སྨོན་རྒྱལ་བླ་བྲང་དུ་དཀའ་ཐུབ་འཚོགས་པའི་སྐོར།

༄༅།། ཁྱུང་ཡུལ་དཔལ་ལྡན་སྨོན་རྒྱལ་བླ་བྲང་ཐེག་ཆེན་ནོར་འཁྱིལ་གླིང་གི་ལོ་ལྟར་གྱི་དུས་ཆེན་ཏེ་དབྱར་དུས་གཤེན་གྱི་དཀའ་ཐུབ་ཆེན་མོ་རྨད་བྱུང་སྒྲུབ་གྲྭའི་འདུས་པ་སྡེ་ཚོགས་ཀྱིས་༢༠༡༥ལོར་རྒྱས་ཚོགས་གནང་བ།།

གཤེན་རབ་སྤངས་རྟོགས་མཐར་ཕྱིན་བདེ་བར་གཤེགས།།
གྲངས་མེད་ཚོགས་བསགས་གྲང་མེད་སྒྲིབ་པ་སྦྱངས།།
འོག་མིན་གནས་སུ་མངོན་པར་སངས་རྒྱས་ནས།།
འགྲོ་ལ་རྣམབརྩེ་རྒྱལ་བ་མི་ལུས་བཞེས།།
རྣམ་པར་བཞེས་པ་ཁྱོད་ལ་ཕྱག་འཚལ་ལོ།།

ལོ་རྒྱུས་ཀྱི་ཁོག་དབུབ་པ།

   གཡུང་དྲུང་ལྷ་ཡི་སྐད་དུ་ན། ལམ་གསལ་ཧ་ར་པྲ་ཅི་ན། གང་ཟག་མི་ཡི་སྐད་དུ་ན། གཤེན་གྱི་དགེ་སྤྱོད་རྣམ་པར་དག་པ་བསྟན་པའི་མདོ། རྣམ་པ་ཐམས་ཅད་མཁྱེན་པ་སྤྲུལ་པའི་སྐུ་ལ་ཕྱག་འཚལ་ལོ། དེ་ཚེ་དེའི་དུས་ན། སྟོན་པ་རྣམ་པ་ཐམས་ཅད་མཁྱེན་པ་སྤྲུལ་པའི་སྐུ་དེས། འགྲོ་བ་སེམས་ཅན་གྱི་དོན་དུ། མི་བཇེད་ཀྱི་འཇིག་རྟེན། ལྷོ་འཛམ་བུ་གླིང་གི་དམིག་སོག་ཁ་བོན་གྱི་འབྱུང་གནས། གནས་མཆོག་དམ་པ་འོལ་མོ་གླིང་ཆེན་གྱི། རྒྱལ་ས་བར་པོ་སོ་བརྒྱད་དུ་སྐུ་འཁྲུངས་ནས། མཛད་པ་བཅུ་གཉིས་ཀྱི་དོན་མཐར་ཕྱིན་པར་མཛད་དེ། དེ་ཡང་བསྟན་པ་རྗེས་བཞག་གི་མཛད་པ་རྫོགས་ནས། འདུལ་བ་ཁྲིམས་ཀྱི་མཛད་པའི་དུས་ལ་བབ་སྟེ། དེ་ཡང་དང་པོ་གསས་མཁར་ཁྲི་སྨོན་རྒྱལ་བཞད་ཀྱི་སྒོ་དྲུང་དུ་བྱོན་ནས། སྐྱེ་རྒ་ན་འཆིའི་ཆུ་བོ་བཞི་ལ་གཟིགས་ཏེ། འཁོར་རྣམས་ལ་སྡུག་བསྔལ་བ་འཁོར་བའི་ཉེས་མིག་དང་། སྐྱེ་རྒ་ན་འཆིའི་དར་གུད་དང་། མི་བདེ་སྡུག་བསྔལ་གྱི་གཡང་ས་དང་། ཐར་པ་བདེ་བའི་བྲོད་ཁ་དང་། ཉོན་མོངས་དུག་ལྔའི་ཉེས་སྐྱོན་དང་། སྡུག་བསྔལ་ཆུ་བོ་བཞི་ལ་གཟིགས། རྒྱུ་འབྲས་བདེན་པའི་བོན་རྣམས་དང་། རྣམ་དག་འདུལ་བ་ཁྲིམས་ཀྱི་ལུང་། གཤེན་གྱི་དགེ་སྤྱོད་རྣམ་པར་དག་པ་དང་། བླ་མེད་གོ་འཕང་བསྒྲུབ་ཐབས་དང་། མདོ་སྡེ་དུ་མ་གཏན་ལ་ཕབ་ཏེ་གསུངས་སོ། དེ་ནས་རབ་ཏུ་བྱུང་བར་དགོངས་ནས། རྒྱན་དང་ཡོ་བྱད་ལོངས་སྤྱོད་ཐམས་ཅད་སྤངས་ཤིང་། བར་སྣང་སྟོང་པའི་དབྱིངས་རུམ་ནས། ཡེ་ཤེས་ལྷའི་ཐུགས་རྗེ་དང་། ཐབས་ཀྱི་མཆོག་གིས་སྤྲུལ་པ་ལས། རབ་ཏུ་བྱུང་བའི་ན་བཟའ་བླང་བའི་གོས་དྲུག་དང་། ཧོས་རུ་བསིལ་བའི་སྒྲ་སྙན་