གི་སྣང་ངོར་རིག་པ་དྭངས་གསལ་གྱི་ཉམས་དགེའི་སྤྲོ་སྣང་བྱུང་སྐབས་ཡབ་སྲས་གསུམ་ལ་གསོལ་འདེབས་ཞབས་བརྟན་རེ་རྟེན་འབྲེལ་གྱི་ཚུལ་དུ་ཕུལ། སྐབས་དེ་དུས་གཤེན་སྲས་རིན་པོ་ཆེ་མཆོག་གིས་སྤ་ཚང་དགོན་གྱི་དབུ་བླ་བསྟན་པའི་ཉི་མ་རིན་པོ་ཆེ་སྤ་ཉི་མ་འབུམ་སྲས་ཀྱི་སྐུ་སྐྱེ་རུ་ངོས་འཛིན་གནང་ནས་དེ་ཁར་་ཁྲི་བཞེངས་གནང་བ་དང་ཕྱག་ཐམ་སྐྱོན་པའི་ཐང་སྐུ་ཞིག་གནང་ནས་ཐུགས་སྨོན་ཡང་མཛད། བོད་རབ་བྱུང་བཅུ་བདུན་པའི་ས་སྐྱོང་ཞེས་ཤིང་མོ་བྱ་སྤྱི་ལོ་༢༠༠༥ལོར་རི་རྒྱལ་དགོན་ཁྲི་བརྟན་ནོར་བུ་རྩེའི་འདུ་ཁང་ཆེན་མོའི་ས་འདུལ་རྨང་གཞི་གཏིང་གནང་སྟེ་ལོ་ཤས་ནང་ཕྱི་ནང་གི་རྟེན་བཞེངས་ཡོངས་རྫོགས་ལེགས་པར་གྲུབ། རབ་བྱུང་བཅུ་བདུན་པའི་འགལ་བ་ས་མོ་གླང་སྤྱི་ལོ་༢༠༠༩ལོར་དཔལ་ལྡན་དར་སྡིངས་གཤེན་གྱི་བླ་བྲང་གསར་བཞེངས་རྒྱ་ཆེར་གཏོང་གནང་བ་དང་། ལོ་དེར་རྒྱལ་ཡོངས་ཆོས་ཚོགས་ཀྱི་རྒྱུན་ལས་ལས་འཛིན་གནང་བ་དང་། འཛམ་གླིང་ཆོས་ཚོགས་ཀྱི་འཚོགས་འདུར་ཐེངས་གཉིས་ཕེབས། ལྕགས་མོ་ཡོས་སྤྱི་ལོ་༢༠༡༡ལོར་སྐུ་འབུམ་མཆོད་རྟེན་བཀྲིས་མཐོང་གྲོལ་ལྷ་ཁང་གི་ས་འདུལ་རྨང་གཞི་གཏིང་གནང་བ་དང་ལོ་དེར་འཛམ་གླིང་ནང་རྟེན་ཐུན་ཚོགས་ཀྱི་ཚོགས་འདུར་བཞུགས་གནང་མཛད། ཤིང་ཕོ་རྟ་སྤྱི་ལོ་༢༠༡༤ལོ་ནས་སྐབས་བཅུ་པའི་ལྗོངས་སྲིད་གྲོས་ཀྱི་རྒྱུན་ལས་ལས་འཛིན་མཛད་པ་དང་། ལོ་དེར་ལྷ་ལྡན་དུ་ཏིས་རས་གཡུང་དྲུང་བོན་གྱི་འབབ་ཚུགས་བསྐྱར་བཞེངས་གནང་པ་དང་ལྷ་ལྡན་དུ་ཡོད་པའི་གཤེན་གྱི་ཕོ་བྲང་བསྐྱར་བསྐྲུན་ཡང་མཛད། མེ་ཕོ་སྤྲེལ་སྤྱི་ལོ་༢༠༡༦ལོའི་ཟླ་བ་༦པའི་ཚེས་༡ཉིན་སངས་རྒྱས་གཡུང་དྲུང་བོན་གྱི་བཀའ་བརྟེན་དག་སྒྲིག་གཅིག་བསྡུད་གྱི་སྐོར་ལ་གནང་བའི་བཀའ་སློབ་ལམ་སྟོན་འདི་ལྟར་གསུང་སྟེ། ད་ལེན་འདིར་སངས་རྒྱས་གཡུང་དྲུང་བོན་གྱི་བསྟན་པ་འཛིན་པའི་སྐྱེས་ཆེན་བླ་སྤྲུལ་རྣམས་དང་མཁས་པའི་དབང་པོ་དེ་བཞིན་དགེ་བའི་བཤེས་གཉེན་རྣམས་ཀྱི་སྙན་ལམ་དུ་ཞུ་དོན། དེ་རིང་འདིར་བོད་ཀྱི་ཐོག་མའི་རིག་གནས་མྱུར་སྐྱོབས་ཤིང་པར་ཆེན་མོ་འཛམ་གླིང་རྒྱན་གཅིག་གི་ལས་མགོ་བརྩམས་པའི་གཏམ་བཟང་ཡིན་ཤག་ཤོད་པའི་བང་མི་ཞིག་བདག་གི་སར་སླེབ་པར་དགའ་སྤྲོ་བྱུང་། གུས་པ་སྔར་བཞིན་བདེ་མུས་སུ་གནས་ལགས། མཚམས་ཀྱི་ཞུ་དོན། དང་ཐོག་ང་ཚོ་ཚང་མ་དུས་རབས་འདི་དང་སྤྱི་ཚོགས་འདི་འདྲ་ཞིག་གི་སྐབས་སུ་རང་ནུས་ལ་དཔག་པའི་བསྟན་པ་འཛིན་པའི་སྐྱེས་བུ་ཤ་སྟག་ཡིན་པ་སྨོས་མི་དགོས། ཡིན་ན་ཡང་དོ་སྣང་བྱེད་དགོས་པ་ཞིག་ལ། ངས་བསམ་པར། སྔོན་མའི་རྒན་རབས་རྣམས་ཀྱིས་སོ་ནམ་མ་ཤེས་རོགས་སྡེ་འཚོལ་ཞེས་པའི་དཔེ་ལྟར། ང་ཚོ་སངས་རྒྱས་གཡུང་དྲུང་བོན་གྱི་བཀའ་འགྱུར་རིན་པོ་ཆེ་ནི་རྣམ་མཁྱེན་རྒྱལ་བ་གཤེན་རབ་མི་བོ་ཆེ་མཆོག་གི་བཀའ་དྲི་མ་མེད་པ། རྣམ་པར་དག་པ། ལོ་རྒྱུས་རིང་ལ་གཏིང་ཟབ་པ། དོན་སྙིང་ལྡན་པ། རྩ་ཆེའི་བཀའ་འདི་གཅིག་བསྡུད་མ་བྱུང་ན། མ་འོངས་པར་གཡུང་དྲུང་བོན་གྱི་བཀའ་འགྱུར་འདི་ཆ་འཇོག་དང་ཕུག་གཏུག་ས་འདི་དང་འདི་ཞེས་ལོ་རྒྱུས་རིམ་པ་བཞིན་ཁ་གསལ་མེད་པའི་གནས་སུ་གྱར་འགྲོ་བའི་ཉེན་ཁ་ཆེན་པོ་འདུག་པ་ལ་བརྟེན་ནས། རང་གི་རེ་བར། མ་འོང་པར་བཀའ་རིན་པོ་ཆེ་འདིར་བརྟེན་པའི་བོན་འབངས་ཡོངས་དང་དེ་བཞིན་འཛམ་གླིང་གང་སར་ཁྱབ་པའི་ལོ་རྒྱུས་དཔྱད་ཞིབ་པ་རྣམས་ལ་བོན་གྱི་བཀའ་རིན་པོ་ཆེ་ཁུངས་གཙང་སྤུས་དག་ཞིག་མཁོ་འདོན་ཡོང་ཆེད་ད་ཐེངས་བོན་གྱི་བླ་སྤྲུལ་ཆེ་ཁག་རྣམས་དང་མཁས་དབང་རྣམ་པ་བཅས་ཚང་མ་ལྷན་འཛོམ་ཐོག་དངོས་ཡོད་གནས་ཚུལ་ལ་གཞིག་ནས་སྔོན་མའི་ལོ་རྒྱུས་དང་དུས་བབ་འཕོ་འགྱུར་སྐབས་ལྷག་ལུས་གང་འདྲ་བྱུང་མིན་དང་དེ་དག་མྱུར་སྐྱོབས་གང་འདྲ་བྱས་པ་སོགས་ཀྱི་ལོ་རྒྱུས་རབ་དང་རིམ་པ་གཅིག་གྱུར་གཏན་འཁེལ་བཟོས་ནས་མ་དཔེ་ཤིང་དཔར་དུ་བརྐོས་ན་ཡག་པོ་ཞིག་འབྱུང་ས་རེད་བསམ་ནས་ཤར་མར་ཡིག་ཐོག་ནས་སྤེལ་བ་ཡིན་ལགས་སོ། །

  སླད་མར་ཡང་སངས་རྒྱས་གཡུང་དྲུང་བོན་གྱི་བསྟན་པ་འདི་ཉིད་མི་ཉམས་གོང་འཕེལ་དང་ཉམས་པ་སླར་གསོ་ཡོང་བ་དང་དེར་འཛིན་གྱི་སྐྱེས་བུ་རྣམས་ཐུགས་མཐུན་ཁྲིམས་གཙང་དང་སྐུ་ཚེ་གེགས་མེད་ཡོང་བའི་རེ་སྨོན་དང་བཅས། གུས་པ་གཤེན་སྲས་ནོར་བུ་དབང་རྒྱལ་གྱིས་ཞེས་བཀའ་སློབ་ལམ་སྟོན་གྱི་ཕྱག་བྲིས་རྒྱ་ཆེ་ཞིང་ཕུག་ཐག་རིང་བའི་ཐུགས་བསྐྱེད་ཟབ་མོའི་བཀའ་ཇི་ལྟར་གནང་བར་བརྟེན་བསྟན་པ་འདི་ཉིད་འཛིན་སྐྱོང་སྤེལ་གསུམ་མཛད་པའི་བླ་མ་དང་སྤྲུལ་སྐུ། མཁན་པོ། སློབ་དཔོན། དགེ་ཤེས། དེ་བཞིན་ཆེད་མཁས་ཞིབ་འཇུག་པ་སོགས་ཐུན་མོང་ཐོག་བསམ་པ་གཅིག་གྱུར་བྱུང་སྟེ་ད་ལྟ་རྒྱལ་བའི་བཀའ་རིན་པོ་ཆེ་དཔར་སྐྲུན་གྱི་ལས་ལ་འཇུག་བཞིན་པའོ། ས་ཕོ་ཁྱི་སྤྱི་ལོ་༢༠༡༨ལོར་གདན་ས་དར་སྡིངས་གི་དགོན་པ་གོང་འོག་གཉིས་ལྗོངས་རིམ་པའི་རིག་དངོས་ཤུལ་བཞག་ནང་ཚུད་དེ་གནས་ཆེན་གསེར་སྒོ་ཁྲ་མོ་དང་ཁྲི་བརྟན་ནོར་བུའི་རྩེའི་སྒྲུབ་ཁང་དེ་གཉིས་ཉམས་གསོ་དང་སྲུང་སྒྱོབས་ཀྱི་སྐོར་ལ་ཕྱག་ལས་རྒྱ་ཆེན་གནང་བ་དང་། རྒྱལ་སྤྱིའི་ནང་བསྟན་ཆོས་ཚོགས་ཐེངས་ལྔ་པའི་ཐོག་རྒྱལ་བ་སྨན་རིའི་དཔོན་སློབ་འཕྲིན་ལས་ཉི་མ་མཆོག་དང་གསེར་ཞལ་མཇལ་འཛོམ་གྱི་རྒྱལ་བསྟན་སྤྱི་ལ་བཀའ་གྲོས་ལྷུག་པོར་མཛད་པ་དེ་ནི་མ་འོང་རྒྱལ་བསྟན་ཉི་ཟླའི་འོད་མདངས་འཛམ་གླིང་ཡོངས་ལ་དར་ཞིང་རྒྱས་པའི་དན་རྟགས་ཀྱང་ཡིན། སྤྱི་ལོ་༢༠༡༨ལོའི་ཟླ་༡༢་པའི་ཚེས་༢༦ཉིན་མཆོག་ཉིད་གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་གཞུང་ལས་ཁང་དུ་ཆེད་ཕེབས་གནང་སྟེ་རྒྱལ་ཁབ་རིམ་པའི་པར་སྐྲུན་ལས་གཞི་གཙོ་གནད་ཀྱི་གྲས་སུ་ཚུད་པའི། ཀྲུང་ཧྭའི་བཀའ་བསྟན་ཆེན་མོ་ལས་གཡུང་དྲུང་བོན་གྱི་བཀའ་འགྱུར་ཆེན་མོར་སྒྲིག་ཞུ་བྱེད་པའི་ལས་ཀའི་སྐོར་ལ་གཟིགས་ཞིབ་གནང་ཏེ། རྒྱལ་བའི་བཀའ་རིན་པོ་ཆེའི་མ་ཕྱི་གཏན་འབེབས་བྱ་བ་དང་། མ་དཔེ་དང་བུ་དཔེ་ཐོག་གཏུག་གི་བྱེད་ཕྱོགས། པར་གཞི་མི་འདྲ་བར་གཤིབ་བསྡུར་བྱེད་བཏང་དང་། དཔེ་རྙིང་འཚོལ་བསྡུ་ཇི་ལྟར་བྱེད་པ་བཅས་ཀྱི་སྐོར་ལ་ཡུལ་དངོས་རྟོག་ཞིབ་ཀྱི་གནས་ཚུལ་དང་འབྲེལ་ཏེ། མཉམ་འབྲེལ་ལྷན་ཚོགས་ཀྱི་སྔར་སོང་ལས་ཀའི་སྐོར་ལ་ཚད་མཐོའི་གདེང་འཇོག་གནང་བ་མ་ཟད་རྗེས་ཀྱི་བྱ་བར་བཀའ་སློབ་ལམ་སྟོན་གནང་དོན། རྒྱལ་ཁབ་དཔེ་སྐྲུན་མ་དངུལ་རོགས་སྐྱོར་གྱི་ལས་གཞིའི་རྣམ་གྲངས་ཏེ། རྒྱལ་བའི་བཀའ་རིན་པོ་ཆེ་པར་སྐྲུན་གྱི་ལས་གཞི་འདི་ཉིད་གཟི་བརྗིད་ལྡན་པའི་ངང་ལེགས་འགྲུབ་ཡོང་རྒྱུར་ང་ཚོ་ཚང་མས་ཕྱོགས་སོ་སོ་ནས་དཀའ་བ་དང་དུ་བླངས་ཏེ་གཟབ་ནན་ངང་སི་ཁྲོན་མི་རིགས་དཔེ་སྐྲུན་ཁང་གིས་དུས་ཚོད་གཏན་འཁེལ་ཐག་གཅད་ལྟར། རྒྱལ་ཁ་དང་གཟི་བརྗིད་ལྡན་པའི་ངང་ལེགས་འགྲུབ་ཡོང་དགོས་པའི་ཐད་ལ་ཐུགས་བསྐྱེད་ཟབ་མོ་དང་དགོངས་ཚུལ་ནན་གྱིས་བསྟན། བོད་རབ་བྱུང་བཅུ་བདུན་པའི་ས་ཕག་སྤྱི་ལོ་༢༠༡༩ལོའི་ནང་གདན་ས་དར་སྡིངས་སུ་ཕེབས་ཐེངས་མང་པོ་ཞབས་བཅག་མཛད་དེ་གནས་ཆེན་གསེར་སྒོ་ཁྲ་མོ་དང་ཁྲི་བརྟན་ནོར་བུའི་རྩེའི་སྒྲུབ་ཁང་གཉིས་ཀྱི་ཚོན་རྩི་དང་རྩིབས་གསོལ་སོགས་ཀྱི་སྐོར་ལ་ཕྱག་ལས་གནང་བ་དང་དགོན་འདིའི་རྟེན་གཙོ་སྤྲུལ་སྐུ་གཤེན་ཆེན་ཀླུ་དགའ་དང་གཤེན་གསང་བ་བསྡུས་པའི་སྐུ་བརྙན་སྲུང་མའི་སྐོར་སོགས་མང་བར་བཞེངས་གྲུབ་མཛད་པ་དང་ལོ་དེར་འཁོར་ཁང་ཆེ་མོའི་ས་འདུལ་རྨང་གཞི་གཏིང་གནང་བ་མ་ཟད། གྲོ་མོ་རྫོང་དུ་ཕེབས་ཏེ་རྫོང་དེའི་ཁོངས་སུ་ཡོད་པའི་གཡུང་དྲུང་བོན་གྱི་དགོན་པ་དང་དེ་གའི་ལྷ་སྡེ་མང་ཚོགས་རྣམས་ལ་སངས་རྒྱས་གཡུང་དྲུང་བོན་གྱི་བསྟན་པ་འཛིན་སྐྱོངས་ཐད་ལ་གཟིགས་རྟོགས་དང་བཀའ་སློབ་ལམ་སྟོན་ཡང་གནང་བ་སོགས།

  མདོར་ན་ད་ལྟ་རབ་བྱུང་བཅུ་བདུན་པའི་ས་མོ་ཕག་གི་ལོ་དགུང་གྲངས་དྲུག་བཅུ་རེ་བཞི་ལ་ཕེབས་པའི་བར་སྔ་ཕྱིར་ནག་ཆུ་དང་དབུས་གཙང་སོགས་སུ་ཕེབས་ཐེངས་མང་པོ་ཞབས་ཀྱི་བཅགས་ཏེ་བོན་དགོན་ཁག་ལ་རྟེན་བཞེངས་དང་བཀའ་སློབ། གཟིགས་སྐྱོང་བླ་ན་མ་མཆིས་པ་བསྩལ་གནང་བ་མ་ཟད། དེ་བཞིན་ལོ་རྒྱུས་ཐོག་རྩ་ཆེའི་གནས་རི་དང་གནས་མཚོ་སྒྲུབ་གནས་སོགས་ལ་སྲུང་སྐྱོབ་མཛད་གནང་བ་མ་ཟད་ལྷག་ཏུ་གནས་མཆོག་ཀོང་པོ་བོན་རིའི་འཁོར་ཡུག་སྲུང་སྐྱོབ་སྐོར་ལ་ཁོང་གིས་ཐེངས་མང་པོར་རྩ་ཆེའི་བཀའ་སློབ་ལམ་སྟོན་གཟིགས་སྐྱོང་གནང་བར་རླབས་ཆེན་གྱི་མཛད་བཟང་འཇོག་གནང་ཡོད། ད་ལྟའི་ཆར་ཡང་དམ་པ་གང་ཉིད་ཞྭ་དཀར་སངས་རྒྱས་གཡུང་དྲུང་བསྟན་པའི་བདག་ཉིད་དང་། རྒྱལ་གཅེས་ཆོས་གཅེས་ཀྱི་བླ་ཆེན་ཁོངས་སུ་ཡོད་ལ་འཛམ་གླིང་ཆོས་ཚོགས་ཀྱི་ལས་འཛིན་དང་། ཀྲུང་གོ་ནང་བསྟན་མཐུན་ཚོགས་ཀྱི་རྒྱུན་ལས་ལས་འཛིན། ལྗོངས་སྲིད་གྲོས་ཀྱི་རྒྱུན་ཨུད། ཀྲུང་གོ་ནང་བསྟན་མཐུན་ཚོགས་བོད་ཡན་ཡག་མཐུན་ཚོགས་ཀྱི་འཚོགས་གཙོ་སྐུ་གཞོན། དམུ་རིགས་གཤེན་གྱི་བསྟན་པ་གསས་ཁང་གསེར་སྒོ་ཁྲ་མོ་དང་རི་རྒྱལ་དགོན་ཁྲི་བརྟན་ནོར་གླིང་གི་དབུ་འཛིན་བཅས་གནང་མུས་ཡིན་ཞིང་། ཤེས་ཡོན་དང་བསམ་བློའི་གོ་རྟོགས་མཐོ་ལ། རྒྱལ་གཅེས་ཆོས་གཅེས་ཀྱི་ལངས་ཕྱོགས་བརྟན་ཞིང་། ཉིད་ཀྱིས་དུས་དང་རྣམ་པ་ཀུན་ཏུ་རིས་མེད་ཀྱི་ཉམ་ཐག་འགྲོ་ལ་སྙིང་རྗེས་ཐུགས་དགོངས་ཟབ་བཞེད་དང་། རྒྱལ་གཅེས་ཆོས་གཅེས་ཀྱི་བསམ་བློའི་བསླབ་བྱ་རྒྱུན་པར་དྲིལ་བསྒྲགས་དང་ལྷག་པར་ཆོས་ལུགས་གྲུབ་མཐའ་ཕན་ཚུན་དབར་གཅིག་ཕན་གཅིག་རོགས་ཀྱིས་མཛའ་བཤེས་དང་། མི་རིགས་མཐུན་སྒྲིལ་སློབ་གསོ་བཅས་ནམ་ཡང་མི་དོར་བ། མ་ཟད་དགེ་སྒྲུབ་སྡིག་སྤང་དང་ཡ་རབས་ཀྱི་སྤྱོད་བཟང་མི་དོར་བ་བཅས་བྱེད་དགོས་པའི་སྐོར་གྱི་ཞལ་ཏ་དད་ལྡན་མང་ཚོགས་ལ་གནང་བ་དང་། ལྷག་ཏུ་ཞྭ་དཀར་གཡུང་དྲུང་བོན་ལུགས་འཛིན་པ་ཡོངས་ཀྱི་སྐྱབས་མགོན་རྒྱལ་བ་གཤེན་གྱི་བསྟན་པའི་མངའ་བདག་གཅིག་པུ་དེ་ཡིན་ཞིང་། ད་ལྟ་གཤེན་གྱི་ཕོ་བྲང་ཉིད་དུ་བདག་ཅག་བསོད་ལྡན་ཡོངས་ཀྱི་མགོན་དུ་རྒྱལ་བསྟན་འཁོར་ལོ་གསུམ་གྱི་མཛད་བཟང་སྐྱོང་བཞིན་བཞུགས་པ་བཅས་ཀྱི་རྣམ་ཐར་མདོར་བསྡུས་སོ། །

