གཤེན་གྱི་གདུང་སྲས་རྣམ་གཉིས་བོད་ལྗོངས་ནང་བསྟན་སློབ་ཆེན་ནས་སློབ་ཐོན་གནང་བའི་གནས་བསྡུས།

 

རྒྱལ་བ་གཤེན་གྱི་གདུང་འཛིན་གཤེན་སྲས་རྣམ་གཉིས་དང་དགེ་རྒན་དགེ་བཤེས་སྐལ་བཟང་ཚུལ་ཁྲིམས།

ཞྭ་དཀར་བསྟན་པའི་གཙུག་རྒྱན་སྐྱབས་རྗེ་༧རྒྱལ་བ་གཤེན་གྱི་གདུང་འཛིན་གཤེན་སྲས་ནོར་བུ་དབང་གི་རྒྱལ་པོ་རིན་པོ་ཆེ་མཆོག་དང་༧གཤེན་སྲས་གཙུག་ཕུད་རྣམ་གྲོལ་རྒྱལ་མཚན་རིན་པོ་ཆེ་མཆོག གཤེན་སྲས་གཡུང་དྲུང་རང་གྲོལ་ཉི་མ་རིན་པོ་ཆེ་མཆོག བོད་ལྗོངས་ནང་བསྟན་སློབ་ཆེན་གྱི་གཤེན་སྲས་རྣམ་གཉིས་ཀྱི་ཡོངས་འཛིན་དགེ་བའི་བཤེས་གཉེན་ཆེན་མོ་དགེ་བཤེས་སྐལ་བཟང་ཚུལ་ཁྲིམས་རྣམ་བཞི།

   དེ་ནས་སྤྱིར་བོད་རང་ལྗོངས་ཀྱི་ཆོས་ལུགས་ལས་རིགས་སྡེ་ཁག་དང་ཁྱད་པར་དུ་བོད་ལྗོངས་ནང་བསྟན་སློབ་གྲྭ་ཆེན་མོའི་དགེ་རྒན་རྣམ་པ་དང་། ཡང་ཁྱད་དུ་བོད་ལྗོངས་ནང་བསྟན་སློབ་གྲྭ་ཆེན་མོའི་རིས་མེད་གླིང་གཙོ་རིན་པོ་ཆེ་༧སྒྲུབ་ཁང་ཐུབ་བསྟན་མཁས་གྲུབ་མཆོག་གིས་༧རྒྱལ་བ་གཤེན་གྱི་གདུང་སྲས་རྣམ་གཉིས་ལ་ཐུགས་གཟིགས་རྒྱ་ཆེར་གནང་སྟེ་མི་ལོ་ལྔའི་རིང་ལ་ཐུགས་ཁུར་བླ་མེད་མཛད་པ་དང་།

    ཁྱད་པར་དུ་གདུང་སྲས་སྐུ་ཆུང་༧གཤེན་སྲས་གཡུང་དྲུང་རང་གྲོལ་ཉི་མ་རིན་པོ་ཆེའམ་གཤེན་སྲས་ཚེ་དབང་བསྟན་འཛིན་རིན་པོ་ཆེ་མཆོག་གིས་མཐར་ཕྱིན་ལ་༼དད་པའི་རྣམ་བཞག་སྐོར་གླེང་བ།༽ཞེས་པའི་ཁ་བྱང་སྟེང་ནས་དཔྱད་རྩོམ་ལྗགས་རྩོམ་གནང་བ་མ་ཟད། ཆེད་མཁས་གདན་ཞུའི་མཁས་དབང་དུ་མའི་དབུས་སུ་སྒྲོག་བྱང་གནང་སྟེ་མཁས་དབང་ཡོངས་ཀྱིས་གདེང་འཇོག་ཚད་མཐོར་གནང་སྟེ་སློབ་གླིང་གི་འཛིན་གྲྭ་ཡོངས་ཀྱི་ཨང་དང་པོའི་བྱ་དགའ་གནང་། གཞན་ཁོང་ལ་སློབ་གཉེར་ཚུལ་བཞིན་གནང་བ་དང་སློབ་གླིང་གི་སྒྲིག་གཞི་ཚུལ་བཞིན་སྲུང་བ། སློབ་གྲོགས་བར་ལ་མཛའ་མཐུན་སོགས་ཀྱི་མཛད་རྗེས་ལ་བོད་ལྗོངས་ནང་བསྟན་སློབ་གྲྭ་ཆེན་མོ་ནས་དམིགས་བསལ་ཕུལ་བྱུང་གི་བྱ་དགའ་གནང་བ་སོགས་ཀྱི་གནས་བསྡུས་སྤེལ་བའོ། །