བརྟན་བཞུགས་བླ་མའི་མཆོད་པ།

འདི་ནས་ཡར་བརྩིས་མི་ལོ་གོ་ལྔ་ནས།།
བསྐལ་སྟོང་སངས་རྒྱས་རང་གཟུགས་སྐྱེས་མཆོག་ཞིག།
དུས་མཐའི་ཉམ་ཐག་འདྲེན་པའི་སྐྱབས་མགོན་དུ།།
བྱོན་ནས་གཤེན་བསྟན་སྲོག་གི་ཀ་ཆེན་བཙུགས།།

ལྟ་ཕུགས་བླ་མེད་གནས་ལུགས་རྫོགས་པ་ཆེའི།།
དབྱིངས་ཉིད་སྟོང་གསལ་ངང་ལས་མ་གཡོས་ཀྱང་།།
རིས་མེད་ཐེག་སྟོབས་དང་བསྟུན་ཐེག་དགུའི་བོན།།
གང་འཚམ་རིས་མེད་འགྲོ་ལ་གསོས་སུ་སྩོལ།།

ཁྱད་པར་ཐུན་མིན་བོན་གྱི་སྙིང་གི་ནོར།།
མདོ་སྔགས་རིག་པའི་ཡང་རྩེ་རྫོགས་པ་ཆེའི།།
བསྟན་པ་བླ་མེད་ནན་གྱིས་སྐྱོང་མཛད་དེ།།
གྲུབ་མཐའི་རྒྱལ་པོའི་ཁྱད་བོན་མངོན་པར་རྨད།།

མདོར་ན་དེང་འདིར་གཡུང་དྲུང་བོན་གྱི་བསྟན།།
ཕྱོགས་མཚམས་ཀུན་དུ་དར་རྒྱས་ངང་ཚུལ་འདི།།
མཆོག་གི་བཀའ་དྲིན་ཉག་གཅིག་ཁོ་ནའི་ཕྱིར།།
ཀུན་གྱིས་རྗེས་དྲན་ཞུ་བ་སྐལ་པ་བཟང་།།

དུས་འདིར་མཆོག་གིས་རྒྱལ་སྲས་སེམས་དཔའ་ཡི།།
མཛད་འཕྲིན་བསྐྱངས་ཏེ་དགུང་གྲངས་གོ་ལྔ་རུ།།
ཕེབས་པའི་དུས་སྟོན་ཆེན་མོ་ལ་བསྟུན་ཏེ།།
སྐུ་ཚེ་བརྟན་བཞུགས་གསོལ་སྨོན་དང་བཅས་ཕུལ།།