གདུང་སེམས་ཀྱིས་གཟེར་བའི་མགུར་དབྱངས།

[ཟླ་ཚེས། 2015-04-30 21:59:01][རྩོམ་པ་པོ། ཨ་སྦ་སྦ།][རྩོམ་ཁུངས། ཧི་མ་ལ་ཡའི་བོན།][ཀློག་གྲངས། ]

 (བལ་ཡུལ་དུ་ས་འགུལ་བྱུང་བའི་མི་མང་རྣམས་ལ་ཆེད་དུ་སྤྲིངས་པ།)
བསྟན་འཛིན་དབང་རྒྱལ། (ཨ་སྦ་སྦ།)
001.jpg

ཁོ་བོས་སི་པཎ་མཚོ་གླིང་ཆོས་ཁྲིད་སྐབས།།
གནས་ཆེན་བལ་ཡུལ་ས་འགུལ་བྱུང་སོང་ཞེས།།
ཐོས་པ་ཙམ་གྱིས་ལུས་ཀྱི་བ་སྤུ་གཡོ།།
སེམས་ལ་སྐྱོ་བའི་ཚོར་སྣང་རླུང་ལྟར་འཚུབ།།
ལུས་ཀུན་ནད་ཀྱིས་མནར་བའི་མྱོང་ཚོར་བྱུང་།།
ཡུལ་ལྷ་བཙན་པོ་ཁྲོས་པའི་བཀའ་ཆད་དམ།།
རབ་བྱུང་སྲིད་པ་འཁོར་བའི་འཇིགས་པ་གང་།།
ལས་དང་སྐལ་པའི་དུས་ལ་བབས་སམ་ཅི།།
ས་འོག་རྨང་རྡོ་ཕན་ཚུན་བརྡར་བ་སོགས།།
མཐའ་གཅིག་རྒྱུ་མཚན་གཅིག་ནི་མ་ངེས་ཏེ།།
ཕྱི་ནང་གསང་བའི་རྒྱུ་རྐྱེན་མོད་པོ་ཡིས།།
རྨི་ལམ་བཞིན་དུ་འབྱུང་བའི་འཇིགས་པ་བྱུང་།།
ཕོ་མོ་རྒན་གཞོན་བྱིས་པ་ཆུང་ངུ་སོགས།།
སྟོང་ཕྲག་མང་པོ་རྐྱེན་འདས་རྨས་སྐྱོན་ཁྲོད།།
སྐད་ཅིག་ཙམ་ཡང་འབྲལ་བར་མི་ནུས་པའི།།
མ་བུ་གཏན་འབྲལ་བྱུང་བར་ཡ་རེ་ང་།།
ཚེ་འདིའི་བརྩེ་འདང་ཟབ་མོའི་འགྲོག་འདྲིས་ཀྱིས།།
མ་འོངས་བདེ་སྐྱིད་རྨི་ལམ་མང་མཆིས་ཀྱང་།།
འཇིགས་སྣང་སྡུག་གིས་སྐད་ཅིག་དབང་མེད་དུ།།
ཚེ་འདིར་གཏན་དུ་བྲལ་བར་ཞེ་ནས་སྡུག།།
ནང་མི་ཕལ་ཆེར་ཤི་གསོན་རྨས་ནས་ལྷག།།
བསགས་པ་ཀུན་བརླག་བརྩིགས་པ་ཀུན་ཞིག་ནས།།
གཅིག་པུ་རོགས་མེད་རེ་མེད་ནུས་མེད་ངང་།།
ཡར་ལ་བལྟས་ཀྱང་མཐའ་མེད་ནམ་མཁའ་སྟོང་།།
ཕར་ལ་བལྟས་ཀྱང་གྱང་རོ་མི་རོས་གང་།།
སེམས་པ་གཏད་མེད་བར་དོའི་རྣམ་ཤེས་བཞིན།།
ཅི་བྱ་བྲལ་བའི་ནུས་མེད་ཕ་རྒན་དང་།།
ཚེ་མཐའ་འཁྱོལ་ནས་ཚིམས་པའི་རྒན་རྒོན་གྱི།།
ཕྲུ་གུ་ཚ་བོའི་མི་ཚེ་སྐྱིད་པའི་སྐབས།།
ཐམས་ཅད་འདས་ཏེ་རྒན་གོག་རྗེས་ལུས་དང་།།
མི་རབས་མང་པོའི་དྲན་རྟེན་ཁྱིམ་ཁང་དང་།།
ཆོས་འཇིག་འབྲེལ་བའི་དངོས་རྫས་རིན་ཐང་ཅན།།
ཐམས་ཅད་སྐད་ཅིག་རྡུལ་དུ་གྱུར་བས་སྐྱོ།།
སྡུག་གི་འབྲུག་སྒྲ་ས་འོག་གྲག་ན་ཡང་།།
གོ་མཁན་མེད་པར་བྲག་ཆའི་སྒྲ་བཞིན་ཡལ།།
ཉེས་སྐྱོན་བྲལ་བའི་བྱིས་པ་སྐྱེས་མ་ཐག།།
འཇིག་རྟེན་འདི་ཡི་འོད་ཙམ་མ་མཐོང་ནས།།
སྐྱེས་དང་འཆི་བ་མཉམ་པོར་མྱོང་བ་རྣམས།།
ཡིད་ལ་འཆར་དཀའ་རྨི་ལམ་ཐན་ལྟས་བཞིན།།
མ་འོངས་མི་ཡིས་རིམ་བཞིན་བརྗེད་དེ་ཡལ།།
