བོན་གྱི་བཤད་སྒྲུབ་སློབ་གླིང་ཁག་ལ་བཏོན་པའི་རྩོམ་བསྡུའི་ཞུ་ཐོ།

     རྒྱལ་ཕྱི་ནང་གི་བོན་གྱི་བཤད་སྒྲུབ་སློབ་གླིང་ཁག་ན་བཞུགས་པའི་བློ་གསར་དད་བརྩོན་ཅན་གྱི་སྙུག་ཐོགས་མཁན་རྣམ་པ་ལགས། ཁྱེད་ཅག་གིས་ང་ཚོ་ཐུན་མོང་ལ་དབང་བའི་གྲྭ་གཞོན་སྦྱངས་རྩོམ་ཆེད་བསྒྲིགས་ཀྱི་ལོ་དེབ་སྔ་གྲས་༼རྒྱལ་མོ་རྔུལ་ཆུ༽ཡི་སྟེང་དུ་ཕྱག་རྩོམ་གྱི་རིགས་ཅི་ཡོད་གཤམ་གྱི་གློག་རྡུལ་ཡིག་ཟམ་གྱི་ཁ་བྱང་ལྟར་དུ་ཧི་གཟུགས་སུ་གཏག་ནས་༼རྒྱལ་མོ་རྔུལ་ཆུའི༽རྩོམ་སྒྲིག་ཁང་ལ་བསྐུར་གནང་མཛད་རྒྱུ་འམ། ཡང་ན་རང་རང་སོ་སོའི་སློབ་གླིང་གི་རྐང་འཛིན་སློབ་སྟོན་པའི་ཕྱག་ཏུ་ངེས་འཕྲོད་བྱ་བར་ཐུགས་འཇགས་དགོངས་རྒྱུ་བཅས་ཐེངས་འདིའི་རྩོམ་སྒྲིག་པས་གཡུང་དྲུང་བོན་གྱི་སློབ་གླིང་ཁག་ལ་རེ་འདུན་ལྔ་ཞུ་བར་བྱ་སྟེ།
     ༡༽ སློབ་གླིང་སོ་སོར་བཞུགས་ཡོད་པའི་དགེ་རྒན་ཆེན་མོ་བ་རྣམ་པས་ཐུགས་ཀྱི་བུ་སློབ་དག་ལ་རྩོམ་བསྐུལ་བྱས་ཏེ་རང་གཞན་གཉིས་ཀར་ཕན་སེམས་བསྐྱང་རྒྱུའི་རེ་བ་དང་། ༢༽ སློབ་ཞུགས་ཀྱི་གྲྭ་གཞོན་བསམ་བློ་བ་ལྷན་རྒྱས་ནས་ཀྱང་ལུས་མི་འདྲ་བའི་ཕྱག་རྩོམ་གྱི་རིགས་ཅི་ཡོད་འདི་གར་ལྷུག་སྩོལ་གནང་རྒྱུའི་རེ་བ་དང་། ༣༽ དགོན་སྡེའི་སྦྱངས་རྩོམ་ཆེད་བསྒྲིགས་ཀྱི་ཞིང་ས་ལྟ་བུའི་༼རྒྱལ་མོ་རྔུལ་ཆུ༽ནི་ཐུན་མོང་གི་ཆུ་བོ་ཞིག་ཡིན་པའི་འདུ་ཤེས་འཛིན་པའི་སྒོ་ནས་སློབ་གླིང་སོ་སོ་ཡིས་ཕྱག་རྩོམ་བཅུ་ལས་མི་ཉུང་བ་བསྐུར་བའི་རེ་འདུན་དང་། ༤༽ མ་འོངས་དུས་ཀྱི་བོད་མེ་སྤྲེལ་ལོའི་༼རྒྱལ་མོ་རྔུལ་ཆུ༽ནི་རང་རེའི་སློབ་གླིང་ཁག་གི་རྩོམ་རྩལ་ངོམ་སའི་དོ་ར་ངོ་མ་ཞིག་ཏུ་འགྱུར་ཐུབ་པར་བྱ་རྒྱུའི་རེ་བ་དང་། ༥༽གཡུང་དྲུང་བོན་གྱི་སློབ་གླིང་ཁག་གི་སློབ་གཉེར་བ་ལྷན་རྒྱས་ནས་ལུས་མི་འདྲ་བའི་རྩོམ་རིགས་ཅི་བསྐུར་ཡང་སྐུར་མཁན་གྱི་དངོས་མིང་དང་འབྲེལ་ཡུལ། སློབ་གླིང་། རྐང་འཛིན་སློབ་སྟོན་པ་སོགས་ཁ་གསལ་བའི་སྒོ་ནས་བྲིས་ཏེ་བསྐུར་རྒྱུའི་རེ་བ་དང་ལྔའོ།།
     ཞེས་མདོ་སྨད་རྒྱལ་རོང་བཤད་སྒྲུབ་སློབ་གླིང་གི་སྐབས་གཉིས་པའི་༼རྒྱལ་མོ་རྔུལ་ཆུ༽རྩོམ་སྒྲིག་ཚོ་ཆུང་གིས་བོད་རབ་རྒྱན་ཤིང་མོ་ལུག་ལོའི་སྤྱི་ཟླ༡༡བའི་ཚེས༡༥ཉིན་ཁྱབ་བསྒྲགས་སུ་སྤེལ་བ་དགེ་ལེགས་འཕེལ།།
     གློག་སྐད་ཨང་གྲངས།139-0904-1222   185-0837-5585
     ཡིག་ཟམ། SK94588@126.com.