དང་། པད་ཆ་པད་ཁུག་སྔོན་པོ་དང་། པད་ཤུན་གདིང་བ་ཁུད་དུ་བཅུགས་ཏེ། འཁོར་རྣམས་ཀྱིས་བཤོལ་བས་ཀྱང་མ་ཐུབ་པར། མི་ལས་གཤོག་སྐྱེས་མཁའ་ལྡིང་ཤང་ཤང་དུ་སྤྲུལ་ནས། བར་སྣང་སྟོང་པའི་ཁམས་སུ་འཕུར་སྟེ། འོག་མིན་གྱི་གནས་སུ་བྱོན་ནས། རང་འབྱུང་མཆོད་རྟེན་རྣམ་བཞི་དང་། དྲང་སྲོང་ལེགས་ལྡན་རྒྱལ་བའི་མདུན་དུ་རབ་ཏུ་བྱུང་བར་མཛད་དོ། དེ་ནས་བསླབ་གསུམ་ཡོངས་སུ་རྫོགས་པར་དགོངས་ནས། དཀའ་ཐུབ་མཐར་ཕྱིན་པར་མཛད་དེ། སུམ་ཅུ་རྩ་གསུམ་གྱི་གནས་སུ། ངང་པའི་རྒྱལ་པོ་ཆུ་འབྱེད་དང་ཐབས་གཅིག་ཏུ་ཆུ་ལ་འོ་མ་འབྱེད་པ་ཐིག་རེ་དང་། འབྲས་ས་ལུ་ཉག་མ་རེ་གསོལ་ནས། བྱའི་དཀའ་ཐུབ་ལོ་གཅིག་མཛད་དོ། དེ་ནས་རྒྱལ་ཆེན་རིགས་བཞིའི་གནས་སུ། སྤྲེའུའི་རྒྱལ་པོ་ཧ་ན་མན་དྷ་དང་ཐབས་གཅིག་ཏུ། ཤིང་ཏོག་གི་འབྲུ་མ་རེ་དང་། ཤིང་ལོའི་སྟེང་དུ་ཁ་བ་ཆགས་པའི་ཆུ་ཐིགས་པ་རེ་གསོལ་ནས། སྤྲེའུའི་དཀའ་ཐུབ་ལོ་གཅིག་མཛད་དོ། དེ་ནས་འོལ་མོ་ལུང་རིང་གི་བྱང་ནུབ་ཟད་མཚམས་མེ་ཏོག་གི་གླིང་ལ། མཁའ་ལྡིང་གི་རྒྱལ་པོ་ཤང་ཤང་དང་ཐབས་གཅིག་ཏུ་ཆུ་སིང་གེའི་ཐིགས་པ་རེ་དང་། རྩ་ཨུ་མེར་གྱི་མཆོག་མ་རེ་གསོལ་ནས། མིའི་དཀའ་ཐུབ་ལོ་གཅིག་མཛད་དོ། དེ་ནས་བདུད་སྲིན་པོ་དང་། མུ་སྟེགས་རྣམས་འཁོར་དུ་གྱུར་ཏེ། རི་བོ་གསེར་ལྡན་གྱི་རྩ་བ། ཆུ་གྱིམ་ཤང་གི་འགྲམ་དུ་བྱོན་ནས། འཁོར་སྡེ་བཞི་ཡ་བརྒྱད་དང་། བདུད་སྲིན་མུ་སྟེགས་འཁོར་རྣམས་ལ། དག་པ་འདུལ་ཁྲིམས་བོན་སྡེ་ལས། བསླབ་གསུམ་ཡང་དག་གི་སྡེ་དང་། རྣམ་དག་དཀའ་ཐུབ་ཀྱི་སྡེ་དང་། སྤོབས་པ་མཐར་ཕྱིན་གྱི་སྡེ་དང་། འདུལ་བྱེད་སྡེ་བཅུ་རུ་གཏན་ལ་ཕབ་སྟེ་གསུངས་སོ། དེ་ནས་ཡང་འདུལ་བ་ཁྲིམས་ཀྱི་གླིང་། གསས་ཁང་བ་རབ་གསེར་གྱི་གླིང་དུ་བྱོན་ནས། ཕྱི་རབས་ཀྱི་འགྲོ་བ་རྣམས་ཁ་ལོ་ཡོངས་སུ་བསྒྱུར་བ་དང་། འདུས་པའི་འཁོར་རྣམས་ཁྱིམ་སྤངས་རབ་ཏུ་བྱུང་བ་བྱ་བའི་ཕྱིར། འདུལ་བ་རྒྱུད་དྲུག་ཏུ་དབྱེ་ནས་གཏན་ལ་ཕབ་ཏེ་གསུངས་སོ། དེ་ནས་འདུས་པའི་འཁོར་རྣམས་ལ། འདུལ་བ་ཁྲིམས་ཀྱི་སྡོམ་པ་ཕོག་ནས། གང་ཡང་མི་འཆལ་ཞིང་མ་འདྲེས་པ་བྱ་བ་དང་། ཕོ་མོ་དབྱེ་ནས་གནས་རིས་སོ་སོ་རུ་འཛིན་པའི་ཆེད་དུ་གསས་མཁར་ཁྲི་སྨོན་རྒྱལ་བཞད་དང་། ཁོ་མ་ནེའུ་ཆུང་གཉིས་ཀྱི་བར། མཆོད་རྟེན་རྣམ་དག་དཀར་པོའི་མདུན། གྲོང་ཁྱེར་རྣམ་དག་བཀོད་པའི་དབུས་དཀྱིལ་དུ་བཞུགས་ཏེ། ཀུན་ལ་འདུལ་ཁྲིམས་ཀྱི་སྡོམ་པ་ཕོག་ནས། ཕོ་གླིང་མོ་གླིང་སོ་སོ་རུ་དབྱེ་བར་མཛད་དོ། དེ་ནས་ཡང་ཕོ་གླིང་མོ་གླིང་གཉིས་ཀྱི་བར་མཚམས་སུ། གདན་སེང་གེའི་ཁྲི་ལ་བཞུགས་ཏེ། ཕོ་མོ་དབྱེ་ནས་གནས་རིས་སོ་སོ་དུ་འཛིན་པ་ལ། གཤེན་གྱི་དགེ་སྤྱོད་རྣམ་པར་དག་པའི་བསྟན་པར་དགོངས་ནས། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། དྲང་སྲོང་རྒྱལ་བ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། གཙུག་གཤེན་རྒྱལ་བ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། གཙུག་སྲས་རྨ་བོ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། ཁྲི་སྡེ་གུང་གྲགས་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། ཚུལ་འབར་ཁྲི་ཤེས་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། ཁྲི་རྒྱལ་ཐང་པོ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། ཁྲི་འོད་སྒྲོན་མ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། གུང་ཁྲི་གསལ་འོད་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། གཙུག་སྲས་འཕྲུལ་བུ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། བདེ་ལྡན་དྲང་སྲོང་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། གཙང་མ་གཙུག་ཕུད་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། ཚངས་པ་གཙུག་ཕུད་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། སྤང་ལ་གནམ་གཤེན་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། སྤོས་ཀྱི་གླང་པོ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། སྤོས་ཀྱི་ཐིམ་པ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། དག་པ་སྒྲིབ་སེལ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། ལྷའི་དྲང་སྲོང་ཡེ་ཤེས་དང་ལྡན་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། ཀླུའི་དྲང་སྲོང་གཙང་མ་སྒྲིབ་སེལ་དང་ཐབས་གཅིག་ཏུ་བཞུགས་སོ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། གཤེན་གྱི་དྲང་སྲོང་བདེན་པར་སྨྲ་བ་དང་ཐབས་གཅིག་ཏུ་བཞུགས་སོ། །