ཉིན་གཅིག་རྗེས་དང་ཤུལ་ཡང་ངོས་འཛིན་དཀའ།།
དེས་ན་གལ་ཆེན་དུས་ཚོད་འདི་ཐོག་ལ།།
ལོ་རྒྱུས་མེ་ཏོག་འཕྲེང་བ་རིང་བའི་གྲོགས།
བལ་བོད་ཕོ་མོ་ཚེ་ལས་འདས་རྣམས་ལ།།
བསྔོ་སྨོན་དགེ་རྩ་མཐུད་ནས་བསྒྲུབ་པར་ཞུ།།
ཤུལ་ལུས་ཕོ་མོ་སྐྱ་སེར་མ་ལུས་ཀུན།།
སྙིང་གི་དབུས་ནས་གདུང་ཤུགས་གཅིག་དྲིལ་ཡིན།།
སྡུག་གི་ཁུར་པོ་ཆེ་ཆུང་མཉམ་འདེགས་དང་།།
བྱམས་བརྩེའི་སྒྲོན་མེས་སྡུག་མུན་སེལ་རེས་དང་།
སྐྱོ་བའི་སྐད་ཆ་སྐབས་སུ་ཉན་རེས་དང་།།
ཅི་བྱ་མི་ཤེས་མ་འོངས་མདུན་ལམ་བརླག།།
སྡུག་གི་མུན་ལས་འོད་ནི་མི་མཐོང་སྐབས།།
ཕན་ཚུན་རིན་ཆེན་སློབ་གསོ་རྒྱག་རེས་དང་།།
རྣམ་དཔྱོད་ལྡན་པའི་སྐྱེ་བོ་ཕོ་མོ་རྣམས།།
འདི་ལས་ལྷག་པའི་མི་རྟག་བསླབ་བྱ་ནི།།
ད་རེས་མ་འཕྱི་མི་རྟག་རྟོགས་ལ་འབད།།
ལོ་ན་ཆེ་ཆུང་ནད་ཀྱིས་ཟིན་མིན་སོགས།
འཆི་བའི་གནས་དུས་རྐྱེན་ནི་ག་ལ་ངེས།།
རང་ཉིད་འཆི་དུས་ཤིན་ཏུ་ཉེ་ཡང་སྲིད།།
འཆར་གཞི་རིང་པོའི་ཚོང་ཉེས་མ་ཤོར་ཨ།།
ཟང་ཟིང་ངང་ལ་ཞི་བ་མ་ཤོར་ཨ།།
རྒྱུ་ནོར་དད་ནས་བདེ་སྐྱིད་མ་ལུས་ཨ།།
ཁོང་ཁྲོ་ཟ་ནས་བྱམས་པ་མ་ཤོར་ཨ།།
ཚེ་ནི་ཉི་མ་གཅིག་ལས་མེད་པ་ལྟར།།
རང་གི་བླ་སྲོག་རྒྱས་པའི་བྱ་བར་བརྩོན།།
སེམས་པ་ཉེ་སའི་གཉེན་གྲོགས་མཉམ་དུ་བརྩེ།།
ཤེས་རབ་རྒྱས་པའི་སྒྱུ་རྩལ་གསར་པར་སྦྱོངས།།
བྱིས་པ་བཞིན་དུ་གད་མོ་བརྒྱ་ཕྲག་དགོད།།
དམིགས་གཏད་མེད་པའི་དགའ་བའི་ལས་ཀྱང་བྱ།།
བདེ་སྐྱིད་མཆིས་ན་སྨྱོ་ལས་ཡིན་ཡང་མཛོད།།
བྱམས་བརྩེའི་ཉི་མའི་འོད་སྟོང་ཕྱོགས་ཀུན་སྤྲོས།།
གཞན་ཕན་སེམས་ཀྱིས་འཕྲིན་ལས་རྩོལ་མེད་སྒྲུབས།།
རང་སེམས་བདེ་སྐྱིད་འཁོར་ལོ་ཕྱོགས་ཀུན་བསྐོར།།
ཕྱོགས་ཞེན་མེད་པའི་བསྟན་འགྲོའི་བྱ་བར་འབད།།
ས་ཡོམ་འདི་ནི་སྣང་བའི་སློབ་དཔོན་ཡིན།།
ཚེ་གཅིག་ཆོས་ཉན་སྙིང་དོན་གོ་དཀའ་ན།།
ས་འགུལ་འདི་ཡིས་སེམས་འགུལ་འབྱུང་ཡང་སྲིད།།
འབུམ་དགུ་བསགས་ནས་རང་རྒྱུད་མ་སྨིན་ན།།
ཚོར་མྱོང་འདི་ཡིས་རང་རྒྱུད་དུལ་ཡང་སྲིད།།
ཤེས་བྱ་གཤིས་ཀྱི་སློབ་དཔོན་ཡོངས་ལ་བསྟོད།།
ཉེས་མེད་ཚེ་འདས་ཕོ་མོའི་བདུན་ཚིགས་སུ།།
སྙིང་ནས་གུས་ཤིང་བརྩེ་བའི་སྨོན་ལམ་གྱིས།།
མེ་ཏོག་ཚིག་འཕྲེང་མཆོད་པ་འདི་ཉིད་འབུལ།།
ཁྱེད་རྣམས་ནམ་ཡང་མི་བརྗེད་དུས་ཀུན་ཏུ།།
བདག་གི་དགེ་བའི་རྩ་བ་བསྔོ་བའི་ཡུལ།།
དག་པའི་ཞིང་ནས་ཐར་པ་ཐོབ་པར་ཤོག།

