སྲིད་པ་གངས་ཀྱི་ར་བས་ཡོངས་སུ་བསྐོར་བའི་ཞང་བོད་ཀྱི་ལྗོངས་ཆེན་མོ་འདིར་རྣམ་འདྲེན་དམུ་རྒྱལ་སྲས་ཀྱི་རིག་པའི་གནས་དང་བསྟན་པའི་བོན་གྱིས་བསྡུས་པའི་གཞུང་ཆེན་དཀར་འབྱམས་ཡུག་ཅིག་གིས་ཁྱབ་པར་བདལ་བ། དེ་མཚུངས་རྒྱུད་འཛིན་མཁས་དང་གྲུབ་པའི་སྐྱེས་བུ་གསེར་རིའི་ཕྲེང་བ་ལྟར་རིམ་ཆགས་སུ་ཕེབས་ཤིང་དེ་དག་གིས་ཀྱང་འཛམ་གླིང་ཐ་གྲུ་ཀུན་ཏུ་ལུང་དང་རྟོགས་པའི་བསྟན་པ་ཉི་ཟླ་ཟུང་གཅིག་གིས་འཚོ་ཞིང་སྐྱོང་བའི་འོག  །དེང་གི་ཆར་ཡང་བསྟན་པའི་སྤྱི་རྗེ་མཁན་སློབ་གཤེན་གསུམ་གྱི་ཐུགས་བརྩེའི་གྲིབ་བསིལ་སྣུམ་པོའི་འོག་འཛམ་གླིང་ཐ་གྲུ་ཀུན་ཏུ་རླབས་ཆེན་འཁོར་ལོ་བཞི་ཡིས་འགྲོ་ཁམས་བདེ་བའི་གནས་སུ་དབུགས་དབྱུང་བཞིན་པ་ལྟར།  ད་ལན་གྲུབ་མཐའ་དང་ས་གནས་རིས་མེད་ཀྱི་བཀའ་རབ་འབྱམས་དགེ་བའི་བཤེས་གཉེན་ཆེན་མོ་རྣམ་པས་སྲོལ་རྒྱུན་རིག་པའི་གཞུང་ལུགས་ཁག་ལ་དེང་རབས་ཞིབ་འཇུག་རིག་པས་ཟུར་བརྒྱན་ཏེ། ༼ཁྱུང་ཡུལ་དགེ་བཤེས་བགྲོ་གླེང་ཆེན་མོ་སྐབས་གཉིས་པའི་ཚོགས་ཐེངས་དང་པོ།༽ལྡོང་རྫོང་གཤེན་བཙུན་སྨིན་གླིང་གིས་གཙོ་གཉེར་འོག་ཐུགས་གྲ་ལེགས་འགྲིག་གི་སྒོ་ནས་འཚོགས་ཟིན་ཅིང་ཆེད་རྩོམ་རྣམས་ཀྱང་དཔྱད་དེབ་ལེགས་གྲུབ་བྱུང་ཡོད།  སླད་མའི་ཆར་རིགས་པ་སྨྲ་ཞིང་སྡེ་སྣོད་འཛིན་པ་དག་གི་འཆད་རྩོད་རྩོམ་གསུམ་གྱི་འོད་སྣང་ཕྱོགས་མེད་དུ་མཆེད་པ་ལ་གཞོགས་འདེགས་ཀྱི་མཛད་བཟང་གལ་ཆེན་འདི་ཉིད་མི་ཉམས་རྒྱུན་འཛིན་གྱི་ཆེད་དུ་སྐབས་གཉིས་པའི་ལས་འཛིན་ཐུན་མོང་གི་གྲོས་མཐུན་འོག ༼ཁྱུང་ཡུལ་དགེ་བཤེས་བགྲོ་གླེང་ཆེན་མོ་སྐབས་གཉིས་པའི་ཚོགས་ཐེངས་གཉིས་པའི་༽རྩོམ་བརྡ་འདི་ཉིད་འབུལ་རྒྱུ་སྟེ།  དེ་ཡང་བགྲོ་གླེང་འདི་ཡི་ཆེད་རྩོམ་ལ་ཚང་དགོས་པའི་ཆ་རྐྱེན་དང་འབྲེལ་ཡོད་ཀྱི་ཤེས་བྱ་ལ། 
