དགུ་པའི་ཚེས་བཅུ་བཞི།

འོད་ཀྱི་སྐར་ཆེན་ཕ་རུས་མེས་རུས་ཡིན།།
ད་ནི་གནམ་རིམ་གོང་མའི་གོང་མར་འཕོས།།
སྐྱོ་བའི་རྫ་ཆུ་དག་ཀྱང་མུག་མུག་བཤུམ།།
དབང་པོའི་མིད་སྒོ་སྡུག་དབྱངས་ང་རོས་བརྣངས།།

ཁྱེད་ནི་ང་ཡི་གནམ་རྩེའི་འོད་པོ་ཆེ།།
ཁྱེད་ནི་ང་ཡི་མྱང་འདས་མཐར་ཐུགས་པ།།
ང་ཡི་དད་པ་ཁྱེད་ཀྱི་ཁོག་ཏུ་བསྲིང་།།
ང་ཡིས་གསོལ་བ་ཕུར་ཚུགས་ཁྱེད་ལ་འདེབས།།

ཁྱེད་ནི་ཉི་མ་འདྲ་ལེ་ཀུནད་ཏུ་ཁྱབ།།
ཁྱེད་ནི་ཕ་མ་ལྟ་བུ་མང་པོར་གཅེས།།
ཕྱོགས་མེད་མགོན་པོ་ཁྱེད་ལ་གཏན་དུ་གུས།།
རིས་མེད་ཁྱབ་བདག་ཁྱེད་ལ་རྟག་ཏུ་བཏུད།།

ཁྱེད་ནི་གངས་རི་མཐོན་པོའི་མཐོ་རུ་འཕྱོ།།
ཁྱེད་ནི་སངས་རྒྱས་སྟོང་གི་གཙུག་ན་མཛེས།།
དག་པ་དབྱིངས་རིག་གཞུང་གི་གཤིས་སུ་ཡང་།།
ས་ལམ་ཐེམ་སྐས་བགོམ་སྟེ་གྲོང་དུ་འཇུག།

ང་ལ་ལྟོས་ན་ལོ་ཟླ་མུག་པོ་ཡིན།།
ང་ལ་ལྟོས་ན་ཉིན་ཞག་སྐྱོ་པོ་ཡིན།།
ཆུང་ནས་ཕ་མ་ཆས་པའི་དྭ་འུ་བཞིན།།
ངོས་ཀྱི་སེམས་ལ་སྡུག་གི་སྤྲིན་པ་འཁོར།།

གལ་ཏེ་ང་ནི་གངས་རི་ཡིན་པ་ན།།
ང་ཡིས་གོན་པའི་ཁ་བ་ནག་པོ་ཡིན།།
ཡང་ན་གཏན་དུ་ངུ་བའི་ཆུ་མོ་སྟེ།
རྒྱ་བོད་བལ་བོད་ཕྱོགས་ནས་བཤུམ་བཞིན་ཡོད།།

འདི་ན་སྐྱོ་བ་ཡས་འབབ་མས་འབབ་ཡིན།།
ཚེས་པའི་ཟླ་བ་སྤྲིན་པ་བགོམ་སྟེ་གཞའ།།
ཤར་བའི་ཉི་མ་ནམ་མཁའ་བརྒལ་ནས་གཤེགས།།
ང་ཡི་ཕྱོགས་སུ་སྡུག་གི་ཚ་བ་རྒྱས།།

ང་ནི་བྱ་དང་བྱེའུ་ཡིན་པ་ན།།
གཤོག་པ་ཆག་སྟེ་འགྲོ་བའི་བྱ་ཞིག་ཡིན།
མིན་ན་མཚན་མོའི་གཟེབ་ཀྱི་རི་སུལ་དབུས།།
མུན་པ་ལྡེ་བཞིན་བཤུམ་པའི་སོ་སྐྱེས་ཡིན།།

ཁྱེད་ནི་དབྱིངས་ཀྱི་མཆད་པར་བསྙལ་དུས་ན།།
ང་དང་ང་ཡི་ཤོག་གི་དབྱངས་རྟ་ངུ་།།
ཁྱེད་ནི་སྟོང་བའི་སྦྲུམ་དུ་བབས་དུས་ན།།
གསོལ་འདེབས་འོད་ལོ་རྟག་ཏུ་ཁྱེད་ལ་འབབ།།