   གཞན་ཡང་འཁོར་དུ་གཏོགས་པའི་གཡུང་དྲུང་སེམས་དཔའ་སེམས་དཔའ་ཆེན་པོ། དག་པ་དྲང་སྲོང་ཕོ་མོ་སྡེ་དང་། གཙང་མ་གཙུག་ཕུད་ཕོ་མོའི་སྡེ་དང་། ཚུལ་གནས་དགེ་བསྙེན་ཕོ་མོའི་སྡེ་དང་། བསྙེན་གནས་ཡན་ལག་ཕོ་མོའི་སྡེ་དང་། གཞན་ཡང་། ལྷ་དང་། ཀླུ་དང་། མི་དང་། ལྷ་མ་ཡིན་དང་། མི་འམ་ཅི་ལ་སོགས་པའི་འཇིག་རྟེན་ན། ཚུལ་ལ་གནས་པ་དང་། ཚུལ་ལ་ཞུགས་པ་དང་། ཚུལ་དང་ལྡན་པ་དང་། ཁྲིམས་ལ་གནས་པ་དང་། ཁྲིམས་ལ་ཞུགས་པ་དང་། ཁྲིམས་དང་ལྡན་པ་ལ་སོགས་འཁོར་བྱེ་བ་ས་ཡ་དུང་ཕྱུར་དང་བཅས་ནས་བཞུགས་སོ། དེ་ནས་འཁོར་རྣམས་ཀྱིས་སྟོན་པ་ལ། བླ་ན་མེད་པའི་མཆོད་པ་སྤྲིན་གྱི་རྒྱན་ཞེས་བྱ་བ་བཤམས་ནས་ཕུལ་ལོ། དེ་ཡང་ལ་ལས་དར་ཕྱར་རོ། ལ་ལས་ནི་ལྷའི་དུང་འབུད་དོ། ལ་ལས་རྔ་བརྡུང་ངོ་། ལ་ལས་ནི་ལྷའི་གཤང་དཀྲོལ་ལོ། ལ་ལས་ནི་ལྷའི་གླིང་བུ་འབུད་དོ། ལ་ལས་ལྷའི་ཏམ་བུ་ར་འབུད་དོ། ལ་ལས་ནི་ལྷའི་པི་ཝང་བསྒྲིལ་ལོ། ལ་ལས་ནི་ལྷའི་ཅག་པར་བརྡེབས་སོ། ལ་ལས་ནི་ལྷའི་ཅོང་ཆེན་བརྡུང་ངོ་། ལ་ལས་ནི་ལྷའི་ཅིང་ཆེན་བསྒྲགས་སོ། ལ་ལ་ནི་ལྷའི་བིང་ཆེན་དཀྲོལ་ལོ། ལ་ལའི་ལྷའི་གདུག་འཁྱེར་རོ། ལ་ལའི་ལྷའི་རྒྱལ་མཚན་ཕྱར་རོ། ལ་ལའི་ལྷའི་བ་དན་ཕྱར་རོ། ལ་ལའི་ལྷའི་ཕྱེ་མ་ཁྱེར་རོ། ལ་ལས་ནི་ལྷའི་འཕུར་མ་བརླབས་སོ། ལ་ལས་ནི་ལྷའི་བླ་གུར་ཕུབ་སོ། ལ་ལས་ནི་ལྷའི་ཡོལ་བ་བྲེའོ། ལ་ལས་ནི་ལྷའི་མར་མེ་བལྟམ་མོ། ལ་ལས་ནི་ལྷའི་སྒྲོན་མེ་འདེགས་སོ། ལ་ལས་ནི་ལྷའི་སྤོས་མེ་འབུལ་ལོ། ལ་ལས་ནི་ལྷའི་གཙང་ཚན་གཏོར་རོ། ལ་ལས་ནི་ལྷའི་སྐུ་ཁྲུས་གསོལ་ལོ། ལ་ལས་ནི་ཞལ་ཟས་འབུལ་ལོ། ལ་ལས་ནི་ལྷའི་མེ་ཏོག་གཏོར་རོ། ལ་ལས་ནི་ལྷའི་བསྟོད་ཚིག་བྱེད་དོ། ལ་ལས་ནི་ལྷའི་མཆོད་བརྗོད་བྱེད་དོ། དེ་ལྟར་དུ་ལྷའི་རོལ་མོ་དང་། མཆོད་པ་བསམ་གྱིས་མི་ཁྱབ་པར་ཕུལ་བས་འཇིག་རྟེན་ཁམས་ཀྱང་། གཡོ་བ་དང་། འགུལ་བ་དང་། འུར་བ་དང་། ཐུག་པ་དང་། ཆེམས་པ་དང་། མེར་བ་དང་། ལྡེག་པར་བྱུང་ངོ་། དེའི་དུས་སུ་ནམ་མཁའ་ལས་གསལ་བའི་འོད་མང་པོ་ཤར་རོ། བར་སྣང་ལས་སྙན་པའི་སྒྲ་མང་པོ་གྲགས་སོ། ས་གཞི་ལས་མཛེས་པའི་མེ་ཏོག་མང་པོ་སྐྱེས་སོ། དེའི་ཚེ། སྟོན་པས་ཀྱང་