བོད་ཚེས་༢༠ཉིན་གྱི་དགོངས་རྫོགས་དང་འབྲེལ་བའི་གནས་ཚུལ།

[ཟླ་ཚེས། 2019-02-25 10:21:41][རྩོམ་པ་པོ། དགོངས་རྫོགས་བཀོད་སྒྲིག་ཚན་ཆུང་།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]

1551063145590826.jpg
ཨེ་མ་ཧོ།
སྐྱེ་མེད་གདོས་བྲལ་ཀུན་བཟང་དགོངས་བརྙེས་ཤིང་།

འགག་མེད་ལྷུན་གྲུབ་བསྐྱེད་རྫོགས་ཟུང་འཇུག་ཅན།

གཉིས་མེད་རྩལ་སྣང་བསླབ་གསུམ་རྣམ་པར་དག

སྐྱབས་མཆོག་ཤེས་རབ་མཐར་ཕྱིན་གསོལ་བ་འདེབས།
0.jpg

   བོད་ཚེས་༢༠ཉིན་འཆར་ཅན་ལྟར་རིན་སྤུངས་དགོན་དང་སྣང་ཞིག་ལྕགས་མདུད་དགོན། བྲག་གཡུང་དྲུང་དགོན་བཅས་ཀྱིས་རྒྱལ་བ་རྒྱ་མཚོའི་ཆོག་གཞུང་དང་། མཉམ་མེད་བླ་མའི་བླ་སྒྲུབ། ཁོང་རིན་པོ་ཆེའི་ཡི་དམ་ཚེ་དབང་བོད་ཡུལ་མ་སོགས་ཀྱི་ཚོགས་འཁོར་ཕུལ་ཅིང་།


IMG_0687.jpg

   དེ་ནས་འཆར་ཅན་ལྟར་༧སྐྱབས་རྗེ་མཁན་སློབ་རྣམ་པ་དང་སྣང་ཞིག་རྣམ་རྒྱལ་ཀུན་གྲགས་གླིང་གི་བླ་གྲྭ་འདུས་པ་གཙོས་པའི་གྲྭ་མང་ཡོངས་ཀྱིས་ཚོགས་ཆེན་འདུ་ཁང་ནས་མདོ་གཡུང་དྲུང་ཀློང་རྒྱས་ཀྱི་ཆོག་གཞུང་བསྲངས་ཏེ་བདེ་བར་གཤེགས་པའི་སྟོང་གི་མཚན་བརྗོད་པ་སོགས་ཀྱི་དགོངས་རྫོགས་ཕུལ།

   དེ་ནས་འཆར་ཅན་ལྟར་ཁོང་རིན་པོ་ཆེའི་གཞིས་དགོན་སྐྱང་ཚང་དགོན་པའི་བླ་གྲྭ་ཡོངས་ནས་སྨྲ་སེང་སྟོང་སྐུའི་གཞལ་ཡས་ཁང་ནས་ཀུན་རིག་ལས་བཞི་རྒྱུན་ལྔའི་འཕྲིན་ལས་ཆོ་གའི་གཞུང་བསྲངས།  དེ་ནས་འཆར་ཅན་ལྟར་དགའ་མལ་དགོན་པའི་གྲྭ་མང་ནས་སྒྲུབ་ཁང་ནས་བོན་སྐྱོང་ཚོགས་བརྒྱའི་ཚོགས་འཁོར་ཕུལ།


  གཞན་ཉིན་གང་བོ་ལ་དད་ལྡན་མང་ཚོགས་སྟོང་ཕྲག་དུ་མས་སྐུ་གདུང་རིན་པོ་ཆེ་མཇལ་བ་ཞུས།

  དེ་ནས་འཆར་ཅན་ལྟར་ཉིན་གུང་ཆུ་ཚོད་༣པ་ཡས་མས་ནས་༧སྐྱབས་རྗེ་མཁན་ཆེན་ཤེས་རབ་ཚུལ་ཁྲིམས་མཐར་ཕྱིན་རིན་པོ་ཆེའི་ཁྱིམ་གཞིས་དང་གཉེན་འབྲེལ་ཡོངས་ཀྱི་མར་མེ་ཁྲི་ཕྲག་ལྷག་གི་དགོངས་རྫོགས་མཆོད་པ་གྲ་སྒྲིག་གནང་སྟེ། ཁོང་རིན་པོ་ཆེའི་གསོལ་འདེབས་དང་། གཡུང་དྲུང་ཆག་ཤིང་། འཁོར་ལོ་རིན་པོ་ཆེ་སོགས་ཀྱི་རིས་ཅན་གྱི་རྣམ་པ་དང་། དེ་བཞིན་༧སྐྱབས་རྗེ་རྩ་བའི་བླ་མ་ཤེས་རབ་མཐར་ཕྱིན་མཁྱེན། །ཞེས་པ་སོགས་མཚོན། མཚན་མོ་མར་མེའི་མཆོད་པ་དང་འབྲེལ་ཡོད་སེར་སྐྱ་ཡོངས་ནས་ཁོང་རིན་པོ་ཆེའི་གསོལ་འདེབས་དབྱངས་སུ་གྱེར་སྟེ་ཚོགས་ཁང་དང་བླ་བྲང་སོགས་ལ་སྐོར་ཕྱག་ཞུས་ཏེ་དགོངས་རྫོགས་ཞུས་ཤིང་། གཞན་དད་ལྡན་བརྒྱ་ཕྲག་དུ་མས་དགའ་མལ་གླིང་སྐོར་དང་གནས་ཆེན་བྱ་དུར་ལ་སྐོར་བ་དང་རྐྱང་ཕྱག་འཚལ།

དགའ་མལ་དགོན་ཆེན་གྱི་དོ་དམ་ཨུ་ཡོན་ལྷན་ཁང་དང་
དགོངས་རྫོགས་བཀོད་སྒྲིག་ཚན་ཆུང་ནས་
༢༠༡༩་༢་༢༥ཉིན།

 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།