གཤེན་སྲ༵ས་ཆེན་པོའི་གསེར་ཞལ་བཙོ་མའི་མདངས། །

རྨད་བྱུང་གསང་གསུམ་ནོར༷་བུ༵་རིན་པོ་ཆེ། །

དབ༵ང་མཆོག་རི་ནས་རྒྱ༵ལ་བསྟན་ཉེར་བཞེངས་པ། །

གང་གི་སྐུ་ཚེ་གེགས་མེད་རྟག་བརྟན་ཤོག །

  གཤེན་སྲས་ནོར་བུ་དབང་རྒྱལ་མཆོག་གི་ལྕམ་ནི་མཁའ་འགྲོའི་མཚན་ཐོབ་པ་དང་། རྟགས་མཚན་ཡོད་པའི་བུ་མོ་ཁག་གཅིག་གདམ་གསེས་བྱས་ཏེ། རྟགས་རིལ་གྱི་མཚན་རྟགས་བཀོད་ནས་དེའི་ནང་ཐོན་པའི་ཡབ་རིགས་རུས་གཙང་མ་རོང་པོ་རིག་འཛིན་དང་ཡུམ་རིགས་རུས་ཁྱད་པར་ཅན་དྭངས་རྭ་གྷུ་རུ་བླ་མའི་རྒྱུད་པ་སྨུག་སྡིལ་གཉིས་ཀྱི་སྲས་མོ་མཚན་ལྡན་གྱི་མཁའ་འགྲོ་ཉི་མ་མཚོ་མོ་བྱ་བ་རིགས་རྒྱུད་ཤིན་ཏུ་བཟང་ལ་ངང་རྒྱུད་འཇམ་ཞིང་རིང་བ། བཞིན་འཛུམ་བག་ཡོད་ལྡན་ཞིང་ཉམས་ཐག་གི་འགྲོ་ལ་ཕན་སེམས་ཆེ་བ། དད་པ་དང་དག་སྣང་ཆེ་ལ། བསྟན་པ་རིན་པོ་ཆེར་ལྷག་བསམ་དཀར་ལ་བྱམས་དང་སྙིང་རྗེ་ལྡན་ཞིང་ཅི་ཡོད་སྦྱིན་པ་ལ་དགའ་བ། ཕྱག་བསྐོར་དང་ཁ་འདོན་བཟླས་བརྗོད་ལ་བརྩོན་པ་བཅས་མཛངས་ཡོན་ནི་བརྗོད་ལས་འདས་ཤིང་ཡེ་ཤེས་ཀྱི་མཁའ་འགྲོའི་མཚན་རྟགས་དང་ལྡན་པ་ཉི་མའི་མཚན་ཅན་དང་ཁོང་རྣམ་གཉིས་ལ་སྲས་སྐུ་མཆེད་ལྔ་བྱུང་ཡང་འཁྲུངས་པའི་དང་པོ་སྲས་པོ་སྟེ་བོད་རབ་བྱུང་བཅུ་དྲུག་པའི་ཤིང་ཕོ་བྱི་བ་སྤྱི་ལོ་༡༩༨༤ནག་པ་ཟླ་བའི་ཡར་ཚེས་གཟའ་དཀར་འཕྲོད་སྦྱོར་དགེ་བའི་ཉིན་ཞིག་ལ་གཤེན་སྲས་མཚན་བཟང་པོ་དཔེ་བྱེད་འབར་བ་བལྟ་བའི་མཆོག་མི་ཤེས་ཞིག་གཟུགས་སྐུ་འཁྲུངས་ཤིང་ཟླ་བ་དགུ་བཞུགས་སྟེ། གློ་བུར་དུ་ང་ཚོ་ཆེས་ཕངས་ཤིང་འགྱོད་པ་ནི་ཁོང་ཉིད་འདུལ་བྱ་གཞན་དུ་ཕེབས་པས་ངེད་ཅག་བསོད་ནམས་ཀྱི་སྐལ་བ་དམའ་སྟབས་ལོ་དེ་ཡི་ཟླ་བ་བཅུ་གཉིས་པའི་གནམ་གང་ཉིན་ཞོགས་པའི་ཉི་མ་རྩེ་ཤར་ཙམ་ལ་དགོངས་པ་བོན་ཉིད་ཀྱི་དབྱིངས་སུ་གཟིགས་ཚུལ་བསྟན། སྐབས་དེར་གཤེན་རིན་པོ་ཆེ་ཁོང་ཉིད་བསམ་བརྗོད་ལས་འདས་པའི་ཐུགས་ཕམ་བྱུང་ཞིང་ཧོར་རྒྱལ་སྲས་བླ་མ་གཡུང་དྲུང་རྒྱལ་བ་མཆོག་གིས་ཀྱང་ཐུགས་ཕམ་གྱི་སྒོ་ནས་ད་གཞན་ཅི་བྱ་མེད་པས་གདུང་སྲས་ཀྱི་སྐུ་གདུང་དེ་ཉིད་ཀླུ་ཕུག་དགོན་དུ་གདན་འདྲེན་ཞུས་ཏེ་དེར་ཞུགས་འབུལ་བྱེད་དགོས་གསུངས་ཤིང་དེར་ཁོང་གིས་ཆོག་མཆན་གྱི་ཕྱག་བྲིས་སོགས་གནང་། དེ་ནས་ཐུགས་རྗེའི་དཀའ་དྲིན་བླ་ན་མེད་པ་གྲུབ་དབང་བསྟན་པའི་ཉི་མ་རིན་པོ་ཆེ་མཆོག་གིས་ཀྱང་ཐུགས་ཡིད་ཚད་མེད་སྐྱོ་བ་དང་ཅི་བྱ་ལྟོས་བྲལ་གྱི་ངང་ནས་རིགས་སྲས་ཀྱི་སྐུ་གདུང་དེ་ཉིད་དཔལ་གཤེན་བསྟན་ཀླུ་ཕུག་གཡུང་དྲུང་བདེ་ཆེན་གླིང་དུ་གདན་འདྲེན་ཞུས་ཤིང་ཀུན་རིགས་ལས་གཞི་རྒྱུན་ལྔའི་དཀྱིལ་འཁོར་རྒྱས་པ་ཞལ་ཕྱེས་ཏེ་གདུང་ཞུགས་འབུལ་མཛད། ཞི་ཁྲོ་ཁྲི་མཆོད་སོགས་གདུང་སྲས་དེ་ཉིད་ཀྱི་དགོངས་རྫོགས་མཆོད་སྤྲིན་ལེགས་པར་ཕུལ་བ་དང་། སྐུ་གདུང་བཞུས་སྐབས་ནས་བྱོན་པའི་རིང་བསྲེལ་སོགས་ངོ་མཚར་ཆེ་བའི་བྱིན་རྟེན་བྱུང་བ་རྣམས་གཟུང་བཞུགས་སུ་ཕུལ་བའི་རྣམ་རྒྱལ་མཆོད་རྟེན་རྒྱུ་ལི་ལས་གྲུབ་པ་ཆེ་ཆུང་ཐོ་གང་གི་ཚད་ཙམ་ཞིག་བཞེངས་པར་མཛད་དོ། དེ་འོག་བགྲེས་པ་གཉིས་སྲས་མོ་སྟེ། ཆེ་བ་བསོད་ནམས་ལྷ་སྐྱིད་ལགས་ནི་མེ་སྟག་ལོར་འཁྲུངས་ཤིང་བོད་ལྗོངས་སྨན་རྩིས་སློབ་ཆེན་ནས་ཐོན་ཞིང་ད་ལྟ་ལྗོངས་སྨན་རྩིས་ཁང་ནང་ཕྱག་ལས་གནང་བཞིན་ཡོད། དེ་འོག་གཅུང་མོ་བསོད་ནམས་གཡང་སྐྱིད་ལགས་ནི་ས་འབྲུག་ལོར་འཁྲུངས་ཤིང་པེ་ཅིང་མི་རིགས་སློབ་ཆེན་ནས་ཐོན་ཞིང་ད་ལྟ་ལྷ་ས་སྟོད་ལུང་བདེ་ཆེན་རྫོང་དྲིལ་བསྒྲགས་ལས་ཁུངས་ནང་ཕྱག་ལས་གནང་བཞིན་ཡོད།


གདན་སའི་ཁྲི་འཛིན་སོ་དྲུག་པ་གཤེན་སྲས་གཙུག་ཕུད་རྣམ་གྲོལ་རྒྱལ་མཚན་མཆོག་གི་མཛད་རྣམ།

དམུ་རྒྱལ་མཁྱེན་བརྩེའི་ཡེ་ཤེས་དཀྱིལ་འཁོར་ནས། །

རྒྱལ་སྲས་སེམས་པའི་ངོ་བོ་གཅིག་བསྡུས་པ། །

གཤེན་བསྟན་འཕྲིན་ལས་རྒྱས་པའི་སྐྱ་རེངས་ཏེ། །

མཁན་ཆེན་གཙུ༵ག་ཕུ༵ད་རྣ༵མ་གྲོལ༵་རྒྱ༵ལ་མཚ༵ན་རྒྱལ། །

  ཞེས་མཆོད་པར་བྱས་ཏེ་ཕྱོགས་བཅུའི་དུས་གསུམ་གྱི་རྒྱལ་བ་ཐམས་ཅད་ཐུགས་ཀྱི་ངོ་བོ་གཅིག་ཏུ་བསྡུས་པའི་བདག་ཉིད་སྤྲུལ་བའི་སྐུ་མཆོག་དམུ་རྒྱལ་གཤེན་གྱི་གདུང་སྲས་མཁན་ཆེན་འགྲོ་བའི་མགོན་པོ་༧གཙུག་ཕུད་རྣམ་གྲོལ་རྒྱལ་མཚན་མཆོག་ནི། གངས་ལྗོངས་འཛིན་མའི་དབུས་སུ་མཚན་སྙན་གྱི་བ་དན་སྲིད་རྩེ་རུ་སྒྲེང་ཞིང་མཛད་བཟང་ལྷག་བསམ་གྱི་དུང་ཟླ་རིས་མེད་མཁའ་དབྱིངས་ན་བདལ་བའི་དམུ་རིགས་གཤེན་གྱི་གདུང་རྒྱུད་ལས་བྱོན་པའི་ཡབ་དམུ་གཤེན་ཆེན་པོ་ནོར་བུ་དབང་གི་རྒྱལ་པོ་མཆོག་དང་། ཡུམ་མཁའ་འགྲོའི་མཚན་རྟགས་ཡོངས་སུ་ཚང་བ་རོང་པོ་ཉི་མ་མཚོ་མོ་གཉིས་ལས་བསོད་ནམས་དཔལ་འབྱོར་རབ་ཏུ་རྒྱས་ཤིང་རིགས་བཟང་ཁུངས་བཙུན་གྱི་ཡབ་ཡུམ་ལས། མཁའ་འགྲོའི་དགོངས་རྟགས་བཞིན། འབྱུང་ལྡན་སུམ་བརྒྱ་དང་གཅིག་བོད་རབ་བྱུང་བཅུ་བདུན་པའི་མཐོང་ལྡན་ཞེས་པ་ཆུ་ཕོ་སྤྲེའུ་(སྤྱི་ལོ་༡༩༩༢སྤྱི་ཟླ་༢ཚེས་༡༡)བདག་ཅག་གི་སྟོན་པ་སངས་རྒྱས་སྐུ་བལྟམས་པའི་དུས་ཁྱད་པར་ཅན་ཧོར་ཟླ་བཅུ་གཉིས་ཕྱི་མའི་ཚེས་བརྒྱད། གཟའ་མིག་དམར། ཐ་སྐར་འགྲུབ་སྦྱོར་འཛོམས་པའི་ཚེས་བཟང་ཉིན་གྱི་ཆུ་ཚོད་བཅུ་གཉིས་སྔ་ཆ་ཙམ་ལ་འཇའ་འོད་འཁྲིགས་ཤིང་། བཀྲ་ཤིས་པའི་དགེ་རྟགས་དང་བཅས་ངོ་མཚར་ཆེ་བའི་གཟུགས་སྐུ་མངོན་པར་བལྟམས་ཤིང་ཨུ་དུམ་ཝ་རེའི་མེ་ཏོག་གིས། ཤམ་པོ་ལྷ་རྩེ་བཀོད་པ་གསར་དུ་མཛེས་ཞེས་གསུངས་པ་ལྟར་མཛེས་སྐུའི་ཉི་གཞོན་གསར་བ་མཁའ་རུ་འཛུམ་ཞིང་། གཤེན་རབ་ཚེ་དབང་ཞེས་པའི་མཚན་གསོལ་མཛད། དེ་ནས་སྐུ་བྱིས་པའི་དུས་ཡབ་ཡུམ་གཉིས་ཀྱིས་ཁོང་གི་སྐུ་ཚེ་ལ་བར་ཆད་མི་ཡོང་བའི་རྩ་ཆེའི་གཟིགས་སྐྱོང་འོག་སྐུ་གཞོན་ནུའི་དུས་འདས། དགུང་ལོ་ལྔ་ཕེབས་ཐོག་སྤྱི་ལོ་༡༩༩༦ལོའི་བོད་ཟླ་བརྒྱད་པའི་ཚེས་བདུན་ཉིན་སྐྱབས་རྗེ་སྨན་རིའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་མཆོག་གིས་ཚེ་རིང་སྐྲ་ཕུད་བཞེས་ཏེ། མཚན་ལ་གཤེན་སྲས་གཙུག་ཕུད་རྣམ་གྲོལ་རྒྱལ་མཚན་ཞེས་གསོལ། དགུང་ལོ་དགུ་བཞེས་ཏེ་སྤྱི་ལོ་༢༠༠༠ལོའི་བོད་ཟླ་བདུན་པའི་ཚེས་བརྒྱད་ཉིན་གྲུབ་དབང་སྤྲུལ་སྐུ་བསྟན་པའི་ཉི་མ་མཆོག་གིས་གཟའ་སྐར་འཕྲོད་སྦྱོར་གཟིགས་ཏེ། ལྷག་པ་ལྷ་མཚམས་འགྲུབ་སྦྱོར། ས་ཆུ། འཕེལ་ཉི། གཞོན། བཀྲ་ཤིས་ཉི་མ། རྩིས་གཞུང་ལས། ལྷ་མཚམས་སྐར་བཞི་གླང་པོའི་དབྱིབས། རབ་བྱུང་རབ་གནས་ལྷ་གཡང་སྨན། དགེ་ལས་ཆོས་འདོན་མཆོད་རྟེན་བཞེངས། ཡུལ་བཟུང་སློབ་གཉེར་ཚུར་ལེན་བཟང་ཞེས་གསུངས་པ་བཞིན་དེ་ཉིན་གྲུབ་དབང་བསྟན་པའི་ཉི་མ་མཆོག་གིས་སྨྲ་སེང་དཀར་པོ་གཅིག་སྒྲུབ་ཀྱི་ལུང་གནང་སྟེ། ཡོངས་འཛིན་ཚེ་རིང་རྒྱས་ལས་ཐོག་མར་ཡོན་ཏན་ཀུན་གྱི་གཞི་མ་འབྲི་ཀློག་འདོན་གསུམ་ལ་སྦྱངས་འགོ་ཚུགས། ཁོང་ནི་སྐུ་ན་ཆུང་ངུའི་དུས་ནས་རྒྱུད་ལ་བྱམས་དང་སྙིང་རྗེ་ཆེན་པོ་ལྡན་ཏེ་ཐུགས་རྒྱུད་ལ་གཞན་ཕན་གྱིས་གང་བ། ཟང་ཟིང་འཁོར་བའི་ལས་ལ་སྙིང་རྗེ་དང་འབག་བཙོག་གི་གནས་སུ་གཟིགས་ཏེ་ཤ་རིགས་སོགས་མི་གཙང་བའི་ཟས་རྣམས་བཞེས་རྒྱུར་མི་དགའ་བ། ང་ཆེ་ཁེངས་དྲེགས་དང་བདག་འཛིན་ཕྱོགས་རིས་སོགས་ཀྱི་དབེན་པས་ཞི་བ་བྱང་སེམས་ཀྱི་ཕྱུག་ཅིང་ཀུན་གྱི་དད་པའི་དང་བ་འདྲེན་པ་དམ་པའི་རང་གཤིས་ཀྱི་རྟགས་ཁོ་ནར་མཛད་པ་སོགས་དཀར་ཕྱོགས་ལྷ་མི་ཀུན་གྱིས་སྨོན་པའི་ཕུན་ཚོགས་ཀྱི་མཚན་སྙན་བརྗོད་ལས་འདས་པ་དང་། ཁོང་ལ་སྐྱེས་སྟོབས་ཀྱི་ཤེས་རབ་དང་ཡོན་ཏན་ཕུན་སུམ་ཚོགས་ཤིང་རིང་མིན་ཡོན་ཏན་ཀུན་གྱི་གཞི་མ་འབྲི་ཀློག་འདོན་གསུམ་སོགས་ལ་དཀའ་ཚེགས་མེད་པར་མཁྱེན་པ་བྱུང་ཞིང་། ཐ་སྙད་ཤེས་བྱའི་རིགས་ཐ་དག་ལན་རེ་ཙམ་གྱིས་མཁྱེན་པར་གྱུར་བ་དང་། ཆུང་ནས་ཐོས་བསམ་ལ་སྦྱངས་པས་རིག་གནས་ལ་མཁས་ཤིང་ཁྱད་པར་དུ་སྲིད་པའི་ཕུན་ཚོགས་ལ་མི་མཉེས་ཤིང་། དེ་ལྟ་བུའི་དགེ་མཚན་རབ་ཏུ་གཡོ་བའི་ཉེར་ལེན་ལ་བརྟེན་ནས། ༢༠༠༢ལོའི་བོད་ཟླ་བརྒྱད་པའི་ཚེས་ཉི་ཤུ་གཅིག་ཉིན་རྒྱལ་བ་སྨན་རིའི་ཡོངས་འཛིན་རིན་པོ་ཆེ་བསྟན་འཛིན་རྣམ་དག་མཆོག་གིས་མ་རྒྱུད་དབང་བཞི་ཚང་མ་དང་། ཚེ་དབང་བོད་ཡུལ་མའི་དབང་དང་། སྲིད་རྒྱལ་མི་དྲེད་མའི་བཀའ་གཏད་སྣང་བ་དང་། དེའི་རྗེས་སུ་ཡོངས་འཛིན་མཆོག་གངས་ལྗོངས་སུ་ཕེབས་ཐེངས་གསུམ་པ་བསྐྱངས་སྐབས་སྒྲིབ་སྦྱོང་མུན་སེལ་སྒྲོན་མའི་དབང་ཁྲིད་དང་། བླ་བླུ་མཆི་བླུ་བཅས་ཀྱི་ལུང་དང་སྙན་རྒྱུད་ཀྱི་ཁྲིད་ལུང་དང་། བྱང་སེམས་ཀྱི་ཁྲིད་བཅས་ཕུལ་གནང་། མཁན་ཆེན་ལུང་རྟོགས་བསྟན་པའི་ཉི་མ་མཆོག་གིས་ཁོང་ལ་རྒྱལ་ཐེབ་དབང་ཁྲིད་ཕུལ་གནང་མཛད། སྐྱང་སྤྲུལ་དྲི་མེད་འོད་ཟེར་མཆོག་གིས་ཨ་སྙན་རྫོགས་གསུམ་དང་བདེ་སྨོན་རྣམ་གསུམ་བཅས་ཀྱི་ལུང་ཕུལ་གནང་མཛད། གྲུབ་དབང་སྤྲུལ་སྐུ་བསྟན་པའི་ཉི་མ་མཆོག་གིས་རྒྱལ་ཡུམ་བྱམས་མའི་དབང་གཞི་ལུང་དང་བཅས་པ་ཆབ་ཅིག་ཏུ་ཕུལ་བ་དང་།གྲུབ་དབང་བླ་མ་སྒྲུབ་པའི་དབང་ལུང་ཆ་ཚང་དང་གདུགས་དཀར་དབང་དང་ཚེ་མཆོག་མཐའ་ཡས་དབང་ལུང་ཆ་ཚང་དང་། ཞིང་སྐྱོང་ལྷ་མོའི་གཉེར་གདམས་བཅས་ཕུལ་ཡོད། ཆུ་མོ་ལུག་སྤྱི་ལོ་༢༠༠༣ལོའི་ཟླ་བ་༧པའི་ཚེས༡༧པ་སངས་ནམ་གྲུའི་འགྲུབ་སྦྱོར་ཉིན་གཤེན་རྒྱལ་ཡབ་སྲས་གསུམ་ལྷན་བཞུགས་ཀྱི་གནས་ཆེན་གསེར་སྒོ་ཁྲ་མོ་དང་རི་རྒྱལ་དགོན་ཁྲི་བརྟན་ནོར་བུའི་རྩེར་ཁྲི་གསོལ་མཛད་པའི་སྐལ་བཟང་ཉིན་གྲུབ་དབང་བསྟན་པའི་ཉི་མ་མཆོག་གིས་རང་གི་སྣང་ངོར་རིག་པ་དྭངས་གསལ་གྱི་ཉམས་དགེའི་སྤྲོ་སྣང་བྱུང་སྐབས་ཡབ་སྲས་གསུམ་ལ་གསོལ་འདེབས་ཞབས་བརྟན་རེ་རྟེན་འབྲེལ་གྱི་ཚུལ་དུ་ཕུལ། དེའི་ཉིན་བླ་གྲྭ་ཚང་མས་གཟབ་སྤྲོས་ལེགས་པར་གསོལ་ནས་བསང་སྤོས་དྲི་བཟང་གི་དུད་སྤྲིན་དང་རྔ་གཤང་དུང་གླིང་གི་སྒྲ་སོགས་མཆོད་པའི་བྱེ་བྲག་སྣ་ཚོགས་དང་བཅས་སེར་འཕྲིང་གི་བསུ་མའི་ཁྲོད་ནས་གཤེན་གྱི་བླ་རབས་རིམ་བྱོན་གྱི་བཞུགས་ཁྲིའི་སྟེང་དུ་ཞབས་སོར་ལེགས་པར་བཀོད་དེ་བླ་གྲྭ་རྣམས་ཀྱིས་སྐུ་གསུང་ཐུགས་རྟེན་མཎྚལ་དང་བཅས་ཕུལ། དེ་རྗེས་དད་ལྡན་མང་ཚོགས་རྣམས་ནས་ཀྱང་འཇལ་ཁ་དང་རྟེན་འབྲེལ་ཀྱང་ཞུས། ལོ་འདི་ནས་བཟུང་ལོ་མང་རིང་བཀའ་དྲིན་མཚུངས་མེད་ངེས་པ་དོན་གྱི་ཡོངས་འཛིན་རིན་པོ་ཆེ་སྐལ་བཟང་རྒྱས་སོགས་མཁས་ཤིང་གྲུབ་པའི་དགེ་བའི་བཤེས་གཉེན་མང་པོར་གཏུགས་ཏེ། མདོ་སྔགས་སེམས་གསུམ་སོགས་བཅུ་ཕྲག་རིག་པའི་གནས་ཀུན་གྱི་གཞུང་དོན་དང་རིག་གནས་སྤྱི་དང་བྱེ་ཕྲག་གང་སྤྱིར་བརྩོན་པར་སྦྱངས་ནས་ཐོས་བསམ་སྒོམ་གསུམ་གྱི་སྒྲོ་འདོགས་བཅོད་དང་བཅོད་མུས་སུ་བཞུགས། སྤྱི་ལོ་༢༠༠༨ལོའི་ནང་སོག་སྡེ་བོན་དགོན་དཔལ་ལྡན་ནོར་བུའི་གླིང་དུ་ཕེབས་ཏེ་ལོ་འདིའི་ཟླ་བ་༩པའི་ཚེས་༢༦ཉིན་དགོན་འདིའི་བཤད་སྒྲུབ་སྒོམ་གསུམ་གྱི་དབུ་འབྱེད་མཛད་སྒོར་བཞུགས། སྤྱི་ལོ་༢༠༡༠ལོའི་བོད་ཟླ་དང་པོའི་ཚེས་ལྔ་སྟེ་མཉམ་མེད་ཆེན་པོའི་དུས་ཆེན་ཉིན་གདན་ས་གཡུང་དྲུང་གླིང་དུ་མཁན་པོ་བསྐོ་བཞག་གི་རྟགས་ཀྱི་རིལ་བུའི་དབུ་ལེན་པའི་ཆོ་ག་གཡུང་དྲུང་གླིང་མཁན་རབས་གོང་མ་རྣམས་པའི་ཐུགས་དམ་ཕུར་བའི་སྟོང་ཚོགས་ཕུལ་སྐབས་སྒྲུབ་བཞག་ནང་དབུ་བཞུགས་མཛད། དེ་རྗེས་ཚེས་ཉེར་བརྒྱད་ཉིན་བླ་སྤྲུལ་འཐུས་མི་དང་གྲྭ་མང་ཚང་མའི་སྐུ་མདུན་དུ་རྟགས་རིལ་ཞལ་ཕྱེས་ཏེ་མཚན་རྟགས་དེ་དགེ་བཤེས་བསམ་བརྟན་འགྱུར་མེད་ལ་བབས་འདུག་ཅེས་ཁྱབ་བསྒྲགས་གནང་བས་དེར་ཡོད་བླ་གྲྭ་ཚང་མས་ལྷ་རྒྱལ་ཕྱེ་མར་ཕུད་གཏོར་གྱིས་རྟེན་འབྲེལ་ཞུས། གཤེན་རིན་པོ་ཆེས་ཁོང་ལ་རྟགས་རིལ་གྱི་དབང་བསྐུར་ནས་གྲྭ་མང་འཚོགས་པའི་དཀྱིལ་དུ་དམ་བཅའ་བཞག་ནས་འགྲོ་ཀུན་ཕན་བདེར་འགོད་པའི་ཐུགས་སྨོན་ཡང་གནང་། སྤྱི་ལོ་༢༠༡༥ལོར་བོད་ལྗོངས་ནང་བསྟན་སློབ་གྲྭ་ཆེན་མོའི་ནང་ཕེངས་སྟེ་སྤྱིར་བོད་རང་ལྗོངས་ཀྱི་ཆོས་ལུགས་ལས་རིགས་སྡེ་ཁག་དང་བོད་ལྗོངས་ནང་བསྟན་སློབ་གྲྭ་ཆེ་མོའི་དགེ་རྒན་རྣམ་པ། ཁྱད་པར་སློབ་གླིང་འདིའི་རིས་མེད་གླིང་གཙོ་རིན་པོ་ཆེ་༧སྒྲུབ་ཁང་ཐུབ་བསྟན་མཁས་གྲུབ་མཆོག་གིས་༧རྒྱལ་བ་གཤེན་གྱི་གདུང་སྲས་རྣམ་གཉིས་ལ་ཐུགས་གཟིགས་རྒྱ་ཆེར་གནང་སྟེ་མི་ལོ་ལྔའི་རིང་ལ་ཐུགས་ཁུར་བླ་མེད་མཛད་པ་དང་། རིམ་བཞིན་གྲུབ་མཐའ་རིས་མེད་ཀྱི་བསྡུས་གྲྭ་དང་ཚད་མ། ཕར་ཕྱིན། དབུ་མ། མཛོད། འདུལ་བ་བཅས་ལ་སློབ་གླིང་གི་སྒྲིག་གཞི་བཞིན་དུ་སློབ་གཉེར་ཚུལ་བཞིན་གནང་བ་དང་། ཁྱད་པར་དུ་ཡོངས་འཛིན་སློབ་དཔོན་དགེ་བའི་བཤེས་གཉེན་ཆེ་མོ་༧སྐལ་བཟང་ཚུལ་ཁྲིམས་མཆོག་གིས་གདུང་སྲས་རྣམ་གཉིས་ལ་ཟུར་དུ་བོན་རང་ལུགས་ཀྱི་མཁན་ཆེན་ཉི་མས་མཛད་པའི་སུམ་ལྡན་སྡུད་གྲྭ་མཐའ་དཔྱད་དང་། རྗེ་མཉམ་མེད་ཆེན་པོས་མཛད་པའི་ཚད་མ་རྣམ་འབྱེད་ཕྲུལ་གྱི་སྒྲོན་མེ། སྟོན་པའི་ཐེག་འགྲེལ་མེ་ལོང་དགུ་སྐོར་ཆ་ཚང་། མཚན་ཉིད་གསུམ་གྱི་རྣམ་གཞག མཁན་ཆེན་ཉི་མས་མཛད་པའི་ཤེར་ཕྱིན་མངོན་རྟོགས་རྒྱན་གྱི་སྐབས་དང་པོའི་རྣམ་བཤད་ཚིག་དོན་དཀའ་གནད་རབ་གསལ། གཤེན་སྟོན་ནམ་མཁས་མཛད་པའི་ལམ་རིམ་སུམ་བརྒྱ་བའི་འགྲེལ་བ་སོགས་ཟབ་ཁྲིད་རྒྱས་པར་ཞུས་པ་མ་ཟད། གྲུབ་མཐའ་རིས་མེད་ཀྱི་དགེ་བའི་བཤེས་གཉེན་མང་པོའི་མདུན་ནས་རྙིང་མ་བའི་ལམ་རིམ་ཀུན་བཟང་བླ་མའི་ཞལ་ལུང་དང་། ས་སྐྱ་བའི་ལམ་རིམ་ཐུབ་པའི་དགོངས་པ་རབ་གསལ། བཀའ་རྒྱུད་པའི་ལམ་རིམ་དྭགས་པོ་ཐར་རྒྱན། དགེ་ལུགས་པའི་ལམ་རིམ་ཆེ་མོ་སོགས་ལ་ཐོས་བསམ་ཡང་དག་གནང་བ་དང་། དེ་བཞིན་མཐུན་མོང་གི་རིག་པའི་གནས་ཆེན་སུམ་རྟགས་དག་གསུམ་དང་། རྩིས་ སྙན་ངག་ སྒྲ་ སྡེབ་སྦྱོར་སོགས་ལ་སྦྱངས་པ་མཐར་ཕྱིན་གནང་བར་མཛད་དེ། སྤྱི་ལོ་༢༠༡༩ལོའི་ཟླ་བ་༦པའི་ཚེས་༢༦ཉིན་འབྲིང་རིམ་རབ་འབྱམས་པའི་སློབ་མཐར་ཕྱིན་པའི་ཕྱག་འཁྱེར་ཐོབ་པ་དང་མཐར་ཕྱིན་དཔྱད་རྩོམ་༼སྐྱབས་འགྲོའི་སྐོར་ཅུང་ཙམ་གླིང་བ་༽ཞེས་པའི་དཔྱད་རྩོམ་ཡང་སྤེལ་བར་གྲུབ་མཐའ་རིས་མེད་ཀྱི་མཁས་དབང་རྣམས་པས་མངག་བརྗོད་ཡང་མཛད་པའོ། །

