གདོང་བཙུན་རྒྱ་ཐར་གྱི་དེབ་གསར་གཉིས་འགྲེམ་བརྡ།

   

   དེབ་བཅུ་བ«གཤེན་གྱི་ལེགས་བཤད་རྣ་བའི་བཅུད་ལེན་གྱི་འགྲེལ་བ་ཚངས་སྲས་ངག་གི་དབྱངས་སྙན»ཞེས་མཁས་པའི་གྲགས་པས་ས་ཆེན་བཟུང་བའི་གཤེན་མཁས་ཤཱི་ལ་དྷྭ་ཛ་ཞེས་པའམ། གཤེན་གྱི་མཁས་གྲུབ་ཚུལ་ཁྲིམས་རྒྱལ་མཚན་ཚང་གིས་མཛད་པའི«གཤེན་གྱི་ལེགས་བཤད་རྣ་བའི་བཅུད་ལེན»ཞེས་རྩ་བ་ཤོ་ལོ་ཀ༼༡༤༦༽ གི་བདག་ཉིད་ཅན་གྱི་ལེགས་བཤད་གྲགས་ཅན་དེ་ལ་གོ་ཤིན་ཏུ་བདེ་བའི་ལམ་ནས་འགྲེལ་བ་བཏབ་པ་ཞིག་ཡིན་ལ།  འདི་ནི་གཤེན་གྱི་ལེགས་བཤད་རྩ་ཆེན་དེ་ལ་འགྲེལ་བ་བཏབ་པ་ཆེས་ཐོག་མའང་གྱུར་ཡོད་པ་འདྲ་བས། ང་ཚོས་ལོ་རྒྱུས་སུ་གཤེན་གྱི་ལེགས་བཤད་མང་པོ་ཞིག་ལ་རྩ་འགྲེལ་མེད་པའི་སྟོང་ཆ་ཕྱོགས་གཅིག་བསྐངས་ཐུབ་སོང་ཞེས་བཤད་ན་ཐལ་མི་ཆེ་སྙམཔའི་སྤྲོ་བ་དང་གདེང་ཚོད་མཉམ་དུ་སྐྱེས།  ལེགས་བཤད་འདི་ཉིད་དོན་ཚན་ཆེན་པོ་བདུན་གྱིས་གྲུབ་ནས་ཡོད་ལ།  དེ་ཡང་བོན་གྱི་མི་སྣ་གལ་ཆེན་སྐོར་ཞིག་དང་།  ལོ་རྒྱུས་གནད་ཆེན་ཁག་གཅིག   དེ་བཞིན་དུ་སྐྱེས་བུ་དམ་པ་རྣམས་དང་།   ཕལ་བའི་རིགས། ཐ་ཤལ་བ་དག་གི་སྤྱོད་ལམ་སྣ་མང་ཐད་ཀར་བསྟན་ཏེ།   བཟང་སྤྱོད་ངན་དོར་གྱི་དགེ་མཚན་མང་པོ་དཔེ་དང་དོན་གྱི་ལམ་ནས་བསྟན་ནས་ཡོད་ལ།  དེ་ལྟ་བུའི་དོན་ཚན་རེ་རེ་གོ་བདེ་བའི་ལམ་ནས་འགྲེལ་བ་གང་ལ་གང་འཚམ་རེ་བཏབ་ཅིང་ཚིག་ཉུང་དོན་འདུས་ཤིག་ཡོང་བར་འབད་འབུངས་བྱ་ཅི་ཐུབ་གནང་ཡོད། འདི་དང་འདི་ལྟ་བུའི་ལེགས་བཤད་རྣམས་ནི་མཁས་པ་རྣམས་ཀྱི་གསུང་གི་ཉིང་བཅུད་འབའ་ཞིག་དང་། ཐུགས་ཀྱི་བཞེད་དོན་གནད་བསྡུས་ལྟ་བུ་མཐོང་བས། རང་གཞན་ཚང་མས་ལེགས་བཤད་འདི་རིགས་ལ་དོ་སྣང་དང་ཉམས་ལེན། སློབ་སྦྱོང་དང་གཅེས་སྤྲས་མི་དོར་བ་བྱ་རྒྱུ་ནི་ཆེས་གལ་ཆེན་དུ་མཐོང་སོང་། འདས་པ་དང་ད་ལྟ་གང་གི་སྐབས་ཡིན་རུང་ཆོས་གྲུབ་གཞན་དང་གཞན་གྱི་ལེགས་བཤད་ཀྱི་བསྟན་པ་དར་ཞིང་མཛད་འཕྲིན་ས་ཁྱབ་རྡོ་བརྡལ་དུ་གྱུར་ནས་ཡོད་ན་ཡང་། རང་རེ་གཤེན་གྱི་ལེགས་བཤད་མང་པོ་ས་འོག་གི་གསེར་བཞིན་དུ་གབ་དང་བསྐུངས་ནས་འདུག་པ་ལས།  མཁས་པའི་འཆད་ཁྲིད་ཀྱི་ཁྲོད་དང་། བླ་མའི་བཀའ་སློབ་ཀྱི་ནང་།  རྩོམ་པ་པོ་དག་གི་བརྩམས་ཆོས་ཀྱི་གསེང་དང་།  གཏམ་བཤད་མཁན་པོ་རྣམས་ཀྱི་ལྗགས་ཀྱི་རྩེ་མོ་སོགས་ནས་ཐོས་པ་རབ་ཏུ་དཀོན་ཞིང་མཐོང་བ་ཧ་ཅང་ཉུང་བས་ཤིན་ཏུ་ཕངས་པར་གྱུར། དེ་བས་ད་ལན་འབྱུང་འགྱུར་གྱི་ཆར་ཀུན་ཏུ་གཤེན་གྱི་ལེགས་བཤད་ཀྱི་བསྟན་པ་རིན་པོ་ཆེ་གོང་ནས་གོང་དུ་འཕེལ་ཞིང་། གཤེན་གྱི་ལེགས་བཤད་ཀྱི་མཛད་བཟང་འགྲན་ཟླ་བྲལ་བ་དག་གནམ་འོག་གི་རྒྱལ་ཁམས་ཡོངས་སུ་ཁྱབ་པའི་སྨོན་འདུན་ཞིག་གི་ཚུལ་དང་།  གཤེན་གྱི་ལེགས་བཤད་རིག་གནས་རྩ་ཆེན་འདི་ལ་ཞབས་ཕྱི་ཕྲན་བུ་ཞིག་གི་བཟོ་ཡིས་འདི་ལ་འབད་ཅིང་འདི་ཉིད་བཀྲམ་པ་ལགས་ན།  གཤེན་གྱི་ལེགས་བཤད་མང་པོའི་རིན་ཐང་ཟབ་མོ་ངོས་ཟིན་ཅིང་། དོན་དང་ལྡན་ལ་ཚིག་གི་སྙན་ཆས་བརྗིད་པའི་ལེགས་བཤད་འདི་རིགས་ལ་དགའ་བོ་ཡོད་པ་དག་གིས་དེབ་གསར་འདི་གཉིས་ལ་རྒྱུས་ལོན་བྱ་འདོད་ན།