     ཞར་བྱུང་དུ་འཁོད་པའི་གསལ་འདེབས།༼བོད་ཤིང་མོ་ལུག་གི་ལོར་སྦྱངས་རྩོམ་སྡུད་སྒྲིག་གི་བྱ་བར་ཐུགས་སྐྱོང་དང་རྒྱབ་སྐྱོར་གནང་མཁན་ནི། གཙང་སྨན་རི་དགོན་བཤད་སྒྲུབ་སློབ་གླིང་དང་དཔལ་ཁྲི་བརྟན་ནོར་བུའི་རྩེ་བཤད་སྒྲུབ་སློབ་གླིང་། ཤར་རྫ་བཤད་སྒྲུབ་སློབ་གླིང་། སྣང་ཞིག་དགོན་བཤད་སྒྲུབ་སློབ་གླིང་། རྟོགས་ལྡན་དགོན་རྫོགས་ཆེན་སློབ་གླིང་། སྐྱང་ཚང་དགོན་བཤད་སྒྲུབ་སློབ་གླིང་། བོན་བརྒྱ་དགོན་བཤད་སྒྲུབ་སློབ་གླིང་། ཁྲོམ་ཚང་དགོན་བཤད་སྒྲུབ་སློབ་གླིང་། རྫ་ཁྲོ་ཚང་དགོན་བཤད་སྒྲུབ་སློབ་གླིང་། རྒྱ་ཞིག་འབྲུག་གྲགས་དགོན་ཞང་བོད་ནང་བསྟན་རིག་གནས་སློབ་གླིང་སོགས་ཡིན་པ་དང་། 
    མ་འོངས་དུས་ཀྱི་ཆ་ལ་ཡང་དཔལ་སྨན་རི་བཤད་སྒྲུབ་སློབ་གླིང་གཙོར་བཅས་གཡུང་དྲུང་གླིང་བཤད་སྒྲུབ་སློབ་གླིང་དང་རྩེ་དྲུག་དགོན་བཤད་སྒྲུབ་སློབ་གླིང་། ཀོ་དགོན་བཤད་སྒྲུབ་སློབ་གླིང་། སྟེང་ཆེན་དགོན་བཤད་སྒྲུབ་སློབ་གླིང་། དགའ་མལ་དགོན་བཤད་སྒྲུབ་སློབ་གླིང་། ཆབ་མདོ་དགོན་བཤད་སྒྲུབ་སློབ་གླིང་། རྩེ་དབུས་དགོན་གཡས་རུའི་ཆེས་མཐོའི་སློབ་གླིང་། རྒྱལ་རོང་ལྔ་རིག་ཆེས་མཐོའི་སློབ་གླིང་། ལུང་དཀར་དགོན་བཤད་སྒྲུབ་སློབ་གླིང་། སྤུ་བླ་དགོན་བཤད་སྒྲུབ་སློབ་གླིང་། ཁམས་གཡུང་དྲུང་བོན་བཤད་སྒྲུབ་སློབ་གླིང་། ཁྱུང་མོ་དགོན་བཤད་སྒྲུབ་སློབ་གླིང་། གཡུང་དྲུང་དཔལ་རི་དགོན་བཤད་སྒྲུབ་སློབ་གླིང་། དྭངས་ར་གཡུ་བུན་དགོན་བཤད་སྒྲུབ་སློབ་གླིང་། ཀླུ་ཕུག་དགོན་བཤད་སྒྲུབ་སློབ་གླིང་། རི་ཁྲོད་དགོན་བཤད་སྒྲུབ་སློབ་གླིང་། བླ་ཁྲི་གཡས་རུའི་བཤད་སྒྲུབ་སློབ་གླིང་། གཞིས་རིང་དགོན་བྱམས་བརྩེ་སློབ་གྲྭ། བྱ་བཏང་བཙུན་མའི་བཤད་སྒྲུབ་སློབ་གླིང་སོགས་ལ་བཞུགས་པའི་བསྟན་འཛིན་གྱི་སྐྱེས་བུ་དག་གིས་རང་སློབ་རྣམས་ལ་རྩོམ་བསྐུལ་སྡུད་བསྐུར་གྱི་རོགས་ཕན་བསྒྲུབ་པར་སྙིང་ནས་རེ་འདུན་ཞུ་བཞིན་པ་ལགས་སོ།།

ཞེས་སྐབས་གཉིས་པའི་༼རྒྱལ་མོ་རྔུལ་ཆུ༽ རྩོམ་སྒྲིག་ཚོ་ཆུང་གིས།
2015.11.15.ཉིན།