སྐུ་ཆུང་དམུ་རིགས་གཤེན་གྱི་གདུང་འཛིན་གཤེན་སྲས་གཡུང་དྲུང་རང་གྲོལ་ཉི་མ་རིན་པོ་ཆེའམ་གཤེན་སྲས་ཚེ་དབང་བསྟན་འཛིན་མཆོག་གི་མཛད་རྣམ།

དམར་སེར་ཐུན་མཚམས་གསར་པའི་ཀློང་རུམ་ནས། །

རྨད་བྱུང་ཚོགས་གཉིས་ཉིན་བྱེད་གཞོན་ནུའི་དཔལ། །

འགྲོ་ལ་དགྱེས་བརྩེའི་འཛུམ་རླབས་གཡོ་བ་ཡིས། །

སྲིད་ཞིའི་གཙུག་ཏུ་མངོན་འཕགས་གཤེན་སྲས་མཆོད། །

  ཅེས་བསྟོད་ཚིག་ངག་གི་ཨཏྤལ་ཅི་ཡང་འཐོར་ཞིང་བརྗོད་པར་བྱེད་པ་ལ། དེ་ཡང་འདི་སྐད་ཅེས་བདག་གིས་མཐོང་ཞིང་ཐོས་ཏེ། འོ་སྐོལ་འཇིག་རྟེན་ན་འགྲོ་བ་ལྷ་དང་བཅས་པའི་སྐྱེ་དགུ་མཐའ་དག་གི་སྐྱབས་གནས་གཅིག་པུར་གྱུར་པ། མཚུངས་མེད་སྟོན་པའི་གཙོ་བོ་ཀུན་མཁྱེན་དམུ་རྒྱལ་སྲས་པོ་དེ་ཉིད་ཀྱི་གདུང་འཛིན་ཞྭ་དཀར་བསྟན་པའི་གཙུག་རྒྱན་རྒྱལ་བ་གཤེན་སྲས་མཆོག་གི་འཁྲུངས་དུས་ནི། གངས་རིའི་ཕྲེང་བས་བསྐོར་བའི་ཡུལ་ལྗོངས་འདིར། སྙིགས་མའི་དུས་ཀྱི་གདུལ་དཀའི་ཚོགས་རྣམས་རྗེས་སུ་བཟུང་བའི་ཕྱིར། རང་གཞན་ཀུན་གྱི་དད་པའི་གསོས་སུ་བོད་རབ་བྱུང་བཅུ་བདུན་པའི་ཕན་བདེ་ཞེས་པ་ཤིང་ཕོ་ཁྱི་ཡི་ལོ་(སྤྱི་ལོ་༡༩༩༤སྤྱི་ཟླ་༥་ཚེས་༥)ཧོར་ཟླ་གསུམ་པའི་ཚེས་ཉི་ཤུ་ལྔ་ཉིན། གཟའ་ཕུར་བུ། སྐར་མ་ནམ་གྲུ། ས་རླུང་། མཚན་མོའི་ཆུ་ཚོད་གཉིས་དང་སྐར་མ་གསུམ་ཐོག་ངོ་མཚར་གྱི་བཟང་ལྟས་དུ་མ་དང་བཅས་གཟུགས་སྐུ་མངོན་པར་བལྟམས་ཤིང་ཡབ་ཀྱིས་ཁོང་གི་མཚན་ལ་ཚེ་དབང་བསྟན་འཛིན་ཞེས་གསོལ། ཁོང་སྐུ་བྱིས་པའི་དུས་ནས་ཐུགས་རྒྱུད་དུལ་བ་དང་མཛད་སྤྱོད་བཟང་བ་སོགས་སྐུ་གསུང་ཐུགས་ཀྱི་རྣམ་འགྱུར་མཐའ་དག་གང་ནས་བལྟས་ཀྱང་སྐྱེས་བུ་དམ་པའི་རང་རྟགས་ཡོངས་སུ་མངའ་བ་སྔོན་ནས་བསོད་ནམས་བསགས་པའི་སྐྱེས་བུའི་ངང་ཚུལ་ལྷན་སྐྱེས་སུ་ལྡན་ཡོད། དགུང་ལོ་གསུམ་ལ་ཕེབས་ཐོག་སྤྱི་ལོ་༡༩༩༦ལོའི་བོད་ཟླ་བརྒྱད་པའི་ཚེས་བདུན་ཉིན་སྐྱབས་རྗེ་སྨན་རིའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་མཆོག་གིས་ཚེ་རིང་སྐྲ་ཕུད་བཞེས་ཏེ་མཚན་ལ་གཤེན་སྲས་གཡུང་དྲུང་རང་གྲོལ་ཉི་མ་ཞེས་གསོལ། སྐུ་ན་ཕྲ་བའི་དུས་ནས་དམ་པའི་དགོངས་སྤྱོད་ལྷན་སྐྱེས་སུ་མངའ་ཞིང་། རྣམ་དཀར་དགེ་ལ་སྤྲོ་བའི་བག་ཆགས་སྟོབས་སུ་གྱུར། དགུང་ལོ་བདུན་བཞེས་ཏེ་སྤྱི་ལོ་༢༠༠༠ལོའི་བོད་ཟླ་བདུན་པའི་ཚེས་བརྒྱད་ཉིན་གྲུབ་དབང་སྤྲུལ་སྐུ་བསྟན་པའི་ཉི་མ་མཆོག་གིས་གཟའ་སྐར་འཕྲོད་སྦྱོར་གཟིགས་ཏེ། ལྷག་པ་ལྷ་མཚམས་འགྲུབ་སྦྱོར། ས་ཆུ། འཕེལ་ཉི། གཞོན། བཀྲ་ཤིས་ཉི་མ་ལ་སོགས་དགེ་མཚན་འབུམ་གྱིས་རྒྱན་པའི་ཉིན་དེར་གྲུབ་དབང་བསྟན་པའི་ཉི་མ་མཆོག་གིས་སྨྲ་སེང་དཀར་པོ་གཅིག་སྒྲུབ་ཀྱི་ལུང་གནང་སྟེ། ཡོངས་འཛིན་ཚེ་རིང་རྒྱས་ལས་ཐོག་མར་ཡོན་ཏན་ཀུན་གྱི་གཞི་མ་འབྲི་ཀློག་འདོན་གསུམ་ལ་སྦྱངས་འགོ་ཚུགས་ཞིང་སྔོན་སྦྱང་ལས་ཀྱི་འཕྲོ་སད་པར་བརྟེན་རིང་བར་མ་ཐོག་པར་དཀར་ནག་ཡི་གེ་ཐམས་ཅད་ཚེགས་མེད་དུ་སློབ་པ་མཐར་ཕྱིན། དེ་ནས་དགེ་བའི་བཤེས་གཉེན་ཆེན་པོ་མང་དག་གི་ཞབས་ལ་གཏུགས་ཏེ་བོད་རྒྱ་དབྱིན་གསུམ་སོགས་ལ་སྦྱངས་པ་མཐར་ཕྱིན་མཛད། ཆུ་མོ་ལུག་སྤྱི་ལོ་༢༠༠༣ལོའི་ཟླ་བ་༧པའི་ཚེས༡༧པ་སངས་ནམ་གྲུའི་འགྲུབ་སྦྱོར་ཉིན་གཤེན་རྒྱལ་ཡབ་སྲས་གསུམ་ལྷན་བཞུགས་ཀྱི་གནས་ཆེན་གསེར་སྒོ་ཁྲ་མོ་དང་རི་རྒྱལ་དགོན་ཁྲི་བརྟན་ནོར་བུའི་རྩེར་ཁྲི་གསོལ་མཛད་པའི་སྐལ་བཟང་ཉིན་གྲུབ་དབང་བསྟན་པའི་ཉི་མ་མཆོག་གིས་རང་གི་སྣང་ངོར་རིག་པ་དྭངས་གསལ་གྱི་ཉམས་དགེའི་སྤྲོ་སྣང་བྱུང་སྐབས་ཡབ་སྲས་གསུམ་ལ་གསོལ་འདེབས་ཞབས་བརྟན་རེ་རྟེན་འབྲེལ་གྱི་ཚུལ་དུ་ཕུལ། དེའི་ཉིན་བླ་གྲྭ་ཚང་མས་གཟབ་སྤྲོས་ལེགས་པར་གསོལ་ནས་བསང་སྤོས་དྲི་བཟང་གི་དུད་སྤྲིན་དང་རྔ་གཤང་དུང་གླིང་གི་སྒྲ་སོགས་མཆོད་པའི་བྱེ་བྲག་སྣ་ཚོགས་དང་བཅས་སེར་འཕྲིང་གི་བསུ་མའི་ཁྲོད་ནས་གཤེན་གྱི་བླ་རབས་རིམ་བྱོན་གྱི་བཞུགས་ཁྲིའི་སྟེང་དུ་ཞབས་སོར་ལེགས་པར་བཀོད་དེ་བླ་གྲྭ་རྣམས་ཀྱིས་སྐུ་གསུང་ཐུགས་རྟེན་མཎྚལ་དང་བཅས་ཕུལ། དེ་རྗེས་དད་ལྡན་མང་ཚོགས་རྣམས་ནས་ཀྱང་འཇལ་ཁ་དང་རྟེན་འབྲེལ་ཀྱང་ཞུས། ལོ་འདི་ནས་བཟུང་སྟེ་ལོ་མང་རིང་བཀའ་དྲིན་མཚུངས་མེད་ངེས་པ་དོན་གྱི་ཡོངས་འཛིན་རིན་པོ་ཆེ་སྐལ་བཟང་རྒྱས་སོགས་མཁས་ཤིང་གྲུབ་པའི་དགེ་བའི་བཤེས་གཉེན་མང་པོར་གཏུགས་ཏེ། མདོ་སྔགས་སེམས་གསུམ་སོགས་བཅུ་ཕྲག་རིག་པའི་གནས་ཀུན་གྱི་གཞུང་དོན་དང་རིག་གནས་སྤྱི་དང་བྱེ་ཕྲག་གང་སྤྱིར་བརྩོན་པར་སྦྱངས་ནས་ཐོས་བསམ་སྒོམ་གསུམ་གྱི་སྒྲོ་འདོགས་བཅོད་དང་བཅོད་མུས་སུ་བཞུགས། ས་ཕོ་བྱི་བ་སྤྱི་ལོ་༢༠༠༨ལོའི་ནང་སོག་སྡེ་བོན་དགོན་དཔལ་ལྡན་ནོར་བུའི་གླིང་དུ་ཕེབས་ཏེ་ལོ་འདིའི་ཟླ་བ་༩པའི་ཚེས་༢༦ཉིན་དགོན་འདིའི་བཤད་སྒྲུབ་སྒོམ་གསུམ་གྱི་དབུ་འབྱེད་མཛད་སྒོར་བཞུགས། སྤྱི་ལོ་༢༠༡༣ལོ་ནས་སྤ་ཚང་གཡུང་དྲུང་རབ་བརྟན་གླིང་སོགས་བོན་གྱི་འདུས་སྡེ་ཁག་ལ་ཞབས་ཀྱིས་བཅགས་ཏེ་བསྟན་དོན་རྒྱ་ཆེན་མཛད། དེ་ཡང་ཁོང་ནི་གདུང་རུས་ཁྱད་པར་ཅན་དམུ་རྒྱལ་གཤེན་གྱི་གདུང་རྒྱུད་སྐྱེས་བུ་ཆེན་པོ་ཞིག་ཡིན་སྟབས། དོན་གྱི་གཞུང་ལུགས་ཁག་ལ་ཐོས་བསམ་སྒོམ་གསུམ་དང་འཆད་རྩོད་རྩོམ་གསུམ་སོགས་བྱས་ཚེ་གཞན་དང་མི་འདྲ་བའི་རིག་རྩལ་དང་ནུས་སྟོབས་ཡོད་པ་དང་། དེ་ལ་བརྟེན་ནས་བྱུང་བའི་ཐུགས་རྗེ་དང་བྱིན་རླབས་ཀྱི་ནུས་པ་ཡང་གཞན་དང་མི་འདྲ་བའི་ཁྱད་པར་ཡོད་པ། མཁས་པའི་དབང་པོ་རྣམས་ཀྱིས་གསུངས་པ་བཞིན་ཀུན་གྱི་མཐོང་ཆོས་སུ་གྱུར་པ་ནི། ཁོང་སྐུ་ན་ཆུང་ངུའི་དུས་ནས་སྐུའི་གཟི་བརྗིད་ཆེ་ལ་སྐྱེས་སྟོབས་ཀྱི་ཤེས་རབ་དང་ལྡན་ཏེ། བློ་རྩལ་གཞན་ལས་འཕགས་པ་ཞིག་ཡིན་ཞིང་། སྔོན་ནས་སྦྱངས་བའི་དད་པ་དག་སྣང་ཤིན་ཏུ་ཆེ་ལ་སྐྱེས་སྦྱོང་