ལོ་རྒྱུས་ཀྱི་འགག་འཕྲང་རེ་རེ་དུམ་བུར་གཏུབ་ཅིང་དུས་རབས་ཀྱི་རླུང་འཚུབ་རེ་ཡང་ཧད་ཀྱིས་གཤགས་པའི་སྒང་པ་བོད་ཀྱི་རིག་གནས་ཆུ་ཀླུང་ཆེན་མོ་ནི། མཐོ་གངས་རི་ནས་དམའ་གཙང་བོར་འདྲེས་ཤིང་ཡངས་པའི་རྩྭ་ཐང་བརྒྱུད་དེ་ལོ་རབས་ཀྱི་རྔུལ་ཆུ་ཁུར་ནས་ཡོང་བ་ཡིན་ལ། ཕ་མེས་པོ་ཅན་གྱིས་བུ་བསོད་ནམས་ཅན་ལ་སྲོལ་རྒྱུན་གྱི་བདེན་ཁ་བྱིན། ལོ་རྒྱུས་ཀྱི་རྡོག་བྲོ་འཁྲབ། ཤེས་རིག་གི་དབྱངས་རྟ་གྱེར། རྣམ་དཔྱོད་ཀྱི་ཤོན་བྲོ་བརྩེས་ཏེ་ཡོང་བ་ཡིན། དུས་ཀྱི་དཀྱོགས་མཚམས་ན་ལུས་པའི་ཤེས་རིག་འདི་དག་འོས་སུ་བབ་པའི་ང་ཚོའི་འཕྲག་གོང་ན་ཡོད་པ་དེ། ངོ་ཤེས་ཤིང་དོན་རྟོགས་པའི་འདུ་ཤེས་ཟབ་པོར་ཡིད་ཆེས་དང་གདེང་བ་ཡོད་པའི་ཚོད་དེས། རང་གར་འདུག་ཏུ་མ་བཏུབ་པར་ཤེས་རིག་ཅེས་པའི་ཚིག་འབྲུ་གཉིས་པོར་ཤི་འཐམ་རོ་འཐམ་བྱེད་པའང་བསོད་ནམས་ཅན་དུ་མཐོང་། 
   དེ་བས་དགེ་བཤེས་རྒན་རབས་པ་མང་དག་ཅིག་གི་ཞལ་གཡང་གཙང་མ་དང་ཐུགས་དགོངས་ལྷད་མེད་ཀྱི་དབང་གིས«ཁྱུང་ཡུལ་དགེ་བཤེས་བགྲོ་གླེང་ཆེན་མོ»ཞེས་པ་ཞིག་དབུ་བརྙེས་ཤིང་ལེགས་ཚོགས་དགེ་བའི་ཆ་མང་པོ་ཞིག་ཁ་སྣོན་དང་ཁ་སྐོང་ཐུབ་པ་བྱུང་ཡོད་པར་མ་ཟད་དགེ་བཤེས་ཤེས་ལྡན་འགའ་ལ་འཇོན་རྩལ་དང་རོགས་འདེགས་ཀྱི་གར་སྟེགས་ཆེན་མོ་ཞིག་ཀྱང་གནངས་ཡོད། 
   ད་ལན་སྐབས་གཉིས་པའི་ཐེངས་དང་པོའི་དཔྱད་རྩོམ་རྣམས་ཀྱང་ངང་སྒུག་གི་ཁྲོད་ན་ལེགས་པར་འཚོ་བའི་ཀློག་པ་པོ་དག་གི་སྤྱན་ལམ་ལ་བདེ་བླག་ངང་དཔར་སྐྲུན་འགྲེམས་པ་བྱུང་ཐུབ་ཡོད། འདི་ནི་ཉི་མ་ཆོད་ཐབས་ཙམ་དང་མིང་ཙམ་ལ་རེ་བས་སྒུག་པ་སོགས་ཉི་ཚེ་བའི་བསམ་པ་གཏན་འགོག་གི་ཐུགས་དམ་འོག་ངལ་བ་བྱས་ཤིང་རྔུལ་ཆུ་དེ་ཡང་སྤྱི་ཚོགས་དང་ཤེས་རིག་གི་མཚོ་མོ་ལ་དཀར་ཀྱི་ཐིགས་པ་ཙམ་གྱི་དགེ་བའི་ཆར་དམིགས་ནས་བསྐྲུན་པ་ལགས་སོ།།     འདིར་འཛོམས་པའི་དཔྱད་རྩོམ་རྣམས་ནི་རྒྱལ་ཁབ་ཀྱི་སྲིད་ལུགས་དང་མཐུན་ཞིང་དམངས་ཀྱི་འདོད་བློ་དང་འཚམས་པའི་ལེགས་ཉེས་བླང་དོར་མཆོག་ཏུ་གྱུར་པ་ལགས་པས་སྤྱི་ཚོགས་སུ་དགྲམ་ན་དགེ་མཚན་ཤིན་ཏུ་ཆེ་བ་ཡིན། ད་ལན་གྱི་དཔེ་དེབ་བཀྲམ་པ་འདིས་བོད་ཀྱི་སྲོལ་རྒྱུན་རིག་གནས་ཀྱི་ཁ་སྐོང་ཆེན་མོར་སྔ་ན་མེད་པའི་རོགས་འདེགས་དང་མཐུན་རྐྱེན་མི་དམན་པར་གནང་རྒྱུ་མ་ཟད་གཞོན་ནུ་ཤེས་ལྡན་པའི་ཚོགས་ལ་སྐུལ་ལྕག་དང་འབོད་པ། སྟོབས་ཤུགས་དང་སེམས་རྒྱ། མིག་དཔེ་དང་མཐུན་ལམ་སོགས་མདོར་ན་ཡར་རྒྱས་གོང་འཕེལ་གྱི་རིན་ཐང་ལྟ་བས་གཞིར་བཅས་བདེ་ལེགས་འདོད་འབྱུང་གི་ཐུགས་གཡང་སྩོལ་བའི་འདུན་པའི་བཀའ་དྲིན་ཡང་ཆབས་ཅིག་ཏུ་སྐྱོང་བར་ཞུ། 
   མཐར་བྱ་བ་འདིར་འབད་ཀྱི་འགོ་མཇུག་བར་གསུམ། ཕྱི་ནང་གསང་གསུམ་ཀུན་ཏུ་བཀའ་དྲིན་བདག་སྐྱོང་མི་ཉུང་བ་གནང་མཁན་གྱི་རྒན་ལགས་རྣམ་པ་དང་ལྷག་དོན་དུ་ཁྱུང་ཡུལ་བཙུན་མའི་འདུས་སྡེ་ལྡོང་རྫོང་གཤེན་བཙུན་སྨིན་གླིང་གི་འདུས་པ་རྒྱ་མཚོས་མཐུན་རྐྱེན་རོགས་རམ་དང་གཞོགས་འདེགས། ཡང་སྒོས་སུ་སྐབས་བབ་ཀྱི་ལས་འཛིན་རྒན་གྲོགས་ཡོངས་ཀྱི་ཐུགས་འདུན་རྩེ་གཅིག་པའི་སྟོབས་ཤུགས་སོགས་ལ་བཀའ་དྲིན་བླ་ན་མེད་པ་ཆེ་ཞེས་མཚོ་སྔོན་ཁྲི་ཤོར་རྒྱལ་མོའི་ཕྱོགས་སུ་དལ་རྟེན་རྙེད་པའི་སྟོང་སྲས་ལྷ་བུ་རུ་འབོད་པ་དེས་ཕུལ་ལོ།།

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།