ཆོ་ག་བཅུ་གཉིས་ཀྱི་དཀྱིལ་འཁོར།

ཀུན་དབྱིངས་ཀྱི་དཀྱིལ་འཁོར།

དེ་ཡང་མདོ་ལས། སྒྲིབ་གཉིས་སྦྱང་ཞིང་ཚོགས་གཉིས་བསགས་པའི་དོན་སླད་དུ། མཚན་མ་རྫས་ཀྱི་རྡུལ་མཚོན་དཀྱིལ་འཁོར་བྲིས་པ་རུ། རང་བཞིན་དཀྱིལ་འཁོར་མཁའ་དབྱིངས་ཁྱབ་གདལ་དམ་པ་ནས། ཞེས་གསུངས་པ་ལྟར། ལུས་རྒྱལ་བའི་དཀྱིལ་འཁོར་ཆེན་པོ་བཞེངས་པ། ངག་ཚངས་པའི་འཛབ་དབྱངས་བརྗོད་པ། ཡིད་མི་དམིགས་སྟོང་བ་ཉིད་སྒོམ་པ་ལ་ལྟོས་ནས། སངས་རྒྱས་སྒྲུབ་པའི་ཐབས་ཁྱད་པར་ཅན་བསྒྲུབ་པར་འདོད་པ་ལ། རྗེ་རིན་པོ་ཆེ་མཉམ་མེད་ཤེས་རབ་རྒྱལ་མཚན་གྱིས་མཛད་པའི། 《མཚན་མ་རྡུལ་མཚོན་ཐིག་ཚོན་གསལ་བྱེད་འཕྲུལ་གྱི་མེ་ལོང》ལས། རང་བཞིན་དབྱིངས་ཀྱི་དཀྱིལ་འཁོར། ཏིང་འཛིན་རིག་པའི་དཀྱིལ་འཁོར། མཚན་མ་རྡུལ་མཚོན་གྱི་དཀྱིལ་འཁོར་དང་གསུམ་མོ། ། ཞེས་དང༌། ཡང་དེ་ཉིད་ལས། དང་པོ་མཚན་མ་རྡུལ་མཚོན་གྱི་དཀྱིལ་འཁོར་ཚུལ་བཞིན་ཤེས་པར་མ་བྱས་ན། ཏིང་འཛིན་རིག་པའི་དཀྱིལ་འཁོར་རྟོགས་པའི་ཐབས་མེད་པ། ཏིང་འཛིན་རིག་པའི་དཀྱིལ་འཁོར་མ་རྟོགས་ནས། རང་བཞིན་དབྱིངས་ཀྱི་དཀྱིལ་འཁོར་རྟོགས་པའི་ཐབས་མེད། དེ་ནས་མཚན་མ་རྡུལ་མཚོན་གྱི་དཀྱིལ་འཁོར་འདི་ནི་ཤིན་ཏུ་གལ་ཆེ་བར་བཤད་དོ། །