ཞེས་པ་ཡང་ཨ་སྦ་སྦ་རུ་འབོད་པས་འཇར་མེན་གྱི་རྒྱལ་ས་བྷེར་ལིན་ནས་ཐོལ་བྱུང་དུ་བྲིས་པ་དགེ་གྱུར་ཅིག །༣༠/༠༤/༡༥

009.jpg
008.jpg

 

བསྡོམས་པས་དཔྱད་མཆན་ཡོད།དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ། རང་གི་དངོས་མིང་གི་ལམ་ནས། ངེད་དྲ་ཚིགས་ཀྱི་འཕྲིན་ལས་ཡུན་རིང་དུ་རྒྱས་ཕྱིར་ཁྲིམས་འགལ་གཤེ་བསྐུར་དང་། བསྟན་པར་འཚེ་བའི་ལུགས་དགག་བྱ་རུ་དགོངས་ཏེ་དཔྱད་གཏམ་སྤེལ་ན་ཤིན་ཏུ་ལེགས་པས། ཚང་མས་ཕན་ཚུན་ལ་གུས་བཀུར་དང་བརྩི་འཇོག་གི་ལམ་བུར་ཞུགས་ཏེ་བསྟན་པ་སྤྱི་ལ་ཕན་པའི་མཆན་འདེབས་རོགས་གནང་བར་ཞུ་ཞུ། །
སྤེལ་མཁན།