ལོ་དེབ་༼གཏམ་ཚོགས་གསལ་བའི་བང་མཛོད་༽སྤྱིའི་དེབ་གསུམ་པ་འགྲེམ་སྤེལ་གནང་བ།

   འཛམ་གླིང་གོ་ལ་ཧྲིལ་པོར་ཡང་རྩེར་ཞང་བོད་ཀྱི་ཕ་གཞིས་ཆེན་མོ་ཡུལ་གྲུའི་ལྟེ་བར་ན་འགྱིང་ངེར་གནས་པའི་གངས་རྒྱལ་ཏི་སེའི་སྤམ་ལས་མཐོ་བའི་ནང་པའི་ཕ་ཆོས་ཆེན་མོ། གཡུང་དྲུང་བོན་གྱི་རིག་གཞུང་འདི་ནི་མི་ལོ་ཆིག་ཁྲིའི་གོང་དར་ཞིང་རྒྱས་ཏེ་འགྲོ་བ་མིའི་རིགས་ཀྱི་འཚོ་བའི་ཁྲོད་དུ་དར་ཁྱབ་སུ་ཕྱིན་ཏེ་རྡོ་ལག་རྒྱུད་དང་ཆུ་ལམ་ཞུགས་ཚུལ་དུ་ད་བར་གནས་ཡོད་པ་སྨྲོས་ཅི་ལ་དགོས། འོན་ཀྱང་གྲུབ་མཐའི་འཐེན་འཁྱེར་དང་སྒེར་དོན་རིང་ལུགས་དུ་མས་འོག་ཏུ་རང་རེའི་མེས་པོའི་རིག་གཞུང་དག་རྒྱང་དུ་བསྲིང་ནས་ཡོད་ཚད་གཞན་ལ་བཅོལ་ཏེ་ལྟ་བ་ངན་པའི་དུག་ཆུ་རྦ་རླབས་རབ་ཏུ་རྒྱས་ཤིང་ཡབ་མེས་གོང་མའི་རིག་གཞུང་དག་བརླགས་ལ་ཁད་དུ་གྱུར་ནའང་དུས་རབས་ཀྱི་འཕོ་འགྱུར་དང་བདེན་དོན་གྱི་ལམ་བུ་ཇི་གསལ་དུ་འགྲོ་བཞིན་པའི་སྒང་འདིར་ཉི་མ་མེ་གྲོགས་དང་ཆར་པ་ཆུ་གྲོགས་ཀྱི་ཚུལ་དུ་ད་ལན་གཉན་རོང་ཨ་གྲགས་ཆབ་མདོ་དགོན་གྱི་ལོ་དེབ་༼ གཏམ་ཚོགས་གསལ་བའི་བང་མཛོད། ༽འདོན་ཐེངས་གསུམ་པ་འདིས་ཡང་གནའ་བོའི་རིག་གཞུང་དང་གནའ་སྲོལ་གྱི་དམངས་ཁྲོད་དུ་མར་ལུང་ཁུག་ཏུ་ལུས་པའི་རིག་གནས་འགའ་སྔོག་འདོན་དང་རྒྱུད་འཛིན་གང་ལེགས་ཡོང་བར་དམིགས་ཏེ། གཡུང་དྲུང་བོན་གྱི་ཡིག་ཚང་དང་ཞང་བོད་མཁས་པའི་དགོངས་དོན་གཙོར་བཟུང་ཐོག་ཞང་བོད་ཀྱི་ལོ་རྒྱུས་དང་། དཔྱད་རྩོམ། ཤིས་རིག  སློབ་གསོ། སྙན་རྩོམ། འོས་སྦྱོར། དམངས་ཁྲོད། གསར་གནས་བཅས་ལ་སྣ་མང་རང་ཞལ་ངོམ་སའི་སྒྲོམ་གཞིའི་ལོ་དེབ་འདི་ཉིད་ལོ་ལྟར་འགྲིམ་སྤེལ་བྱེད་དང་བྱེད་མུས་ལགས་པས། དེ་དག་གི་ལས་རིམ་བཀོད་སྒྲིག་དང་། ཐོག་མཐའ་བར་གསུམ་གྱི་རྩོམ་སྒྲིག་ཐད་ལ་ལྷག་བསམ་དཀར་པོའི་འགན་ལེན་ཞུ་ཁུལ་བྱས་ནའང་། མ་རྟོགས་ལོག་རྟོགས་ཀྱིས་དབང་གི་གཞན་གྱི་མིག་ལམ་མི་མཛེས་པ་དང་། ངེད་རྩོམ་སྒྲིག་པ་རྣམས་ལྟ་རྒྱ་མཐོང་རྒྱ་ཞན་པའི་རྐྱེན་གྱིས་སྒྲིག་འགོད་བྱ་སྟངས་ནོར་བ། རྩོམ་རིག་གི་གཞུང་ལུགས་ལ་ལྟ་རྟོག་ལེགས་པོ་མི་འབྱུང་ཞིང་། རྒྱུ་རྐྱེན་དུ་མ་ཞིག་གིས་ནོར་འཛོལ་ཡོད་ངེས་པས་རྒྱ་ཆེན་ཀློག་པ་པོ་རྣམས་ལ་བཟོད་གསོལ་ཞུ་རྒྱུ་དང་ཆབས་ཅིག་ཏུ། སྨྱུག་ཐོག་པ་ཚོ་ཞུ་གསོལ། འདི་གའི་དུས་དེབ་འགོད་རྒྱུའི་རྩོམ་རིག་གི་འོས་ཚད་གཙོ་བོ་ནི་དུས་དེབ་གཞན་དག་གི་ཐོག་ཏུ་བཀོད་སྤེལ་བྱས་མ་མྱོང་བ་ཞིག་དགོས་ཤིང་། གཞན་པའི་དཔེ་དེབ་སོགས་ནས་རྐུ་བཤུས་བྱས་པ་མ་ཡིན་པར་རང་རྩོམ་ཡིན་དགོས་པ་མ་ཟད་དེ་དག་གི་འགན་ཁྲི་སོ་སོའི་ཁུར་དགོས་པའི་གསལ་བརྡ་སྔོན་བཞིན་ནོ།།

                གཤེན་གྱི་བཙུན་གཟུགས་བ་སྨོན་ལམ་མཐའ་ཡས་འབོད་པ་དེས་ལྷ་ལྡན་ཉི་མའི་གྲོང་དུ་༢༠༢༢ལོར་ཟླ་༡པའི་ཚེས་༡ཉིན་སྦྱར་བའོ།།