མཆོད་པ་དེ་དག་ཐམས་ཅད་ཐུགས་རྗེས་བྱིན་གྱིས་རླབས་ནས། ཐུགས་ལས་འོད་ཟེར་བྱེ་བ་ས་ཡ་སྤྲོས་པ་མཛད་དེ། དེ་ཡང་སྐུ་ཞབས་ཀྱི་མཐིལ་རུམ་ནས་ཀྱང་། འོད་ཟེར་བྱེ་བ་ས་ཡ་ཁྲི་ཕྲག་དྲུག་ཅུར་སྤྲོ་ཞིང་བཀྱེའོ། དེའི་འཕྲོས། དེའི་ཚེ་དེའི་དུས་ན། འཁོར་དུ་གཏོགས་པས་གཤེན་རབ་གཡུང་དྲུང་སེམས་དཔའ་རྣམས་ཀྱི་ནང་ནས། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ། དྲང་སྲོང་རྒྱལ་བ་རང་གི་གདན་ལས་ལང་ནས། ཚུལ་གོས་ཕྲག་པ་གཅིག་ཏུ་གཟར་ནས། ལྷའི་མེ་ཏོག་ཨུ་དུམ་ཝ་ར་ལག་ཏུ་ཐོག་ནས། གཤེན་རབ་དེ་དག་གི་སྤྱན་སྔར་ཁོད་དེ། མགོ་བོས་ཞབས་ལ་ཕྱག་འཚལ་ཞིང་། སྤུས་མོ་གཡས་པའི་ལྷ་ང་ས་ལ་བཙུགས་ནས་གསོལ་པ། སྟོན་པ་གཤེན་རབ་མཆོག བདག་ཅག་འཁོར་དུ་གཏོགས་པའི་གཡུང་དྲུང་སེམས་དཔའ་རྣམས་དང་། ཕྱི་རབས་རྗེས་སུ་འབྲང་བའི་གང་ཟག་ལ། རྣམ་དག་འདུལ་བ་ཁྲིམས་ཀྱི་བཀའ་ལུང་ལས། ངེས་ཚིག་བདེན་པའི་བོན་གཅིག་བསྟན་དུ་གསོལ། ཞེས་ཞུས་སམ་གསོལ་ཏོ། །

   དེ་ལ་གཤེན་རབ་མཆོག་གི་བཀའ་རྩལ་པ། ཉོན་གཅིག་གཤེན་རབ་དྲང་སྲོང་རྒྱལ་བ་དང་། འདུལ་བའི་འཁོར་རྣམས་དབང་པོ་གཏོད་ལ་ཉོན། མ་ནོར་ངེས་པའི་ལམ་ལ་ཞུགས་ནས་སུ། མ་ནོར་ངེས་པའི་དོན་ལ་འཇུག་པ་ན། ད་ལྟ་འཁོར་སྡེ་བཞི་ཡ་བརྒྱད་དང་། ཕྱི་རབས་རྗེས་འབྲང་གང་ཟག་ཕོ་མོ་རྣམས། འཇིག་རྟེན་འཁོར་བའི་ལས་སྤྱོད་རྒྱབ་ཏུ་བོར། སྡིག་པ་མི་དགེ་བཅུ་པོ་གཏན་ནས་སྤོངས། དགེ་བཅུ་གཡུང་དྲུང་བོན་ལ་ཡིད་གཞུང་སྤྱོད། ཐེག་པ་གོང་འཕེལ་ཚུལ་གནས་དགེ་བསྙེན་དང་། གཙང་མ་གཙུག་ཕུད་དག་པ་དྲང་སྲོང་དང་། རྣམ་དག་དཀའ་ཐུབ་དྲི་མེད་ལམ་ལ་ཞུགས། ཕྱི་ཡི་ཚུལ་དང་ནང་ཁྲིམས་ཟུང་དུ་འབྲེལ། ཕོ་མོ་ཕྱེས་ནས་གནས་རིས་སོ་སོར་འཛིན། ལྷན་གཅིག་བསྡད་ན་ཉོན་མོངས་ཁ་དྲག་པས། འཆལ་དང་སྨ་སྨེ་ཉམས་དང་འགལ་བ་འབྱུང་། དེ་ཕྱིར་མ་འཆལ་མ་སྨེ་མ་འགལ་བ། གོམས་པ་བསྐྱེད་ཅིང་མཐར་ཕྱིན་ལྡན་པར་བྱ། རྟག་པར་རྒྱུན་དུ་སྐད་གཅིག་འབྲལ་མེད་པར། གཤེན་གྱི་དགེ་སྤྱོད་རྣམ་དག་བསླབ་པ་བྱ། གང་ཞིག་ཚུལ་གནས་ཚུལ་ཞུགས་ཚུལ་བསྲུང་བས། དགེ་སྤྱོད་རྣམས་དང་རྒྱུན་པར་མ་བརྩོན་ན། ཕྱི་ཚུལ་བཟང་ཡང་སྟོན་ཀའི་ཤིང་ལོ་འདྲ། ནང་ཁྲིམས་བསྡམས་ཀྱང་རི་དྭགས་སྐྱ་བོ་འདྲ། དགེ་མེད་སྡིག་མེད་ཐར་དང་ལྟུང་བ་མེད། དེ་ཕྱིར་ཕྱི་ཚུལ་ནང་ཁྲིམས་བསྲུང་བ་ལ། གཤེན་གྱི་དགེ་སྤྱོད་རྣམ་པར་དག་པ་གཅེས། ཕྱི་ཚུལ་ནང་ཁྲིམས་ཟུང་དུ་འབྲེལ་པ་ལ། དགེ་སྤྱོད་རྣམ་པར་དག་པའི་བཅུད་ལྡན་ན། འཁོར་བ་སྒྲོལ་བའི་དེད་དཔོན་ཆེན་པོ་འགྱུར། ཞེས་བཀའ་རྩལ་ཏོ། དེ་ལ་གཤེན་ཚངས་པ་གཙུད་ཕུད་ཀྱིས་གསོལ་པ། སྟོན་པ་གཤེན་རབ་མཆོག་བདག་འཁོར་དུ་གཏོགས་པའི་གཡུང་དྲུང་སེམས་དཔའ་རྣམས་དང་། ཕྱི་རབས་རྗེས་སུ་འབྲང་བའི་གང་ཟག་རྣམས། འཇིག་རྟེན་འཁོར་བའི་ལས་ལ་བློ་ལྡོག་ཅིང་། ཡང་དག་ཐར་པའི་འབྲས་བུ་སྒྲུབ་པར་བྱེད་པ་ལ། སྡིག་པ་མི་དགེ་བཅུ་སྤང་བ་ནས། དགེ་སྤྱོད་རྣམ་པ་བཅུ་དང་དུ་བླངས་ཤིང་། ཐེག་པ་གོང་འཕེལ་དུ་སྤར་ཞིང་། ཕྱི་ཚུལ་དང་ནང་ཁྲིམས་ཟུང་དུ་འབྲེལ་ནས། ལུས་ངག་ཡིད་གསུམ་ཐ་མལ་དུ་མི་བཞག་ཅིང་། གཤེན་གྱི་དགེ་སྤྱོད་རྣམ་པར་དག་པ་ལ་འཇུག་ན། ཅི་ལྟ་བུ་ཞིག་ལ་འཇུག་ཅིང་སྤྱོད་པ་ལགས། ཞེས་གསོལ་ཏོ། དེ་ལ་གཤེན་རབ་མཆོག་གིས་བཀའ་རྩལ་པ། གཤེན་རབ་གཡུང་དྲུང་སེམས་དཔའ་སེམས་དཔའ་ཆེན་པོ་ཚངས་པ་གཙུག་ཕུད་དེ་ནི་འདི་ལྟ་སྟེ། ཁྱེད་ནི་སྔོན་གྱི་སྟོན་པ་བདེར་གཤེགས་རྣམས་ཀྱི་ཐུགས་སྲས། ད་ལྟའི་སྟོན་པ་གཤེན་རབ་མཆོག་བདག་གི་འཁོར་དམ་པ། མ་འོངས་པའི་དུས་སུ། བདག་ཉིད་མྱ་ངན་འདས་ཀྱང་། བདག་གི་ཐུགས་ཀྱི་བསྟན་པ་མ་རྫོགས་ཀྱི་བར་དུ། ཁྱེད་ཀྱིས་སྤྲུལ་པ་བརྒྱ་ཕྲག་དུ་མ་རུ་འགྱེད་ཅིང་། འགྲོ་བ་འདྲེན་པ་དང་། ཁ་ལོ་བསྒྱུར་བ་དང་། བཀའི་བསྡུད་པ་དང་། དོན་གྱི་དབྱེ་བ་དང་། བསྟན་པའི་སྒྲོན་མེ་འདེགས་ཤིང་། རྒྱུན་ཞུགས་ཀྱི་འབྲས་བུ་ལ་གནས་དགོས་པ་ཡིན་པས། ད་ཡང་རྒྱུད་འབྲས་ཐེག་པའི་མདོ་སྡུད་ཅིང་། འཕན་ཡུལ་འདོན་མཆོད་ཀྱི་བཀའི་བསྡུ་བ་རྣམས་ནི། ཁྱོད་དང་སྤངས་ལ་གནམ་གཤེན་ལ་གཏད་པ་ཡིན་པས་སྤོབས་ཆེར་བསྐྱེད་ཅིང་། རྒྱས་འབྲིང་བསྡུས་གསུམ་གྱི་དོན་ཕྱེད་པར་གྱིས་ཤིག འགྲོ་བ་འདུལ་བའི་ཐབས་ལ་མཁས་པར་གྱིས་ཤིག མི་བརྗེད་པའི་གཟུངས་དང་ལྡན་པར་གྱིས་ཤིག དེ་ཡང་ཁྱོད་ཀྱི་རྒྱུད་ལ་བདག་གིས་བྱིན་གྱིས་རླབས་པར་བྱའོ།ཞེས་ཚངས་པ་གཙུག་ཕུད་ལ། གཤེན་རབ་མཆོག་གིས་བཀའ་སྩལ་ཏོ། ཡང་གསོལ་པ། གཤེན་རབ་མཆོག་དེ་ལྟར་བདག་ལ་བཀའ་ཡི་གནང་བ་མཛད་ནས། བདག་གིས་གཤེན་གྱི་དགེ་སྤྱོད་རྣམ་པར་དག་པ། གཡུང་དྲུང་སེམས་དཔའི་སྤྱོད་པ་ཟབ་མོ་ལ་སྤྱོད་ཅིང་། ཁྲི་འཕང་གོང་ནས་གོང་དུ་འཕེལ་བར་བྱ་བའི། གཤེན་གྱི་དགེ་སྤྱོད་ལ་འཇུག་ན། དེའི་གོ་རིམ་དང་སྤྱོད་ཚུལ་ཅི་ལྟ་བུ་ཞིག་ཡིན་པ་ལགས། ཞེས་གསོལ་ཏོ། གཤེན་རབ་མཆོག་གིས་བཀའ་རྩལ་པ། རིགས་ཀྱི་བུ་ཚེ་དང་ལྡན་པ་དེ་ནི་འདི་ལྟ་སྟེ། གཤེན་གྱི་དགེ་སྤྱོད་རྣམ་པར་དག་པ་ལ། ཡན་ལག་བརྒྱད་དང་ལྡན་པ་རུ་ཤེས་དགོས་ཏེ། དེ་ཡང་ནངས་པ་ནམ་ལངས་པའི་དང་པོ། ཉི་མ་ཤར་བའི་རྩེ་མོ་ལ། སྟོད་གོས་དང་། རྨད་ཤམ་དང་། རྨད་གོས་དང་། རྨད་འོག་དང་། པད་ཞུ་དང་། པད་ལྷམ་དང་། གདིང་བ་དང་། རིན་ཆེན་གནང་བའི་རྫས་ལྔ་དང་ལྡན་པ་བྱས་ལ། ཁྲུས་དང་གཙང་སྦྲ་དག་གི་སྒོ་རུ་འཇུག་པར་བྱའོ། །

དཀའ་ཐུབ་གསོ་སྦྱོང་བས་དགོས་དམིགས་ཀྱི་ཞུ་མཆིད།

   འདིར་རང་རེ་གཡུང་དྲུང་བོན་གྱི་གཤེན་རབ་ཁྲི་གཙུག་རྒྱལ་བའི་བསྟན་པ་ལ་ཞུགས་པ་ཡིན་ཚུན་ཨ་མ་སྲོག་རྩ་ལྟ་བུའི་སྡོམ་ཁྲིམས་འདི་ཡང་དག་པ་ཞིག་སྲུང་མ་ཐུབ་པ་ཡིན་ན་དེའི་རྗེས་འབྲང་གི་ལྟ་བ་ལོག་པ་དང་ལྟ་བ་གོལ་བ་སྡོམ་པ་འཆལ་བ་སོགས་ཉེས་ལྟུང་ཅི་རིགས་པ་འབྱུང་བར་དོག་ནས་དགོས་པ་དང་རྒྱུ་མཚན་ངེས་ཅན་འཛིན་ནས་དཔལ་ལྡན་རྒྱལ་བ་༧སྨན་རི་བའི་ཕྱག་སྲོལ་ལྟར་དེང་དུས་བདག་ཅག་གི་བོན་འབངས་ཡོངས་ཀྱི་གཙུག་རྒྱན་རྨད་བྱུང་འདུལ་བའི་བདག་ཉིད་རྒྱལ་བ་༧སྨན་རི་བའི་ཁྲི་འཛིན་སོ་གསུམ་པ་ལུང་རྟོགས་བསྟན་པ་ཉི་མ་རིན་པོ་ཆེའི་བཀའ་སྲོལ་དང་། ཡོངས་འཛིན་སྨྲ་བའི་སེང་གེ་སློབ་དཔོན་བསྟན་འཛིན་རྣམ་དག་རིན་པོ་ཆེའི་མཛད་གནང་བའི་དཀའ་ཐུབ་ལ་གནས་ཚུལ་གྱི་ལག་ལེན་མདོ་དོན་གསལ་བྱེད་ལ་གཞི་གཟུང་ཐོག་༧སྨོན་རྒྱལ་བླ་བྲང་གི་རྨད་བྱུང་སེམས་དཔའ་འདུས་སྡེ་རྣམས་ཀྱིས་རྣམ་དག་གཤེན་གྱི་དགེ་སྤྱོད་དེ་ཉིད་ཉིན་རེའི་འགྲོས་ལྟར་རྨད་བྱུང་ཚུལ་ཁྲིམས་འཛིན་པའི་སྡེ་ཚོགས་རྣམས་ཀྱི་བསླབ་བྱ་མ་གོ་བ་རྣམས་གོ་བར་བྱེད་པ་དང་གོ་བ་རྣམས་གསོ་སྦྱོང་མཐར་རུ་ཕྱིན་པ་དང་།

   