འཐུས་སྒོ།
༡༽ འདིའི་རྩོམ་ཡིག་རྣམས་འབྲི་མཁན་ཆོས་ལུགས་རིས་མེད་ཀྱི་སློབ་གླིང་སོ་སོ་ནས་ཐོན་པའི་དགེ་བའི་བཤེས་གཉེན་དང་མཁན་པོ་ཡིན་དགོས། 
༢༽ རྩོམ་གྱི་བརྗོད་བྱའམ་ཁ་བྱང་ཐད་རང་རང་གིས་གདམ་རྒྱུ༼ལོ་རྒྱུས། གཞུང་ལུགས། རིག་གནས་སོགས། ༽ལས་དམིགས་བསལ་གྱི་གཏན་འབེབས་མེད་ལ།  དེ་ཡང་བརྗོད་གཞི་གང་ཞིག་ཡིན་རུང་དཀའ་གནད་གཙོར་བཟུང་དང་ཞིབ་འཇུག་གཏིང་ཟབ། དཔྱད་འབྲས་མངོན་གསལ་བཅས་ཡོད་པའི་རྩ་དོན་བཟུང་རྒྱུ།
༣༽ རྩོམ་འབྲི་སྟངས་ཐད་སྤྱི་ཚོགས་སམ་དུས་རབས་ཀྱི་འགྲོས་ལྟར་ཞིབ་འཇུག་རིག་པའི་ཐབས་ལམ་གཙོར་འདོན་གྱིས་དབུ་ལ[གནད་བསྡུས]དང[གནད་ཚིག]    རྩོམ་གཞུང་དངོས་ལ་དཔེ་རྟགས་《》དང་འདྲེན་རྟགས་“”ཟུར་མཆན། མཇུག་ལ་དཔྱད་གཞིའི་ཡིག་ཆ་གཙོ་བོའི་རིགས་ཁ་གསལ་ཡོད་པ།  གཤམ་དུ་རྩོམ་པ་པོ་སོ་སོའི་མཚན་དངོས་དང་། ཡབ་ཡུལ། ཡོན་གནས། ད་ལྟའི་ལས་གནས། ཞལ་པར་ཨང་གྲངས་བཅས་འགོད་རྒྱུ།
དུས་ཚོད།
༤༽ སྐབས་འདིའི་ཆེད་རྩོམ་ཆ་ཚང་༢༠༢༦ ལོའི་སྤྱི་ཟླ ༦ པའི་ཚེས ༡༥ སྔོན་དུ་འབྲེལ་ཡོད་བགྲོ་གླེང་འགན་འཛིན་མི་སྣའི་ཕྱག་ཏུ་འབྱོར་དགོས་པ་དང་། འདིར་འབྱོར་བའི་རྩོམ་རྣམས་རེ་ཞིག་ཕྱིར་འབུལ་ཞུ་རྒྱུ་མིན་པས་མ་ཕྱི་འདྲ་མཚུངས་རེ་རང་རང་གིས་ཉར་ཚགས་གནང་ན་ལེགས།  འདིར་འབྱོར་བའི་རྩོམ་ཡིག་རྣམས་བགྲོ་གླེང་འགན་འཛིན་ཐུན་མོང་གིས་དཔྱད་ཞིབ་ཀྱིས་འོས་འདེམས་བྱས་ཏེ།   བགྲོ་གླེང་འོས་ཡོད་ཀྱི་རྩོམ་པ་པོ་སོ་སོ་ལ་དེ་ལུགས་དངོས་གཞིའི་བགྲོ་གླེང་དུ་ཕེབས་རྒྱུའི་མགྲོན་བརྡ་གཏོང་རྒྱུ་ཡིན་པ་དང་རྩོམ་ཡོན་འོས་འཚམས་རེ་འབུལ་རྒྱུ་བཅས་སོ། །

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །

སྤེལ་མཁན།