ཤེས་རབ་དང་ལྡན་པ། ལྷུན་ཐུག་གཞན་ལས་དཔག་པ་ལུང་རྟོགས་ཡོན་ཏན་གྱིས་ཕྱུག་པ། བདག་འཛིན་ཕྱོགས་རིས་ཆུང་བས་ཀུན་དགའ་ཡིད་དུ་འོང་བ། ང་ཆེ་ཁེངས་དྲེགས་དབེན་པས་ཞི་བ་བྱང་ཆུབ་སེམས་དང་ལྡན་པ། ཐབས་མཁས་ཐུགས་རྗེ་ཆེ་བས་མཐོང་ཐོས་དང་བ་འདྲེན་པ་སོགས་དཀར་ཕྱོགས་ལྷ་མི་ཀུན་གྱིས་སྨོན་པའི་ཡོན་ཏན་བརྗོད་ལས་འདས་ཤིང་། དེའི་རྗེས་སུ་ཡོངས་འཛིན་རིན་པོ་ཆེ་གངས་ལྫོངས་སུ་ཕེབས་སྐབས་སྙན་རྒྱུད་ཀྱི་ཁྲིད་ལུང་དང་བྱང་སེམས་ཀྱི་ཁྲིད་། སྒྲིབ་སྦྱོང་མུན་སེལ་སྒྲོན་མའི་དབང་ཁྲིད་དང་བླ་བླུ་མཆི་བླུ་སོགས་མདོ་སྔགས་སེམས་གསུམ་གྱི་དབང་ལུང་ཁྲིད་བཅས་བུམ་པ་གང་བྱོའི་ཚུལ་དུ་གནང་བ་དང་། སྐྱང་སྤྲུལ་དྲི་མེད་འོད་ཟེར་རིན་པོ་ཆེ་མཆོག་གིས་ཨ་སྙན་རྫོགས་གསུམ་དང་བདེ་སྨོན་རྣམ་གསུམ་བཅས་ཀྱི་ལུང་ཕུལ་གནང་མཛད། གྲུབ་དབང་སྤྲུལ་སྐུ་བསྟན་པའི་ཉི་མ་མཆོག་གིས་རྒྱལ་ཡུམ་བྱམས་མའི་དབང་གཞི་ལུང་དང་བཅས་པ་ཆབ་ཅིག་ཏུ་ཕུལ་བ་དང་། གྲུབ་དབང་བླ་མ་སྒྲུབ་པའི་དབང་ལུང་ཆ་ཚང་དང་གདུགས་དཀར་དང་ཚེ་མཆོག་མཐའ་ཡས་དབང་ལུང་ཆ་ཚང་དང་། ཞིང་སྐྱོང་ལྷ་མོའི་གཉེར་གདམས་བཅས་ཕུལ་ཡོད་པར་བརྟེན་། སྔོན་སྦྱོངས་ལས་འཕྲོ་སད་པས་རིག་པ་རང་ཤར་བྱུང་བ་དང་། སྤྱི་ལོ་༢༠༡༥ལོར་བོད་ལྗོངས་ནང་བསྟན་སློབ་གྲྭ་ཆེན་མོའི་ནང་ཕེངས་སྟེ་སྤྱིར་བོད་རང་ལྗོངས་ཀྱི་ཆོས་ལུགས་ལས་རིགས་སྡེ་ཁག་དང་བོད་ལྗོངས་ནང་བསྟན་སློབ་གྲྭ་ཆེ་མོའི་དགེ་རྒན་རྣམ་པ། ཁྱད་པར་སློབ་གླིང་འདིའི་རིས་མེད་གླིང་གཙོ་རིན་པོ་ཆེ་༧སྒྲུབ་ཁང་ཐུབ་བསྟན་མཁས་གྲུབ་མཆོག་གིས་༧རྒྱལ་བ་གཤེན་གྱི་གདུང་སྲས་རྣམ་གཉིས་ལ་ཐུགས་གཟིགས་རྒྱ་ཆེར་གནང་སྟེ་མི་ལོ་ལྔའི་རིང་ལ་ཐུགས་ཁུར་བླ་མེད་མཛད་པ་དང་། རིམ་བཞིན་གྲུབ་མཐའ་རིས་མེད་ཀྱི་བསྡུས་གྲྭ་དང་ཚད་མ། ཕར་ཕྱིན། དབུ་མ། མཛོད། འདུལ་བ་བཅས་ལ་སློབ་གླིང་གི་སྒྲིག་གཞི་བཞིན་དུ་སློབ་གཉེར་ཚུལ་བཞིན་གནང་བ་དང་། ཁྱད་པར་དུ་ཡོངས་འཛིན་སློབ་དཔོན་དགེ་བའི་བཤེས་གཉེན་ཆེ་མོ་༧སྐལ་བཟང་ཚུལ་ཁྲིམས་མཆོག་གིས་གདུང་སྲས་རྣམ་གཉིས་ལ་ཟུར་དུ་བོན་རང་ལུགས་ཀྱི་མཁན་ཆེན་ཉི་མས་མཛད་པའི་སུམ་ལྡན་སྡུད་གྲྭ་མཐའ་དཔྱད་དང་། རྗེ་མཉམ་མེད་ཆེན་པོས་མཛད་པའི་ཚད་མ་རྣམ་འབྱེད་ཕྲུལ་གྱི་སྒྲོན་མེ། སྟོན་པའི་ཐེག་འགྲེལ་མེ་ལོང་དགུ་སྐོར་ཆ་ཚང་། མཚན་ཉིད་གསུམ་གྱི་རྣམ་གཞག མཁན་ཆེན་ཉི་མས་མཛད་པའི་ཤེར་ཕྱིན་མངོན་རྟོགས་རྒྱན་གྱི་སྐབས་དང་པོའི་རྣམ་བཤད་ཚིག་དོན་དཀའ་གནད་རབ་གསལ། གཤེན་སྟོན་ནམ་མཁས་མཛད་པའི་ལམ་རིམ་སུམ་བརྒྱ་བའི་འགྲེལ་བ་སོགས་ཟབ་ཁྲིད་རྒྱས་པར་ཞུས་པ་མ་ཟད། གྲུབ་མཐའ་རིས་མེད་ཀྱི་དགེ་བའི་བཤེས་གཉེན་མང་པོའི་མདུན་ནས་རྙིང་མ་བའི་ལམ་རིམ་ཀུན་བཟང་བླ་མའི་ཞལ་ལུང་དང་། ས་སྐྱ་བའི་ལམ་རིམ་ཐུབ་པའི་དགོངས་པ་རབ་གསལ། བཀའ་རྒྱུད་པའི་ལམ་རིམ་དྭགས་པོ་ཐར་རྒྱན། དགེ་ལུགས་པའི་ལམ་རིམ་ཆེ་མོ་སོགས་ལ་ཐོས་བསམ་ཡང་དག་གནང་བ་དང་། དེ་བཞིན་མཐུན་མོང་གི་རིག་པའི་གནས་ཆེན་སུམ་རྟགས་དག་གསུམ་དང་། རྩིས་ སྙན་ངག་ སྒྲ་ སྡེབ་སྦྱོར་ སོགས་ལ་སྦྱངས་པ་མཐར་ཕྱིན་གནང་བར་མཛད་དེ། སྤྱི་ལོ་༢༠༡༩ལོའི་ཟླ་བ་༦་པའི་ཚེས་༢༦ཉིན་འབྲིང་རིམ་རབ་འབྱམས་པའི་སློབ་མཐར་ཕྱིན་པའི་ཕྱག་འཁྱེར་ཐོབ་པ་དང་མཐར་ཕྱིན་དཔྱད་རྩོམ་༼དད་པའི་རྣམ་བཞག་སྐོར་གླིང་བ་༽ཞེས་པའི་ཁ་བྱང་སྟེང་ནས་དཔྱད་རྩོམ་ལྗགས་རྩོམ་གནང་བ་མ་ཟད། ཆེད་མཁས་གདན་ཞུའི་མཁས་དབང་དུ་མའི་དབུས་སུ་སྒྲོག་བྱང་གནང་བར་གྲུབ་མཐའ་རིས་མེད་ཀྱི་དགེ་བའི་བཤེས་གཉེན་དང་མཁས་དབང་ཡོངས་ཀྱིས་གདེང་འཇོག་ཚད་མཐོར་གནང་སྟེ་དགའ་བསུ་ཆེན་པོ་ཐོབ་པ་མ་ཟད་ཁོང་ལ་སློབ་གླིང་གི་འཛིན་གྲྭ་ཡོངས་ཀྱི་ཨང་དང་པོའི་བྱ་དགའ་གནང་། གཞན་ཁོང་ལ་སློབ་གཉེར་ཚུལ་བཞིན་གནང་བ་དང་སློབ་གླིང་གི་སྒྲིག་གཞི་ཚུལ་བཞིན་སྲུང་བ་སློབ་གྲོགས་བར་ལ་མཛའ་མཐུན་སོགས་ཀྱི་མཛད་རྗེས་ལ་བོད་ལྗོངས་ནང་བསྟན་སློབ་གྲྭ་ཆེན་མོ་ནས་དམིགས་བསལ་ཕུལ་བྱུང་གི་བྱ་དགའ་གནང་བ་སོགས། མདོར་ན་གདུང་སྲས་རྣམ་གཉིས་ལ་སྨན་རིའི་མཁན་སློབ་རྣམ་གཉིས་གཙོས་མཁས་ཤིང་གྲུབ་པའི་བླ་མ་དམ་པ་རྣམས་ཀྱིས་ཐུན་མོང་དང་ཐུན་མོང་མ་ཡིན་པའི་ཐུགས་བསྐྱེད་སྨོན་ལམ་དང་། མདོ་སྔགས་སེམས་གསུམ་སོགས་གྱི་དབང་ལུང་ཁྲིད་གསུམ་བཅས་ཟབ་རྒྱས་བུམ་པ་གང་བྱོའི་ཚུལ་དུ་ཕུལ་ཡོད་པར་བརྟེན། གསང་གསུམ་གསང་བའི་མཛད་པ། དངོས་སྐལ་དུ་གྱུར་བའི་གདུལ་བྱ་རྣམས་བདག་ལྟ་བུས་འདི་དང་འདིའོ་ཞེས་ཞུ་བར་ག་ལ་སྤོབས། འོན་ཀྱང་བསྟན་འཛིན་གྱི་སྐྱེས་བུ་དམ་པ་ཡིན་པ་ནི་ལུང་སྡེ་སྣོད་གསུམ་གྱི་འཆད་ཉན་དང་། རྟོགས་པའི་བསྟན་པ་བསླབ་གསུམ་ཉམས་ལེན་ཏེ། མཁས་ཤིང་གྲུབ་པའི་རྣམ་ཐར་རྨད་དུ་བྱུང་ཞེས་གསུངས་པ་བཞིན་ཡིན་པར་སོམ་ཉི་མེད་དེ། ད་ལྟ་གཤེན་གྱི་བླ་བྲང་དུ་བསླབ་པ་གསུམ་གྱི་ཉམས་ལེན་ལ་ཐུགས་བྲེལ་གྱི་མཛད་འཕྲིན་སྐྱོང་བཞིན་མཆིས། ཁོང་ནི་རིག་འཛིན་གོང་མའི་རྣམ་སྤྲུལ་སྐྱེས་མཆོག་ཞིག་ཡིན་སྟབས་མ་འོངས་པར་ཕུན་ཚོགས་དཔལ་གྱི་ཕྱུག་པའི་གངས་ལྗོངས་ས་ཡི་ཐིག་ལེ་འདིར་རྒྱལ་སྲས་སེམས་དཔའི་མཛད་རྣམ་བཞིན། གཡུང་དྲུང་བོན་གྱི་བསྟན་པ་རིན་པོ་ཆེར་མདོ་སྔགས་ཟུང་འབྲེལ་གཤེན་བསྟན་བཤད་སྒྲུབ་སྒོམ་གསུམ་གྱི་འདུས་སྡེ་འཛིན་སྐྱོང་སྤེལ་གསུམ་གྱིས་གོང་མའི་བརྒྱུད་འཛིན་འོག་མའི་ལམ་སྣ་འདྲེན་པའི་སེམས་ཅན་གྱི་འགྲོ་དོན་མཐའ་ཡས་པར་མཛད་པའི་རྣམ་ཐར་རླབས་པོ་ཆེ་ཞིག་ཡོང་རྒྱུ་ནི་ཐེ་ཚོམ་མི་དགོས་སོ། ཞེས་པའི་རྣམ་ཐར་ཉུང་བསྡུས་འདི་ཡང་གཤེན་བཙུན་ཉི་མ་འོད་ཟེར་པས་ལྷ་ལྡན་ཉི་འོད་གྲོང་རྒྱལ་བ་གཤེན་གྱི་བླ་བྲང་དུ་གཤེན་གྱི་གདུང་རབས་ཁ་སྐོང་གི་ཚུལ་དུ་བྱས་སོ། །

