སྐུ་ཚེ་བསྐལ་བརྒྱའི་མཆོད་སྤྲིན།

བསྟན་པའི་སྙིང་པོ་ཐེག་ཆེན་གཡུང་དྲུང་བོན། །
འཛིན་སྐྱོང་སྤེལ་ལ་བླ་མེད་འཕྲིན་ལས་ཅན། །
རྣམ་མཁྱེན་དངོས་བྱོན་ཅི་བཞིན་སྐྱེས་ཆེན་མཆོག །
དག་པའི་མཚན་ལྡན་བླ་མར་གསོལ་བ་འདེབས། །
 
སྙིགས་དུས་འགག་འཕྲང་རིང་མོའི་བསྐལ་བའི་ཁུག །
ཐུགས་སྟོབས་ལེགས་དྲངས་གྱེར་བསྟན་འཛམ་གླིང་ཀུན། །
ཁྱབ་སྤེལ་མཛད་ལ་སྟོང་གསུམ་འདུལ་མཛད་བཞིན། །
དཔལ་ལྡན་བླ་མ་མཆོག་ལ་གསོལ་བ་འདེབས། །
 
མི་མཐུན་རྒུད་པའི་ཚོགས་རྣམས་ལེགས་གཞོམ་ཅིང་། །
མཐུན་རྐྱེན་རྨ་མེད་རིང་ལུགས་རྒྱལ་བའི་བསྟན། །
གང་འདུལ་ཐབས་ཀྱིས་འགྲོ་ལ་ཕན་བསྐྲུན་པའི། །
སྐྱེས་མཆོག་ཡོངས་འཛིན་སྨྲ་དབང་གསོལ་བ་འདེབས། །
 
ཁྱད་པར་རྒྱལ་བ་སྨན་རིའི་རིང་ལུགས་རྣམས། །
གདམས་པ་ཆིག་རྫོགས་བདག་ཏུ་བཞེས་པའི་གཉེན། །
རྒྱལ་བ་སྨན་རིའི་ཁྲི་འཛིན་ལྔ་ཡི་རིང་། །
སྐྱབས་གཅིག་ཡོངས་འཛིན་མཛད་པ་ཨེ་མ་རྨད། །
 
དཔལ་ལྡན་གསང་གསུམ་འཕྲིན་ལས་ཟད་མེད་རྣམས། །
བསྐལ་བ་བརྒྱ་ཕྲག་མ་སྟོང་བར་དུ་ནི། །
མི་འགྱུར་གསེར་གྱི་ཁྲི་འཕང་བརྟན་བཞུགས་ཏེ། །
བདག་ཅག་ཡོངས་ཀྱི་སྐྱབས་མགོན་བཞུགས་སུ་གསོལ། །