ཡང་དགོས་སུ་སྨོན་རྒྱལ་བླ་རབས་བརྒྱ་ཕྲག་རིམ་བྱུང་ནང་འདུལ་བའི་རྗེས་འཛིན་པ་སྐྱེས་བུ་ཁྱད་དུ་འཕགས་པ་བྱོན་ཡོད་པ་དཔེར་མཚོན་ཙམ་ཞུས་ན། སྨོན་རྒྱལ་དམ་པ་རང་གྲོལ། སོགས་ལོ་རབས་སྟོང་ལས་ཉེ་བའི་འདུལ་འཛིན་པ། སྨོན་རྒྱལ་ནམ་མཁའ་དབང་རྒྱལ་སོགས་ལོ་བརྒྱ་ལས་བརྒལ་བ་མདོར་ན་གཤེན་རབ་ཁྲི་གཙུག་རྒྱལ་བའི་རྗེས་འཛིན་པ་གང་མང་ཞིག་བྱོན་ཡོད་པ་དེ་དག་གི་ཐུགས་རྗེའི་བྱིན་རླབས་ཚན་ཁ་མྱུར་དུ་འབྱུང་བ་བཅས་ཀྱི་དགེ་རྩ་ཁྱད་པར་ཅན་དུ་འགྱུར་བ་དམིགས་པ་དང་མདོར་ནས་གཤེན་རབ་ཁྲི་གཙུག་རྒྱལ་བའི་བསྟན་པ་འཛིན་པའི་རྨད་བྱུང་སེམས་དཔའ་འདུས་སྡེ་གང་ན་བཞུགས་པ་རྣམས་ཀྱི་སྐུ་ཚེ་བསྐར་བརྒྱར་བསྟན་ཅིང་ཚུལ་ཁྲིམས་བསླབ་བྱ་གོང་དུ་གོང་དུ་འཕེལ་བའི་སྨོན་ལམ་སྦྲེལ་ནས་འཚོགས་པ་ཡིན། འདི་དག་ཉམས་སུ་ལེན་དགོས་པ་ནི་ལད་མོ་དང་མིང་སྐམ་གྱི་ཆེད་དུ་མ་ཡིན་པ་སྔ་རབས་ཞང་ཞུང་གི་དུས་ནས་འདུལ་བསྟན་བོན་རང་དུ་དར་བ་ཡིན་པའི་བཀའ་ཚད་མ་འདི་ཉིད་བྱིན་རླབས་ཀྱི་ཚན་ཁ་འབར་བའི་དོད་དང་གསར་ཞུགས་སེམས་དཔའ་འདུས་སྡེའི་བསླབ་བྱ་དང་རྒྱུ་མཚན་ངེས་ཤེས་དྲོངས་པའི་ཕྱིར་དང་ཡང་དགོས་སུ་གཤེན་གྱི་བཙུན་ཆུང་རྣམས་བསླབ་པ་ཚུལ་ཁྲིམས་ཀྱི་དོན་ཚུལ་བཞིན་དུ་ཉམས་སུ་ལེན་མ་ཐུབ་ཡང་ལྟ་བ་ཕྱིན་ཅུ་ལོག་ཏུ་སོང་ནས་ཐ་ན་རྒྱུད་ལ་སྐྱོ་ཤས་ངེས་འབྱུང་ཙམ་མེད་ཀྱང་རྟོགས་སད་ལད་མོའི་བོན་དྲེད་བོན་གིས་མ་ཐུལ་བའི་དཔེ་ལྟར་ལོག་པའི་ལམ་དུ་མི་འགྲོ་བའི་གསོལ་སྨོན་དང་སྐྱབས་མཇུག་དང་སྦྲགས་ཏེ་གདན་ས་ཁྱུང་ཡུལ་སྨོན་རྒྱལ་བླ་བྲང་ཐེག་ཆེན་ནོར་འཁྱིལ་གླིང་དུ་སྨོན་རྒྱལ་བཙུན་པ་རང་གྲོལ་ཉི་མ་རྒྱལ་མཚན་འབོད་པ་དེས་འདུས་པ་རིན་པོ་ཆེ་དྲི་མེད་གཟི་བརྗིད་རབ་ཏུ་འབར་བའི་མདོ་གཤེན་གྱི་དགེ་སྤྱོད་རྣམ་པར་དག་པ་བསྟན་པའི་མདོ་ལས་བཏུས་པའོ།།

བསླབ་ཅིང་མཁས་དང་རིག་ཅིང་རྟོགས་པ་ཡི།།
ཤེས་བཞིན་བྱ་བའི་རྗེས་སུ་མི་འབྲང་བར།།
འཇུག་སྒོ་ཡན་ལག་མ་ནོར་ངེས་པ་ཡི།།
འདུལ་ཁྲིམས་གཙང་མའི་སྒོ་རུ་འཇུག་པར་ཤོག
ཅི་ལྟར་ཞུགས་བཞིན་ཚུལ་ལ་གནས་པ་ཡིས།།
མཁན་སློབ་དཔང་པོ་རྣམས་ཀྱི་མདུན་དྲུང་དུ།།
གནང་དང་བླང་གྱུར་སོ་སོར་ཐར་པའི་སྡེ།།
འཆལ་དང་ཉེས་ལྟུང་དྲི་མ་བྲལ་བར་ཤོག །
མེ་ཏོག་ནང་ནས་ཨུ་དུམ་ཝ་ར་དང་།།
སྨན་གྱི་ནང་ནས་རྣམ་པར་རྒྱལ་བ་དང་།།
རིན་ཆེན་ནང་ནས་གཙོ་མའི་གསེར་བཞིན་དུ།།
འདུལ་བའི་ནང་ནས་བདག་ཉིད་མཆོག་འཛིན་ཤོག
གང་དག་སེམས་ཅན་མིག་གིས་མཐོང་ཡུལ་དུ།།
ཏིང་ཞི་དངུལ་གྱི་མན་དལ་དབྱིབ་ལེགས་ལ།།
མར་ཞི་གསེར་གྱི་མཆོད་རྟེན་བཀྲམ་པ་ལྟར།།
ཀུན་གྱིས་མཆོད་གནས་བཀུར་བའི་ཞིང་དུ་ཤོག །