མི་གཙང་འདམ་དུ་སྐྱེས་པའི་ཆུ་སྐྱེས་ཀྱང་། །

སངས་རྒྱས་མཆོད་པའི་གྲལ་ལ་འཁོད་པ་བཞིན། །

བདག་ཅག་སྐྱེས་སྦྱངས་མཐུ་སྟོབས་དམན་ན་ཡང་། །

ཅུང་ཟད་སྨྲ་བའི་སྐལ་བ་ཐོབ་འདི་རྨད། །

མཆོག་གསུམ་བླ་མ་ཡི་དམ་མཁའ་འགྲོ་དང་། །

བསྟན་སྲུང་དམ་ཅན་རྒྱ་མཚོའི་ཚོགས་རྣམས་ཀྱིས། །

དམུ་རྒྱལ་དྲི་མེད་གདུང་གི་རིམ་པ་དེ། །

དུས་མཐའི་བར་དུ་འབྱུང་བའི་བཀྲ་ཤིས་སྩོལ། །

འདི་ལས་བྱུང་བའི་བསོད་ནམས་གང་ཡོད་པ། །

ཡར་ངོའི་ཟླ་ལྟར་ཇེ་ཆེར་རབ་རྒྱས་ཏེ། །

ནམ་མཁའི་མཐའ་ཀླས་མ་གྱུར་འགྲོ་བ་ཀུན། །

དམུ་རྒྱལ་རྒྱུད་པའི་གོ་འཕང་མྱུར་ཐོབ་ཤོག །

 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།